E “Dios di Bèrdat” Semper Ta Kumpli ku Su Promesanan

1. Segun Salmo 31:​2-5, dikon nos por konfia den Yehova?

NOS ta biba den un mundu kaminda gañamentu a bira algu masha normal. P‘esei, tin biaha, ta difísil pa sa ken bo por konfia. Por ehèmpel, hopi negoshi ta hasi kos desonesto. Ademas, tin hende ku no ta onesto tokante e produktonan ku nan ke bende. Anto tin biaha, asta un bon amigu por kibra un promesa ku el a hasi na nos. Pero tin un persona sí ku semper nos por konfia: Yehova, e “Dios di bèrdat.” (Lesa Salmo 31:​2-5.) Yehova nunka no ta gaña; tur loke e bisa ta bèrdat. P’esei, semper nos por tin sigur ku lo e kumpli ku tur loke e bisa.

2. Kiko nos lo trata den e artíkulo akí?

² Den e artíkulo akí, nos lo trata promé algun motibu dikon nos por konfia den Yehova kompletamente. Despues, nos lo trata kon Yehova lo kaba ku Satanas i su mundu malbado. I nos lo trata tambe kiko Yehova ta hasiendo for di awor pa kumpli ku su propósito. E artíkulo akí lo sigui motivá nos pa konta otro hende e bèrdat tokante Yehova.

ALGUN MOTIBU KU NOS TIN PA KONFIA DEN YEHOVA

3. Dikon nos por tin tur konfiansa den Yehova?

³ Nos por konfia den Yehova pasobra e ta e Kreador. Ta Yehova a krea e universo, tera i tur loke tin bida. (Gén. 1:1; Sal. 36:9; Rev. 4:11) El a krea tera ku tur loke nos tin mester pa keda na bida, manera e aire ku nos ta inhalá i e awa ku nos ta bebe. Anto e kosnan ei nunka lo no kaba. Yehova tin i semper lo e tin kontrol di tur kos. Yehova a krea nos, e sa tur kos i e tin tur poder. P’esei, nos por konfia Yehova ku nos bida, tantu awor komo den futuro.

4. Dikon nos por tin sigur ku Yehova ta stima nos?

⁴ Nos por konfia den Yehova pasobra e ta stima nos. Yehova a krea hende pasobra e tabata ke pa hende tambe disfrutá di bida meskos kuné. Yehova a traha hende segun su semehansa pa asina nan tambe por demostrá su bunita kualidatnan, manera amor i bondat. (Gén. 1:26) Ademas, Yehova a duna nos boluntat liber. Tambe el a duna nos un bunita hogar, esta, tera. (Sal. 115:16) Anto el a duna nos promé mayornan e bunita tarea di hasi tera un paradeis. (Gén. 1:28; 2:15) El a duna nan kuminda na abundansia, un gran variedat di mata i di bestia, i hopi otro kos mas. Tur eseinan ta mustra kuantu Yehova ta stima hende i ku su amor leal “ta pa semper.”—Sal. 103:17.

5. (a) Ora Ádam ku Eva a desobedesé Yehova, Yehova su propósito pa hende i tera a kambia? (b) Menshoná algun promesa di Yehova ku a kumpli. (Wak e kuadro “Yehova Semper Ta Papia Bèrdat.”)

⁵ Nos por konfia den Yehova pasobra semper e ta kumpli ku su promesanan. Yehova “no a krea tera pòrnada. Mas bien, el a form’é pa e ser habitá.” (Isa. 45:​18, 19) Ora Ádam ku Eva a rebeldiá, nan a haña kastigu di morto. P’esei, na e momento ei, a parse ku Satanas a stroba Yehova di kumpli ku su propósito pa hende i tera. Pero Yehova semper ta kumpli ku loke e primintí. (Isa. 46:​10, 11) Komo ku Yehova su propósito pa hende biba riba tera no a kambia, el a permití Ádam ku Eva haña yu. Despues, el a manda su Yu na tera komo un reskate pa salba nos i duna nos e speransa di biba pa semper riba tera.—Huan 3:16.

KIKO YEHOVA A HASI KABA PA KUMPLI KU SU PROPÓSITO?

6. Despues ku Ádam ku Eva a desobedesé Yehova, kiko Yehova a bisa ku lo pasa?

⁶ E persona ku a influensiá Ádam ku Eva pa rebeldiá kontra Dios ta “e kolebra original, ku yama Diabel i Satanas.”a (Rev. 12:9; Gén. 3:​4, 5; Huan 8:44) Pa e motibu ei, Yehova a bisa ku den futuro Satanas lo ser destruí. (Gén. 3:15) Pero promé ku esei sosodé, hopi hende lo laga Satanas influensiá nan pa hasi malu. Apesar di esei, lo tin hende ku sí lo keda fiel na Yehova.

7. Ken ta esnan ku ta na banda di Satanas, i kiko lo pasa ku nan?

⁷ Ken ta tur esnan ku ta bou di e influensia di Satanas? Eseinan ta e angelnan malbado i hende ku no ta obedesé Yehova. Komo ku e personanan akí ta oponé Yehova, nan ta na banda di Satanas. Pero Yehova a pone su dia kaba pa e destruí Satanas i tur esnan ku ta na su banda.—Dán. 2:44; Rom. 16:20.

8. Kiko Hesus a hasi na 1914? (Wak e plachinan.)

⁸ Dikon nos por tin sigur ku Yehova lo kumpli ku su promesa di destruí Satanas i tur esnan ku ta na su banda? Na 1914, Yehova a hasi Hesus rei, i Hesus a kuminsá un guera kontra Satanas e Diabel i su demoñonan. Anto Hesus a benta nan riba tera. (Rev. 12:​7-9) Aunke e bataya ei a tuma lugá den shelu, hende riba tera por a sinti e efektonan di e bataya ei. Ta p’esei Beibel ta bisa: “Ai di tera i di laman, pasobra Diabel a baha bini serka boso. I e ta masha rabiá, pasobra e sa ku a ked’é masha poko tempu.” (Rev. 12:12) For di 1914, Satanas su meta prinsipal ta pa hala mas tantu hende na su banda. I debí na esei, nos ta mira mas i mas problema na mundu. Pero pronto, Hesus lo deshasí di Satanas komo gobernante di e mundu akí i lo e destruí tur hende ku ta na banda di Satanas. (Rev. 6:2) Ademas, Hesus lo vindiká Yehova su nòmber, esta, lo e saka na kla tur e mentiranan ku Satanas a papia tokante Yehova. (Sal. 45:​4-6) I tur hende lo sa ku Yehova ta e Dios di bèrdat!—Eze. 38:23.

Promé Guera Mundial: U.S. National Archives photo; bòm: USAF photo; pandemia: blvdone/stock.adobe.com; manifestashon: inhauscreative/E+ via Getty Images

E DIOS DI BÈRDAT TA BUSKA HENDE KU TA STIMA E BÈRDAT

9. Ken Yehova ta buskando awe?

⁹ Mientrastantu, Yehova ta buskando hende ku ke sirbié. E ke “reuní [nan] pa nan ta den union ku Kristu,” sí, tantu “e kosnan den shelu” komo “e kosnan riba tera.” (Efe. 1:10) “E kosnan den shelu” ta referí na e ungínan ku Yehova a skohe pa reina huntu ku Kristu den shelu. “E kosnan riba tera” ta referí na hende ku lo biba pa semper den paradeis aki riba tera. Tur e sirbidónan ei di Yehova ta hasi tur nan esfuerso pa siña otro hende e bèrdat tokante Yehova i asina mustra ku Satanas ta un gañadó.

10. Kon Yehova ta yuda hende siña e bèrdat? (Revelashon 14:​6, 7)

¹⁰ Pa Yehova por logra haña hende ku ke sirbié, e ta laga su pueblo hasi un trabou masha importante, esta, di prediká e bon notisia rònt mundu. (Lesa Revelashon 14:​6, 7.) Aunke Yehova a duna hende e trabou ei, e angelnan tambe ta hunga un ròl masha importante, pasobra nan ta guia hende ku ta interesá na e pueblo di Yehova. Ora Dios su pueblo ta prediká e bon notisia, nan ta yuda hende komprondé tambe ku Satanas ta usa religion falsu pa plama mentira tokante Yehova. (Rev. 18:​2, 4) Pronto, tur religion falsu lo ser destruí pa semper, i tur hende ku ta stima e Dios di bèrdat lo dun’é e onor ku e meresé.—Rev. 17:16.

11. Kon nos por sa ken ta e berdadero sirbidónan di Dios?

¹¹ Yehova ta hala tur sorto di hende rònt mundu serka dje pa nan bira parti di su famia. (Rev. 7:​9, 10) Ora nan a siña tokante Yehova pa promé biaha, nan a sinti nan motivá pa bira parti di su pueblo, pasobra nan a rekonosé ku nan a haña e bèrdat. (Mar. 13:10) Den nos tempu, nos ta mira kumplimentu di loke Profeta Malakías a profetisá. El a bisa: “Boso lo bolbe mira e diferensia entre un persona hustu i un persona malbado, entre un persona ku ta sirbi Dios i un persona ku no ta sirbi Dios.” (Mal. 3:18) Ta mas bisto ku nunka ken ta esnan ku ta adorá Yehova na e manera korekto. Pa medio di nan kondukta i e trabou di prediká, Testigunan di Yehova ta mustra ku nan ta e berdadero sirbidónan di Dios.

12. Kon e trabou di prediká ta yuda kumpli ku Yehova su propósito?

¹² Ora nos ta prediká “bon notisia tokante e Reino,” nos ta obedesé e mandamentu ku Hesus a duna i nos ta kumpli ku profesia di Beibel. (Mat. 24:14; 28:​18-20) Kiko nos a logra ku tur e esfuersonan ei? Hopi hende rònt mundu a bira siguidó di Hesus, i nan ta anhelá pa e tempu yega ku nan por sirbi Yehova pa semper. No tin palabra pa deskribí e goso ku nos ta sinti di por kontribuí na kumplimentu di Yehova su propósito!

YEHOVA SIGUR LO KUMPLI KU TUR SU PROMESANAN

13. Ken foral Satanas ta ataká, i dikon?

¹³ Satanas ta masha rabiá pasobra e sa ku “a ked’é masha poko tempu” promé ku e mundu malbado akí ser destruí. (Rev. 12:​12, 13) Satanas ta ataká foral esnan ku Dios a skohe pa goberná den su Reino, pasobra nan “ta kumpli ku e mandamentunan di Dios i tin e trabou di duna testimonio di Hesus.” (Rev. 12:17; 14:12) Satanas ta ataká tambe tur hende ku ta apoyá nan i e trabou ku nan ta hasi.

14. Kiko lo pasa ora Satanas ataká Yehova su pueblo? (Wak e plachi.)

¹⁴ Despues ku Babilonia e Grandi ser destruí, tur hende ku ta na Satanas su banda lo hasi un último intento pa kaba ku Dios su pueblo. Despues di esei, Armagedon lo kuminsá. (Rev. 16:​13, 14, 16) Hesus i su ehérsito den shelu lo salba Yehova su pueblo i lo destruí tur loke a sobra di Satanas su mundu. (Rev. 19:​19-21) Pronto lo no tin niun hende malbado ni gañadó mas. (Rev. 21:8) E ora ei, Yehova lo ser vindiká i hende lo sa ku tur loke e hasi ta korekto i ku semper e ta papia bèrdat.

15. Kon nos por ta sigur ku Yehova lo kumpli ku tur su promesanan? (Isaías 65:​16, 17) (Wak e plachi.)

¹⁵ Awe mas ku nunka hende ta sigui bira mas i mas dividí. Pero danki na Yehova, su pueblo ta keda uní. Yehova ta sigui buska hende ku ta stima e bèrdat pa nan bira parti di su famia. Anto nada no por stroba Yehova di bendishoná su pueblo i e trabou ku nan ta hasiendo. (Lesa Isaías 65:​16, 17.) Nos por tin sigur ku tur loke Yehova a primintí lo kumpli. Dikon nos por tin e siguransa ei? Pasobra Apòstel Pablo a bisa na Romanonan 8:​38, 39: “Nada no por separá nos for di e amor ku Dios tin pa nos: ni morto ni bida, ni angel ni gobièrnu, ni loke tin awor ni loke tin ku bini, ni niun poder, ni haltura ni profundidat, ni niun otro kreashon. No tin apsolutamente nada ku por separá nos for di e amor di Dios ku a ser demostrá mediante Kristu Hesus, nos Señor.”

16. Dikon bo ta konfia Yehova kompletamente?

¹⁶ Nos tin tur motibu pa konfia den Yehova, e Dios di bèrdat. Dikon? Pasobra ta e a krea nos i e ta stima nos masha tantu mes. Un otro motibu ku nos por konfia den Yehova ta pasobra nos ta mira kon Yehova ta sòru pa mas i mas hende di tur nashon forma parti di e multitut grandi. (Isa. 60:22; Zak. 8:23) Ademas, nos tin tur konfiansa ku Yehova lo kumpli ku su propósito i ku lo e kaba ku Satanas i Satanas su mentiranan. Ku tur e kosnan ei na mente, nos ta alabá Yehova meskos ku David ora el a bisa: “Alabá sea Yehova Dios, . . . E so ta hasi obra maravioso. Laga Dios su nòmber glorioso ser alabá pa semper, i laga su gloria yena henter tera.”—Sal. 72:​18, 19.