Konfia den Yehova, Nos Dios Todopoderoso

1. Kiko ta algun di e kosnan difísil ku Yòb a pasa aden?

YÒB a pasa den hopi kos difísil den su bida. El a pèrdè tur su yunan; el a pèrdè hopi di su bestianan i hopi di su sirbidónan. I riba dje, el a bira hopi malu. Ademas, el a pèrdè su bon reputashon den komunidat. Anto hopi di e kosnan ku su supuesto amigunan a bis’é tabata masha desanimante. Asta su esposa ku e tabata stima hopi a bis’é pa “maldishoná Dios i muri.” (Yòb 2:9; 15:​4, 5; 19:​1-3) Tur e kosnan ku a pasa ku Yòb por a afektá su konfiansa den Dios i pon’é pensa ku Yehova no ta protehá su sirbidónan ku ta stim’é.

2-3. (a) Ora nos ta pasa den prueba, kiko nos por kuminsá pensa? (b) Kiko nos lo siña for di e buki di Yòb?

² Segun 2 Timoteo 3:​1, nos ta bibando den ‘situashon krítiko, difísil pa trata kuné.’ P’esei, meskos ku Yòb, nos tambe por haña nos ku problema difísil den bida. Tin biaha, nos por haña nos ku un prueba tras di otro i nos por sinti nos asina anshá ku ta parse ku no tin salida. Debí na esei, algun hende ta kuminsá duda si di bèrdat Yehova ta stima nan i ke yuda nan.

³ Si bo a yega di sinti bo asina, no desanimá. Yòb a bira konvensí ku Yehova nunka lo bandoná su sirbidónan fiel. Nos tambe por haña e mesun konfiansa ei ku Yòb. Nos ta bai wak dos lès for di e buki di Yòb ku por yuda nos logra esei. Di promé, e buki di Yòb lo siña nos ku semper nos por konfia den Yehova pasobra e ta e Gobernante Supremo. Di dos, nos lo wak ku Yehova tin e poder pa dirigí susesonan na mundu di tal forma pa kumpli ku su propósito. Ademas, e ta duna nos tur loke nos tin mester pa nos keda ku un bon amistat kuné pa semper.

SATANAS A BINI NA E REUNION DEN SHELU

4. Ken tur tabata presente na e reunion ku Yehova tabatin den shelu?

⁴ Riba un dia, tur e angelnan a bini pa presentá dilanti di Yehova. Despues, Beibel ta bisa: “Satanas tambe a bini entre nan.” (Yòb 1:6) Esaki ta promé biaha ku Beibel ta menshoná e título “Satanas.” E ta ser yamá asina pasobra e ta oponé Yehova. Fo’i ora Yehova a menshoná e palabranan na Génesis 3:​15, Satanas no tabata forma parti mas di Yehova su famia den shelu. El a bira enemigu di Yehova, di e angelnan fiel i di hende fiel.

5. Kiko nos ta siña for di loke a tuma lugá den shelu?

⁵ Yehova ke pa nos sa kiko a pasa na e reunion den shelu. P’esei, el a laga skirbi e suseso akí den Beibel. Loke Satanas a bisa ta mustra ku e ta un persona kruel i ku e ta odia tur hende ku ta sirbi Yehova. (Yòb 1:9; kompará ku Revelashon 12:10.) Ademas, loke a pasa den shelu ta mustra ku Yehova semper ta usa su poder na un manera hustu. E ta mustra tambe ku Yehova por disidí kon leu un persona por bai. Sigur ta un konsuelo pa sa esei.

YEHOVA TIN TUR KOS BOU DI KONTROL

6. Kon Yehova a mustra ku ta e tabata dirigí e reunion den shelu? (Yòb 1:​7, 8)

⁶ Lesa Yòb 1:​7, 8. Kon nos sa ku Yehova tabata dirigí e reunion den shelu? Pasobra ta Yehova mes a kuminsá e kòmbersashon ku Satanas i puntr’é: “Bo a opservá mi sirbidó Yòb?” Yehova a hasi e pregunta ei pasobra e tabata sa ku Satanas kier a ataká Yòb. Laga nos trata kon Yehova a usa su poder pa yuda Yòb.

7. Segun Yòb 1:10 i 11, kiko Satanas a bisa tokante e hendenan ku ta sirbi Yehova?

⁷ Lesa Yòb 1:​10, 11. Yehova ta e Gobernante Supremo di universo. Ademas, e ta Dios Todopoderoso i semper e ta usa su poder na e manera korekto. (Yer. 32:17; Dán. 4:35) Pero Satanas a insinuá ku Yehova no ta usa su poder na e manera korekto. Segun Satanas, Yehova ta duna hende, inkluso Yòb, loke nan ke djis pa nan sirbié. Tambe, el a insinuá ku hende ta djis sirbi Dios pa loke nan ta haña di Dje. Kon Yehova a reakshoná riba esei?

8-9. Ki límite Yehova a pone pa Satanas, i dikon? (Yòb 1:12) (Wak e plachi.)

⁸ Lesa Yòb 1:12. Yehova a duna Satanas un chèns pa mustra si Yòb tabata ègt stima Yehova òf nò. Pero Yehova a pone un límite pa Satanas. El a bisa Satanas bon kla: “No hasi [Yòb] mes daño!” Tur e angelnan presente a skucha loke Yehova a bisa Satanas. Satanas mester a obedesé e mandato di Yehova. Satanas no por a bai mas leu di loke Yehova a permitié hasi; e no por a hasi nada pa kambia esei. Pues, Yehova a usa su poder i outoridat pa protehá Yòb i pa mustra ku e ta un Dios hustu i amoroso. Awe tambe, Satanas no por bai mas leu ku e límite ku Yehova a pone p’e.

⁹ Satanas no a logra su meta. Yòb a keda fiel na Yehova apesar di Satanas su atakenan. (Yòb 1:22) Pero Satanas lo no a entregá asina fásil.

10. Dikon Yehova a permití Satanas bolbe ataká Yòb? (Yòb 2:​2-6)

¹⁰ Lesa Yòb 2:​2-6. E biaha akí, Satanas kier a hasi algu mas kruel ainda ku Yòb. Satanas kier a mustra ku si Yòb su bida tabata na peliger, e ora ei sí lo el a stòp di sirbi Yehova. Pues, pa mustra ku Satanas no tabatin rason, Yehova a permití Satanas hasi Yòb hopi malu. Pero e biaha akí tambe, Yehova a bolbe pone un límite pa Satanas. El a bisa: “No kita su bida!” Satanas no por a mata Yòb pasobra Yehova no a permitié pa hasi esei. Pues, atrobe Yehova a demostrá ku e ta e Gobernante di mas poderoso.

YEHOVA TA PONE UN FIN NA YÒB SU SUFRIMENTU

11. Ora Yehova a pone un fin na Yòb su pruebanan, kon el a bendishoná Yòb? (Yòb 42:​10-13)

¹¹ Lesa Yòb 42:​10-13. Dado momento, tabata bisto ku Yòb lo no a kibra su integridat. Na e momento ei, Yehova no a laga Satanas sigui ataká Yòb, i el a pone un fin na e kosnan ku tabata pone Yòb sufri. Den e kaso akí tambe, Satanas no por a hasi nada pa stroba Yehova di protehá i bendishoná Yòb.

12. Duna un ehèmpel ku ta mustra kon Yehova ta salba su sirbidónan ku ta konfia den dje.

¹² Durante e último dianan, hopi di Yehova su sirbidónan a mira kon Yehova a usa su poder pa yuda nan. Por ehèmpel, na 1945, 230 Testigu di Yehova a sobrebibí un biahe largu i peligroso for di un kampo di konsentrashon na Alemania pa laman. E ofisialnan Nazi tabatin intenshon di mata e rumannan ei. E rumannan a bisa ku nan a sinti meskos ku e tres hebreonan ku a ser salbá for di e fòrnu di kandela. Meskos ku e tres hebreonan, nan no a sufri niun daño. Yehova a duna nan e forsa ku nan tabatin mester i nan fe tabata mas fuerte ku nunka. Nan a bisa tambe ku nan a sinti komo si fuera nan tabata den kueba di leon huntu ku Dánièl. Pero Yehova a salba nan. I djei padilanti, nan a keda determiná pa sirbi Yehova pa semper. I pa nan, no tin un privilegio mas grandi ku esei.—Kompará ku Dánièl 3:27; 6:22.

13. Kiko bo por ta sigur di dje ora bo ta pasa den prueba? (Wak e plachinan.)

¹³ Tin biaha, nos tambe por haña nos ku prueba difísil den bida. (1 Ped. 5:​8-10) Na momentonan asina, nos por sinti nos masha kibrá pasobra ta parse ku no tin fin na nos prueba. Loke por yuda nos ora nos ta sinti asina ta di kòrda e ehèmpel di Yòb. Nos por tin pleno konfiansa ku Yehova lo usa su poder pa kaba ku nos sufrimentu, sea den e sistema akí òf den e mundu nobo. Yehova tin su dia ku lo e kaba ku e mundu malbado akí, i e dia ei lo no kambia!

YEHOVA STIMA SU FIEL SIRBIDÓNAN

14-15. Kiko Yehova ke hasi pa su fiel sirbidónan, i dikon? (Yòb 14:15) (Wak e plachi.)

¹⁴ Lesa Yòb 14:15. Nos Tata selestial ta leal na esnan ku ta leal na dje. E ta stima nan asina tantu ku si nan muri, lo e lanta nan bèk for di morto. Di e manera ei, lo e kita tur e dolónan ku morto ta kousa.—Isa. 65:17.

¹⁵ Aunke ku Dios a pone un fin na Yòb su sufrimentu, Yòb mester a sigui biba den e mundu malbado di Satanas. Apesar di esei, Beibel ta mustra ku Yehova a sòru pa Yòb rekuperá kompletamente di su malesa, i el a bendishoná Yòb rikamente. Yòb a haña hopi mas kos ku e tabatin promé. E bendishonnan ei tabata djis un ñapa di loke Yehova ta bai hasi pa Yòb den futuro. Esei ta mustra ku Yehova semper ke pa su sirbidónan ta felis i pa nan disfrutá di bida. Yehova lo no djis laga su fiel sirbidónan disfrutá di bida pa un tempu so, pero lo e duna nan bida eterno riba tera den paradeis. (Rev. 21:​3, 4) I niun hende no por stroba Yehova di kumpli ku su deseo pasobra e ta e Gobernante Supremo di universo. E bèrdat ei por konsolá nos ora nos ta sufri pa motibu di prueba.

16. Ki otro motibu nos tin pa konfia den Yehova, nos Dios Todopoderoso?

¹⁶ Maske Yòb a biba basta aña, ku tempu el a muri. Pero Yehova e Dios Todopoderoso tin e poder pa lanta Yòb for di morto. (Deu. 32:39) Pues, ora e dia yega pa Yehova resusitá esnan ku e ta stima, nada no por strob’é di hasi esei.—Rom. 8:​38, 39.

KONFIA KOMPLETAMENTE DEN YEHOVA

17. Menshoná algun motibu ku ta mustra ku Satanas no a logra kaba ku Yehova su pueblo.

¹⁷ Loke nos a siña di e relato di Yòb ta duna nos vários motibu pa konfia kompletamente den Yehova. Komo ku Yehova ta e Dios Todopoderoso i e ta protehá su pueblo, Satanas no a logra kaba ku nos. Nos ta yama Yehova danki pa esei. Awe tin nuebe mion sirbidó fiel di Yehova. Ademas, hopi nashon i lider religioso poderoso a purba hopi biaha pa stòp Yehova su sirbidónan di ador’é. Pero nan no a logra pasobra Yehova ta yuda su sirbidónan. (Isa. 54:17) Ademas, nos ta sigui konta hende e bèrdat tokante Yehova i mustra nan ku Satanas ta un gañadó. Ni menasa di morto lo no stòp nos di hasi esei, pasobra nos sa ku asta si nos muri, Yehova lo resusitá esnan ku ta keda fiel na dje.—Osé. 13:14.

18. Dikon nos no mester tin miedu di loke lo pasa den futuro?

¹⁸ Ora nos meditá riba e relato di Yòb, nos ta haña mas konfiansa den Yehova. Nos sa ku lo e yuda nos trata ku kualke situashon ku nos haña nos kuné. P’esei, nos no mester tin miedu di kiko lo pasa den futuro. Durante tribulashon grandi, Satanas i esnan ku ta na su banda lo ataká e pueblo di Dios pasobra nan ta pensa ku nan lo kaba fásilmente ku nan. Pero meskos ku den tempu di Yòb, Yehova lo protehá su pueblo pa Satanas no kaba ku su pueblo. Pronto, Yehova lo kaba ku tur e sufrimentu ku Satanas a kousa. Hesus lo tira Satanas i su demoñonan den un abismo pa 1.000 aña. (Lúk. 8:31; Rev. 20:​1-3) Despues di e 1.000 añanan ei, Satanas i tur esnan ku ta skohe pa su banda lo ser destruí pa semper, manera Yehova a bisa.—Gén. 3:15; Rom. 16:20; Rev. 20:10.

19. Kon Yehova lo bendishoná hende ku ta konfia kompletamente den dje? (Wak e plachi.)

¹⁹ Nos ta masha ansioso pa e mundu nobo. Pasobra e tempu ei nos lo ta perfekto i masha felis. Kasi nos no por imaginá kon bon bida lo ta den futuro. Yehova ta primintí: “Tende! Mi ta traha tur kos nobo.” (Rev. 21:5) Kiko esei ta nifiká? Ku pa promé biaha, desde e hòfi di Éden, Satanas i su demoñonan lo no por hasi hende daño òf influensiá nan pa hasi malu. Esei sí lo ta un gran alivio! Den e mundu nobo nunka mas nos lo no pasa un anochi sin por drumi. Semper nos lo drumi bon pasobra nos lo no tin niun di e preokupashonnan di e mundu akí. I algu masha bunita lo pasa ku hende ku sobrebibí Armagedon: Nan lo kura i haña nan salú bèk. Ademas, por fin nos lo mira nos sernan kerí ku a muri atrobe. E ora ei, nos lo disfrutá di bida manera Yehova tabata ke for di prinsipio.

20. Kiko nos mester sigui hasi den e último dianan akí?

²⁰ Den e último dianan akí, nos lo sigui enfrentá vários prueba i nos mester tin kurashi pa keda fiel na Yehova. Pues, laga nos sigui konfia kompletamente den Yehova i obedes’é pasobra e ta e Gobernante Supremo di universo. Ademas, laga nos sigui mustra nos amor pa Yehova i mustra ku Satanas ta un gañadó. Nos por tin sigur ku si nos keda fiel na Yehova, nos Dios Todopoderoso, nos lo tin un futuro briante bou di su gobernashon. Dikon? Pasobra Yehova ta anhelá pa bendishoná su sirbidónan fiel na un manera maravioso.