Yunan Ta “un Regalo di Yehova”

BEIBEL ta bisa ku yunan ta “un regalo di Yehova.” (Sal. 127:3) Mayornan ku ta stima Yehova ta mira nan yunan komo un regalo presioso ku nan a haña di dje. Nan ta hasi tur loke nan por pa pèrkurá pa nan yunan, pa yuda nan yunan ta salú i felis i pa yuda nan yunan sera un amistat ku Yehova.

Lamentablemente, awendia tin mayornan ku no ta mira nan yunan komo un regalo di Dios. (Isa. 49:15; 2 Tim. 3:1-3) Tin otro mayornan ku sí ke kuida nan yunan bon, pero nan tin hopi difikultat pa hasi esei pasobra nan tin muchu hopi yu. Den e artíkulo akí nos lo bai kontestá e siguiente preguntanan: Dikon algun mayor ta haña hopi yu? Kiko ta e responsabilidatnan ku Yehova ta ferwagt pa mayornan kumpli kuné? Kon mayornan por lanta nan yunan pa nan ta felis?

DIKON ALGUN MAYOR TA HAÑA HOPI YU?

Preshon di famia i di otro hende den komunidat. Den algun parti di mundu, mayornan ku tin hopi yu ta haña mas onor ku mayornan ku no tin hopi yu. Pa e motibu ei, den e komunidatnan ei, parehanan ta haña preshon di nan famianan i bisiñanan pa haña hopi yu. Anto hopi biaha, nan no por kuida tur e yunan ei.
Preokupashon tokante futuro. Na algun pais, hopi bebi ta muri pa motibu di mal nutrishon, malesa i falta di kuido médiko. Na e paisnan ei, mayornan ta purba di haña hopi yu pa al ménos algun di nan sobrebibí pa bira adulto. Otro pareha ta haña hopi yu pa asina e yunan ei por kuida nan ora nan bira bieu. Esei ta pasa hopi na paisnan kaminda gobièrnu no tin areglo pa kuido di hende grandi.
Difikultat pa mantené e famia chikitu. Na algun otro parti di mundu, parehanan tin difikultat pa haña medio antikonseptivo. Otro parehanan sí tin akseso na medio antikonseptivo, pero komo ku e produktonan akí ta di mal kalidat, e parehanan tin miedu ku esakinan lo hasi nan malu. Anto tin otro pareha tambe ku no por kumpra medio antikonseptivo pasobra nan ta muchu karu pa nan.a

KIKO YEHOVA TA FERWAGT DI MAYORNAN?

Un famia ta pasa tempu huntu na un parke. E tata ta skucha su yu muhé tiner ku hopi atenshon. Anto e mama i nan yu hòmber chikitu ta tira bala pa otro. — Pasa tempu ku kada un di bo yunan

Pèrkurá pa e nesesidatnan di bo yunan. Yehova a duna mayornan e responsabilidat pa pèrkurá pa nan yunan menor di edat. E ta ferwagt pa mayornan traha duru pa nan yunan tin kuminda, paña i un lugá di biba. Yehova ta ferwagt tambe pa mayornan eduká nan yunan. P’esei, mayornan ku ta sirbi Yehova lo no manda nan yunan menor di edat bai biba na internat òf un skol leu for di kas. Mas bien, nan ke pa nan yunan keda biba serka nan te ora nan bira grandi, pa asina nan por yuda nan desaroyá abilidat ku por yuda nan despues den bida. Tambe nan ta pasa sufisiente tempu ku kada yu pa asina nan yunan sinti nan protehá i stimá. Ta klaru ku Yehova no ta ferwagt pa mayornan ta riku. Bon mirá, Yehova a skohe mayornan ku tabata traha duru i ku no tabatin hopi sèn pa lanta su Yu stimá.—Mat. 13:55, 56; Lúk. 2:24.

Prinsipio di Beibel: “Un kos ta sigur: Si un hende no ta kuida su famia, spesialmente e hendenan di su kas, el a nenga e fe kristian, i e ta pió ku un persona ku no tin fe den Dios.”—1 Tim. 5:8.

Yehova ta komprondé pa mayornan. E tambe ke pa nan haña e kuido ku nan tin mester ora nan bira grandi. Ta bèrdat ku yunan por onra nan mayornan dor di kuida nan ora nan bira grandi. (Éks. 20:12; 1 Tim. 5:4) Pero, Yehova ke pa mayornan enfoká riba kuida nan yunan na lugá di pensa kon nan yunan por kuida nan.—2 Kor. 12:14.

Siña bo yunan tokante Yehova. Mayornan tin e responsabilidat tambe di yuda nan yunan tin un amistat ku Yehova i di mustra nan kon nan mester adorá Yehova. Pa Yehova, eseinan ta e kosnan mas importante ku mayornan mester siña nan yunan.—Deu. 6:6, 7.

Prinsipio di Beibel: “Ora boso ta lanta boso yunan, korigí nan i siña nan di akuerdo ku e instrukshonnan di Yehova.”—Efe. 6:4.

YEHOVA KE YUDA BO LANTA BO YUNAN PA NAN TA FELIS

Un pareha ta papia abiertamente ku otro. Tin un Beibel habrí riba mesa nan dilanti. — Plania adelantá kuantu yu boso ke haña

Plania pa futuro. Si bo ke haña yu, pensa riba bo sirkunstansianan promé. Por ehèmpel, bo tin sufisiente sèn pa kada yu haña sufisiente kuminda, paña i e edukashon ku e tin mester? Si no ta asina, papia ku bo kasá tokante e asuntu. Wak si boso lo mester tene boso famia chikitu pa asina boso por kuida kada yu manera Yehova ta ferwagt. Klaru ku Yehova sa ku no ta tur biaha kos ta bai manera nos a plania. (Ekl. 9:11) Pero boso por tin sigur ku lo e bendishoná boso esfuersonan di ta bon mayor.

Prinsipio di Beibel: “No tin duda: Plan di hende diligente ta duna bon resultado; di otro banda, hende ku ta hasi kos anshá ta kai den pobresa.”—Pro. 21:5.

“Suponé ku boso ke traha un toren. Boso lo no sinta kalkulá e gastunan promé pa wak si boso tin sufisiente plaka pa kab’é?”—Lúk. 14:28.

Pone Yehova na promé lugá den boso famia. Sirbi Yehova mester ta e kos di mas importante den boso famia. Si bo tin yu kaba, hasi bo bèst pa siña nan stima Yehova. Yuda nan pa presta bon atenshon na e reunionnan. Ademas, tene boso adorashon komo famia tur siman. Siña bo yunan tambe kon pa prediká. No pensa ku ta bo yunan mas grandi, bo famianan òf otro hende mester karga e responsabilidatnan ei. Ta bo mes tin ku kumpli ku nan. Pa lanta bo yunan bon i siña nan stima Yehova ta rekerí tempu i esfuerso. Pero, e esfuersonan ei lo ta bale la pena.

Prinsipio di Beibel: “No tin nada ku ta hasi mi mas kontentu ku tende ku mi yunan ta sigui kana den e bèrdat.”—3 Huan 4.b

Konfia den Yehova. Sea ku bo ta pensando pa haña yu òf bo tin yu kaba, tin algu importante ku bo tin ku kòrda tokante lanta yu. Kòrda ku e prinsipionan di Yehova ta mas importante ku e kustumbernan di e lugá kaminda bo ta biba.

Kolekshon di plachi: 1. Un tata i un mama ta sinta huntu ku nan yu hòmber chikitu na reunion. E yu hòmber ta hisa su man pa duna komentario. 2. Un famia ta traha huntu den sirbishi. E tata ta traha huntu ku su yu muhé tiner i e mama ta traha huntu ku e dos yunan mas yòn. — Ta tuma tempu i esfuerso pa siña bo yunan kon pa adorá Yehova i kon pa hasié kontentu

Kisas kaminda bo ta biba, hende ta djis haña yu pa asina nan yunan por kuida nan ora nan bira grandi. No pensa ku bo tambe tin ku hasi esei. Bo por konfia ku Yehova lo pèrkurá pa bo ora bo bira grandi, asta si bo no haña hopi yu. Yehova nunka lo bandoná bo, pasobra el a primintí ku lo e kuida bo i semper e ta kumpli ku su promesanan.—Hos. 23:14.

Prinsipio di Beibel: “Konfia den Yehova ku henter bo kurason, i no bai tras di bo mes sabiduria. Kòrda riba Dios den tur loke bo ta hasi, i lo e yuda bo tin éksito den bida.”—Pro. 3:5, 6.

“Un tempu mi tabata hóben, i awor mi ta bieu, pero nunka mi no a mira un hende hustu desampará ni su yunan ta kana pidi pan.”—Sal. 37:25.

“Sigui buska promé e Reino i hustisia di Dios, i boso lo haña tur e kosnan akí.”—Mat. 6:33.

Yunan ta un regalo presioso ku Yehova a konfia mayornan kuné. Anto Yehova mester ta masha kontentu mes ora e mira ku su sirbidónan ta kuida nan yunan bon. Mayornan ku ta sirbi Yehova ta haña mas importante pa kumpli ku loke Yehova ta ferwagt di nan ku sigui e kustumbernan kaminda nan ta biba. P’esei nan ta pensa bon i plania kuantu yu nan lo ke haña. Di e manera ei, nan ta hasi sigur ku nan por pèrkurá pa kada yu, pa e yunan ta felis i pa nan stima Yehova. Ora mayornan hasi eseinan, nan ta mustra ku di bèrdat nan yunan ta un regalo di Dios.

Nan Ta Kontentu ku Nan Desishon

Ora mayornan skohe pa no haña hopi yu, esaki ta duna nan mas difikultat den bida? Hopi mayor ku ta biba den áreanan ku tin pobresa ta hasi nan mes e pregunta ei. Ban wak kiko algun kabes di famia ku ta biba den e áreanan ei a bisa tokante esaki.

Otro hende a preshoná bo pa haña hopi yu?

“Sí, asta algun ruman den kongregashon. Un pareha a puntra nos: ‘Dikon boso tin un yu hòmber so? Aki na Afrika, ora bo tin un yu so, ta manera bo no tin yu. Anto si bo tin dos yu, ta meskos ku bo tin un so.’ Asta despues ku nos a haña nos yu muhé, algun hende a sigui pone preshon riba nos.”—Jeremias

Bo a haña bo ku difikultat den bida pasobra bo no tin hopi yu?

“Nò, nèt kontrali. Komo ku ami ku mi kasá a skohe pa no haña hopi yu, nos por a hasi sigur ku tur hende den famia tabatin loke nan mester. I mas importante ainda, nos a sòru pa nos tur por tin un bon amistat ku Yehova. Mi a lanta den un famia grandi, i mi a mira kuantu difikultat mi mayornan a pasa aden pa pèrkurá tur loke nos tabatin mester i pa haña bon edukashon.”—Jeremias

Kiko boso yunan ta pensa tokante boso desishon di no haña hopi yu?

“Nos dos yunan ta kontentu pasobra nan no a haña nan ku e difikultatnan ku otro yunan ku a lanta den famia grandi a haña nan kuné. Hopi biaha, den famia grandi, mayornan no por kuida nan yunan manera mester ta.”—Filipe

“Nos yunan tabata kontentu pasobra nan a lanta den un famia kaminda nan a sinti nan protehá i stimá. Hopi biaha, nos tabata invitá rumannan ku tabata bon ehèmpel na kas. Nan tabata animá nos pa pone meta spiritual. Awe nos ta wak ku esei tabata bale la pena, pasobra nos yunan ta sigui nan bon ehèmpel.”—Carlos

Kon boso a benefisiá di boso desishon di no haña hopi yu?

“Komo ku nos a disidí pa no haña hopi yu, tabata mas fásil pa nos pèrkurá pa nos famia. Mi tabatin un trabou ku tabata paga bon, pero tres aña pasá mi a pèrdè e trabou ei. Komo ku nos famia no ta grandi, nos no tabatin hopi gastu. P’esei tabata mas fásil pa nos trata ku e kambio ei.”—Jeremias

“Komo ku nos famia ta chikitu, ta mas fásil pa nos pèrkurá pa nos famia den sentido spiritual i material. Nos por a asta bai prediká na lugá kaminda tin nesesidat di mas publikadó. Komo ku nos no tin hopi yu, ta mas fásil pa pasa tempu ku kada un di nan. Tur nos yunan ta sirbi Yehova i a pone meta pa hasi mas den sirbishi pa Yehova.”—Lenadi

Kiko lo bo ke bisa otro mayornan?

“Mi a mira ku mi mes wowonan ku e palabranan na Salmo 34:10b ta bèrdat. E ta bisa: ‘Hende ku ta buska Yehova lo no falta nada ku ta bon.’ Yehova a duna ami i mi famia tur loke nos tin mester.”—Rafael

a Kada pareha mester disidí kuantu yu nan ke, na ki momento nan lo haña nan, i si nan ke usa un medio antikonseptivo, basta e no ta kousa aborto. Niun hende mester husga e pareha pa nan desishon. (Rom. 14:4, 10-13) Ademas, ora parehanan kasá tuma desishonnan asina, nan mester kòrda loke 1 Korintionan 7:3-5 ta bisa.

b Den e versíkulo akí “yunan” ta referí na e disipelnan ku Huan a siña e bèrdat. Mayornan tambe ta sinti meskos ku Huan ora nan mira nan yunan sirbi Yehova.