Bo Ta Prepará pa Situashon Difísil Ku Por Presentá Despues di Bo Boutismo?

1-2. Kiko nos por hasi pa nos ta prepará pa e difikultatnan ku nos haña nos kuné den e bèrdat? Ilustrá esei.

NOS por ferwagt problema den e mundu di Satanas akí. Hesus a spièrta su siguidónan: “Ta inevitabel ku hende ta haña nan ku opstákulo.” (Mat. 18:7) Ku e spièrtamentu ei na mente, nos mester prepará nos mes pa trata ku kualke difikultat. Un di e difikultatnan ei por ta problema ku nos rumannan spiritual.

² Pensa riba e siguiente ilustrashon. Yehova su pueblo ta ser animá pa nan ta prepará pa ora desaster natural tuma lugá. Kon nos ta prepará? Na promé lugá, nos mester sa ki tipo di desaster por tuma lugá den nos área. Ta hopi importante pa nos sa esei, spesialmente si nos ta nobo den e área ei. Unabes ku nos sa ki desaster nos por haña nos kuné, nos mester tin un plan pa ta prepará pa kada un di nan. (Pro. 21:5) Di mes manera, nos mester sa ki tipo di difikultat nos por haña nos kuné den e bèrdat. Ora nos sa esei, nos por ta bon prepará for di awor pa, si nan presentá, nos por sa kiko pa hasi. Di e manera ei, nos por trata mas mihó ku e difikultatnan ku presentá i nos lo keda serka di Yehova. (Sal. 17:5) P’esei, laga nos trata tres difikultat ku nos por haña nos kuné i mira kon nos por prepará pa kada un di nan.a

ORA UN RUMAN TRATA BO MALU

3. Ki difikultat nos por haña nos kuné den e kongregashon?

³ Bo ta kòrda kon bo a sinti e promé biaha ku bo a bai un reunion di Testigunan di Yehova i bo a mira e amor entre e rumannan? Kisas esei a konvensé bo ku bo a haña e bèrdat. (Huan 13:35; Kol. 3:12) Esei ta loke Blancab tambe a sinti. Sinembargo, despues ku el a boutisá, el a eksperensiá algu ku e no a ferwagt. El a bisa: “Un ruman muhé a trata mi malu. Mi a ripará tambe ku e tabata papia malu di otro ruman. Mi no a spera esaki. Mi a siña ku Testigunan di Yehova ta hende amoroso ku ta hasi esfuerso pa ta na pas ku otro hende.” Ta bèrdat ku bo rumannan ta hasi esfuerso pa imitá Yehova su kualidatnan, pero nan no ta perfekto. (Efe. 4:​23, 24; 1 Huan 1:8) P’esei, por sosodé ku un di nan ta bisa òf hasi algu ku por hasi bo doló. (Sant. 3:8) Lamentablemente, e difikultatnan ei a pone ku algun ruman a stòp di sirbi Yehova.

4. Kon bo por prepará bo mes den kaso ku un ruman trata bo malu? (Efesionan 4:32)

⁴ Kon bo por prepará awor, pa si un ruman trata bo malu despues di bo boutismo? Bo por hasié un kustumber pa hasi loke Beibel ta bisa na Efesionan 4:32. (Lesa.) Bo por evitá konflikto innesesario ku otro ruman, si bo hasi esfuerso pa ta bondadoso i kompasivo ku bo rumannan. Ademas, bo por prepará bo mes pa semper ta kla pa pordoná bo rumannan ora nan faya ku bo. Kiko por yuda bo pordoná? Pensa riba tur e biahanan ku bo a pidi Yehova pordoná bo i kon semper el a hasi esei. (Mat. 6:12) Ora bo meditá riba tur e biahanan ku Yehova a pordoná bo, lo bo ta gradisidu pa su pordon; esei lo hasié mas fásil pa bo pordoná bo rumannan.

5. Ki prinsipio di Beibel por yuda nos si un ruman trata nos malu? (Proverbionan 19:11) (Wak e plachinan.)

⁵ Lesa Proverbionan 19:11. E teksto ta menshoná ku ora un hende ofendé nos, perspikasiac lo yuda nos pa nos no rabia lihé. E prinsipio di Beibel akí a yuda Rima, kende tin algun aña boutisá. El a bisa: “Ora un ruman bisa òf hasi algu ku ta hasi mi doló, mi ta pensa mesora riba Proverbionan 19:11. Mi ta pensa riba e kosnan ku nan a pasa aden den pasado i tambe riba kiko nan lo ta pasando aden aworakí. Di e manera ei mi ta purba na komprondé dikon nan a hasi loke nan a hasi. Ademas, mi ta purba di traha ku nan den sirbishi. Hasiendo esei mi a siña konosé nan mihó.” Esei sí ta un bon konseho. Ta bon pa bo siña konosé bo rumannan for di awor. Mas bo siña konosé nan, mas fásil lo bira pa bo komprondé nan i pordoná nan si akaso nan trata bo malu.

6. Kiko por yuda nos tin bon amigunan den e kongregashon?

⁶ Kiko nos por hasi pa nos por tin bon amigunan den e kongregashon? Segun ku bo ta siña konosé bo rumannan, hasi esfuerso pa enfoká riba nan bon kualidatnan. (Kompará ku Proverbionan 10:12; Rom. 12:10; Flp. 2:​2, 3) Wak loke a pasa ku un ruman ku yama Mark. Komo ku el a kuminsá pasa mas tantu tempu ku e rumannan den su kongregashon despues ku el a boutisá, el a kuminsá ripará nan imperfekshonnan mas ainda. Kiko a yuda Mark pa no laga e fayonan di su rumannan pon’é trompeká? El a bisa: “Mi a realisá ku e fayonan di mi rumannan tabata hopi chikitu na komparashon ku e pikánan grave ku hende ku no ta sirbi Yehova ta kometé. Pues, m’a disidí pa no keda enfoká riba e fayonan chikitu di mi rumannan. Mi a kuminsá enfoká riba nan bon kualidatnan.” Si bo hasi meskos ku Mark, lo bo tin bon amigunan den e kongregashon.

ORA BO KUMINSÁ SINTI FALTA DI E KOSNAN KU BO A LAGA ATRAS

7. Kiko por pone nos kuminsá sinti falta di loke nos a laga atras?

⁷ Sin duda ora bo a siña konosé e bèrdat, bo tabata masha kontentu di a bandoná e mundu malbado di Satanas. Kisas bo ta puntra: ‘Ta ken lo tin gana di bai bèk?’ Pero, ora bo haña bo ku pruebanan difísil, bo por kuminsá kòrda i asta deseá e kosnan ku bo a laga atras pa por sirbi Yehova. (Kompará ku Numbernan 11:​4-6.) Por ehèmpel, algun ruman kisas a bandoná trabou ku tabata duna nan fama pero ku tabata kita hopi tempu for di nan. Otro rumannan tabatin amigunan ku tabata bon ku nan, pero ku a bandoná nan ora nan a kuminsá studia Beibel. Tin otro ruman ku a lucha pa vense adikshon ku nan tabata disfrutá di dje pero ku tabata malu den bista di Yehova. Imaginá bo kon tristu Yehova lo bira si nos laga kualke kos di pasado pone nos bandon’é! Kon bo por prepará for di awor pa, maske kiko bo haña bo kuné, nunka bo bai bèk na e kosnan ku bo a laga atras?

8. Kiko nos por siña for di e ehèmpel di Ábraham ku Sara?

⁸ Beibel tin vários ehèmpel di fiel sirbidó di Yehova ku por a kuminsá sinti falta di loke nan a laga atras. Por ehèmpel, Ábraham ku Sara a obedesé Yehova i nan a bai laga Ur, un stat bunita i bon protehá, pa biba den tènt. (Heb. 11:​8, 9) Ta klaru ku, ratu ratu nan por a pensa riba e komodidatnan ku nan a laga atras na Ur. Pero “si nan a keda pensa riba e lugá for di unda nan a sali” òf a anhelá loke nan a laga atras, nan lo por a haña gana di bai bèk. Na lugá di esei, nan a keda pensa riba e kosnan bon ku Yehova a primintí di duna nan den futuro.—Heb. 11:​15, 16.

9. Kiko Pablo a pensa di e kosnan ku el a laga atras? (Filipensenan 3:​7, 8, 13)

⁹ Apòstel Pablo tambe a hasi algun kambio pa e por a sirbi Yehova na e manera korekto. Promé ku el a bira kristian, el a siña lei hudiu for di Gamaliel, un maestro masha respetá. (Echo. 22:3) Pablo tabata riba kaminda pa bira un lider religioso hudiu masha importante. (Gal. 1:​13, 14) Sinembargo, ora el a aseptá e bon notisia tokante Kristu, el a laga tur e kosnan ei atras. Awor, su bida komo kristian tabata fásil? Nò. Nan a batié, hink’é den prizòn i su mes hendenan tabata odi’é. (2 Kor. 11:​23-26) Si el a pasa hopi tempu ta pensa riba e difikultatnan ku e tabata enfrentando i kompará su bida komo kristian ku su bida anterior, lo e por a pensa ku su desishon pa sigui Hesus no tabata e mihó desishon. Pero, Pablo no a hasi esei. Mas bien, ku e speransa di risibí un maravioso rekompensa den futuro, el a enfoká riba e gran privilegio ku e tabatin di sigui Hesukristu. Pablo tabata konvensí ku e bendishonnan ku el a haña tabata mas grandi ku kualke sakrifisio ku el a hasi.—Lesa Filipensenan 3:​7, 8, 13.

10. Riba kiko nos mester pensa regularmente? (Marko 10:​29, 30) (Wak e plachinan.)

¹⁰ Kiko ta e lès? Ora bo kuminsá pensa riba e kosnan ku bo a laga atras pa por a bira un kristian, no lubidá di pensa tambe dikon bo a laga nan atras. (Ekl. 7:10) Kompará loke bo a laga atras ku e bendishonnan ku bo a risibí pasobra bo a bini den e bèrdat. Por ehèmpel, bo tin un amistat será ku e Persona di mas importante den universo. (Pro. 3:32) Na unda ku bo bai, bo tin un famia spiritual ku stima bo. (Lesa Marko 10:​29, 30.) I bo tin un futuro maravioso bo dilanti! (Isa. 65:​21-23) Si bo pensa regularmente riba e bendishonnan ku sirbi Yehova ta trese kuné, tin ménos chèns ku lo bo sinti falta di e kosnan ku bo a laga atras.

11. Kiko bo a siña for di e eksperensia di Rosemary?

¹¹ Un ruman ku yama Rosemary a boutisá tempu ku e tabatin 50 i piku aña. Laga nos wak kiko a yud’é pa no keda deseá e kosnan ku el a laga atras. El a bisa: “Na promé instante, mi tabata sinti falta di e selebrashon di Pasku di Nasementu, pasobra e tabata un okashon ku nos tabata pasa dushi huntu komo famia. Mi tabata gusta duna mi famianan stimá regalo. Ademas, mi tabata gusta mira e muchanan rònt di e kerstboom ta habri nan regalonan i mira kon nan wowonan tabata bria.” Kiko a yuda ruman Rosemary? El a bisa: “Mi a haña un manera pa remplasá Pasku. Tur aña, riba un otro dia, mi ta invitá mi famianan, duna nan regalo i bisa nan dikon mi ta stima nan.” Rosemary a hañ’é ku un difikultat mas. El a bisa: “Ora mi a haña e bèrdat, mi amigunan a bandoná mi. Tin biaha, mi tabata sinti nan falta i tabata sinti mi mi so.”d Kiko a yud’é? El a kuminsá invitá diferente ruman muhé pa bai prediká huntu kuné. Anto el a bisa: “Ora mi a hasi esei, mi a haña hopi amigu ku mi ta stima i balorá.” Kiko bo por siña for di Rosemary? Kisas bo por sinti falta di algu ku tabata hasi bo kontentu promé ku bo a haña e bèrdat. Pero, bo por remplasá loke bo ta sinti falta di dje ku algu otro ku ta bon i ku ta hasi bo felis di bèrdat. (Flp. 4:​8, 9) I kòrda: Loke Yehova ta duna bo ta muchu mas ku loke bo a laga atras.

ORA OTRO HENDE STÒP DI SIRBI YEHOVA

12. Ki situashon den kongregashon por ta difísil pa dil kuné?

¹² Ora ku bo a bira Testigu, probablemente bo tabata kontentu di a bandoná e mundu malbado akí i uni ku hende ku ta hasi esfuerso pa hasi loke ta korekto. (Isa. 65:14) Pero, tin biaha, un persona den kongregashon por kometé un piká serio. Si e persona ei no arepentí, lo e por asta ser saká for di e kongregashon. (1 Kor. 5:13) Wak kon un situashon asina a afektá un ruman muhé ku yama Samar. El a bisa: “Poko tempu despues ku m’a boutisá, un ansiano a kometé un piká serio i el a ser saká for di e kongregashon. Kasi m’a pèrdè mi fe. Mi no por a kere ku un ansiano por a faya ku Yehova i hùrt e rumannan den kongregashon.” Ta klaru ku semper nos mester konfia ku nos rumannan ta stima Yehova i ke pega na dje. (1 Kor. 13:​4, 7) Pero lamentablemente, tur aña tin algun hende ku ta ser saká for di e kongregashon. I e situashon por ta mas difísil ainda si ta un amigu, famia òf un ruman ku bo tabata respetá skohe pa bandoná Yehova.

13. Kon nos por fortalesé nos amistat ku Yehova for di awor pa nos no pèrdè nos fe si un persona yegá na nos stòp di sirbi Yehova?

¹³ Kon bo por prepará bo mes for di awor pa bo no pèrdè bo fe si un persona yegá na bo stòp di sirbi Yehova? Sigui hasi bo amistat ku Yehova mas fuerte. (Sant. 4:8) No laga loke otro hende ta hasi influensiá bo amistat ku Yehova. Kòrda ku aunke nos ta adorá Yehova huntu komo famia i komo kongregashon, nos tambe mester tin nos mes programa personal pa lesa Beibel i hasi orashon regularmente.—Sal. 1:2; 62:8.

14. Kiko nos ta siña for di e ehèmpel di Apòstel Pedro? (Huan 6:​66-68)

¹⁴ Nos por siña un lès tambe for di e manera ku Apòstel Pedro a reakshoná ora ku hopi disipel a stòp di sigui Hesus. Kisas Pedro tambe tabata un poko konfundí e tempu ei. Pero wak kiko el a bisa segun Huan 6:​66-68. (Lesa.) Na lugá di enfoká riba loke e otro disipelnan tabata hasiendo, Pedro a enfoká riba e bèrdatnan ku Hesus a siñ’é. P’esei, Pedro no a pèrdè su fe. Di mes manera, asta si otro hende stòp di sirbi Yehova, esei no ta kambia e bèrdatnan presioso ku bo a siña den e organisashon di Dios. Pues, pega na e bèrdatnan ei! Samar, kende a ser menshoná anteriormente, a bisa: “Semper mi ta rekordá mi mes ku no ta pasobra un persona a hasi algu malu esei ta nifiká ku tur hende den kongregashon ta hasi kos malu òf ku e organisashon no ta siñando hende e bèrdat. I sin importá kiko hende hasi, Yehova ta keda un Dios maravioso.”

15. Kiko bo ta siña for di e eksperensia di Emily?

¹⁵ Laga nos wak loke a pasa ku Emily. Nèt un siman despues ku Emily a boutisá, su mama a bai laga su famia i el a ser saká for di e kongregashon. Emily a bisa: “Nunka mi por a imaginá ku e kos akí lo a pasa. Esaki ta e kos di mas duru ku m’a yega di pasa aden. I mi ta sinti hopi falta di mi mama.” Kiko a yuda Emily? El a bisa: “Mi no ta mi so. Mi tin apoyo di mi tata i tambe di mi rumannan den kongregashon, ku ta manera un famia pa mi. Tur hende tin nan problemanan. P’esei ta importante pa nos ta será ku nos rumannan i pa nos animá otro.” (1 Ped. 5:9) Bo no tin ku warda te ora ku bo haña bo ku un problema pa e ora ei bo bira bon amigu di bo rumannan. Traha riba bo amistat ku bo rumannan for di awor. Di e manera ei, sin importá kiko pasa, bo rumannan lo t’ei pa bo.

16. Kiko nos mester keda kòrda? (Wak e plachi.)

¹⁶ Kòrda tambe ku Yehova ta korigí su sirbidónan pasobra e ta stima nan. (Heb. 12:6) E ke pa tur hende ku a ser saká for di e kongregashon bolbe bèk serka dje. (2 Ped. 3:9) Pues, si un persona yegá na bo a ser saká for di e kongregashon, bo por ta sigur ku e ansianonan lo hasi tur loke nan por pa yud’é drecha su amistat ku Yehova.—2 Tim. 2:​24, 25.

17. Kiko nos por ta sigur di dje?

¹⁷ Nos a trata djis algun di e difikultatnan ku lo bo por haña bo kuné despues ku bo boutisá. Ta bèrdat ku algun di e difikultatnan ei por ta hopi difísil pa trata kuné, pero bo no mester tin miedu. Bo por hasi hopi kos pa prepará bo mes. I semper kòrda ku Yehova lo yuda bo keda fiel na dje. E ta e mihó Persona ku por yuda bo. El a yuda bo kaba, i e ke sigui yuda bo pa semper! (1 Ped. 5:10) Semper lo e duna bo forsa i e perseveransia ku bo tin mester pa trata ku kualke prueba. Si bo sigui aseptá Yehova su yudansa, lo bo keda serka di dje pa semper, apesar di kualke problema ku bo haña bo kuné!—Sal. 119:165; Rom. 8:​38, 39.