Pregunta di Lektor

Na ki tempu e nashonnan lo proklamá “pas i siguridat”?

Den e artíkulo “Pregunta di Lektor” ku a sali resientemente den E Toren di Vigilansia,a nos a trata ku pronto Yehova ta bai hinka “su propósito” den kurason di e “dies kachunan” (tur e gobièrnunan). Su propósito ta pa nan duna nan poder i outoridat na e “bestia salbahe koló kòrá bibu,” esta, Nashonnan Uní. E bestia akí ta ser yamá tambe “imágen di e bestia salbahe.” (Rev. 13:​14, 15; 17:​3, 16, 17) Despues, e “dies kachunan” i e bestia salbahe ku e tempu ei lo tin mas poder lo kaba ku religion falsu rònt mundu. Awor, e nashonnan lo proklamá “pas i siguridat”b promé òf despues ku religion falsu ser destruí?—1 Tes. 5:3.

Nos no tin sigur ki ora presis e proklamashon di “pas i siguridat” lo tuma lugá. Si nos tabata sa tur detaye di kiko lo tuma lugá, nos lo no mester a “keda alerta” manera Hesus a bisa su siguidónan. (Mat. 24:42; 25:13; 26:41) Awor, laga nos ban analisá e profesia ku Apòstel Pablo a skirbi den su karta pa e tesalonisensenan.

Pablo a skirbi: “Ora hende ta bisa: ‘Tin pas i siguridat!,’ e ora ei, nan lo ser destruí. E destrukshon ei lo bini diripiente riba nan.” (1 Tes. 5:​2, 3) Nos publikashonnan a yega di duna e siguiente splikashon pa loke Pablo a bisa: Lo hasi e proklamashon di “pas i siguridat” nèt promé ku tribulashon grandi kuminsá. Tribulashon grandi lo kuminsá ku destrukshon di Babilonia e Grandi, e imperio mundial di religion falsu. Nos a yega di bisa tambe ku e proklamashon akí ta e señal ku tribulashon grandi a kuminsá.

Pero, despues di a studia e punto akí mas profundo, ta parse ku tin un otro posibilidat mas ku nos no por laga afó. Kisas e proklamashon di “pas i siguridat” lo ser hasí despues ku religion falsu ser destruí. Dikon nos ta bisa asina? Ban trata e siguiente preguntanan.

Kon religion falsu ta enbolbí den e gueranan aki riba tera? Beibel ta bisa: “Den e stat akí [Babilonia e Grandi, “e prostituta bon konosí”], a haña sanger . . . di tur hende ku a ser matá riba tera.” (Rev. 17:​1, 5; 18:24) Atraves di historia, religion falsu a apoyá guera i asta tabata responsabel pa morto di hopi hende. Pues, en bes di promové “pas i siguridat,” e ta promové guera i violensia. Pensando riba esei, tin un posibilidat ku e nashonnan mester destruí Babilonia e Grandi promé i ku ta despues nan lo proklamá “pas i siguridat.”

Kiko lo pasa despues di e proklamashon di “pas i siguridat”? Pablo a bisa: “E destrukshon ei lo bini diripiente riba nan.” (1 Tes. 5:3) Si e nashonnan proklamá “pas i siguridat” promé ku religion falsu ser destruí, esei ta nifiká ku un poko tempu mester pasa promé ku nan mes ser destruí. Pero Pablo ta bisa ku despues di e proklamashon nan lo ser destruí diripiente. Pues, ku esei na mente, ta posibel ku e nashonnan lo proklamá “pas i siguridat” despues ku nan destruí religion falsu.

Kon Yehova su pueblo lo reakshoná ora e kosnan akí pasa? Pablo a bisa: “Boso, Rumannan, no ta den skuridat. Pues, e dia ei no mester kohe boso di sorpresa manera lus di dia ta kohe ladron di sorpresa.” (1 Tes. 5:4) Kiko nos lo por komprondé di e teksto? Si e nashonnan proklamá “pas i siguridat” despues di destrukshon di religion falsu, e ora ei, Yehova su pueblo lo sa ku e nashonnan lo ser destruí pronto. Pero di otro banda, e nashonnan, ku a kaba di hasi e proklamashon, lo pensa ku di bèrdat tin “pas i siguridat” i nan lo no ferwagt di ser destruí. P’esei, pa nan, nan destrukshon lo bini di sorpresa.

Un kos nos sa sigur ta ku den futuro serkano, “e dies kachunan” i e bestia salbahe ku a haña mas poder lo destruí religion falsu. Esei lo ta kuminsamentu di e tribulashon grandi. Nos sa tambe ku, na dado momento, e nashonnan lo proklamá “pas i siguridat.” Pero na ki tempu esei lo tuma lugá? Nos a trata dos posibilidat. E promé posibilidat: E nashonnan lo hasi e proklamashon akí promé ku destrukshon di religion falsu. E di dos posibilidat: E proklamashon lo tuma lugá despues ku e nashonnan destruí religion falsu kompletamente. Ta di warda i wak kiko lo pasa presis. Hopi biaha, nos ta komprondé profesia di Beibel ora nan ta bezig ta kumpli òf despues ku nan a kaba di kumpli.—Kompará ku Huan 12:16.

Na final di kuenta, loke ta mas importante no ta e momento ku e proklamashon di “pas i siguridat” tuma lugá, sino, ku nos ta sigui sirbi Dios fielmente. Nos mester “keda lantá i mantené nos sano huisio.” Di e manera ei, sin importá den ki sekuensia e profesianan kumpli, nos lo ta bon prepará.—1 Tes. 5:6.