Imitá Yehova Su Humildat

1. Dikon Yehova su humildat ta impreshoná bo?

SI BO pensa riba e gobernantenan di awe, bo ta haña ku nan ta humilde? Probablemente lo bo bisa ku nò. Pero, Yehova, kende ta e Dios Todopoderoso, sí ta humilde. (Sal. 113:​5-8) No tin niun persona mas humilde ku Yehova, i nunka lo e hasi algu arogante. Den e artíkulo akí, nos lo wak kuater aspekto di Yehova su bunita personalidat, i kon kada un di nan ta mustra ku e ta humilde. Tambe nos lo wak kon Hesus a imitá Yehova su humildat. Ora nos analisá e puntonan akí, nan lo yuda nos hala mas serka Yehova i lo yuda nos ta mas humilde meskos kuné.

YEHOVA KE PA NOS BINI SERKA DJE

2. Kiko Salmo 62:8 ta siña nos di Yehova? (Wak e plachi.)

² No ta semper fásil pa papia ku hende arogante. Hende arogante hopi biaha ta trata otro hende malu pasobra nan ta pensa ku nan ta mihó ku nan. P’esei hende ta purba di evitá nan. Pero, Yehova sí no ta asina. Yehova ta humilde, i e ta invitá nos pa papia kuné tokante tur nos preokupashonnan. (Lesa Salmo 62:8.) Meskos ku un tata amoroso ta kla pa skucha loke ta preokupá su yu, Yehova ta kla pa skucha e orashonnan di su sirbidónan. Yehova a asta laga skirbi vários di e orashonnan akí den Beibel. (Hos. 10:​12-14; 1 Sám. 1:​10-18) Kisas tin biaha nos ta sinti ku ta difísil pa papia ku Yehova pa motibu di e fayonan ku nos a kometé. Kiko por yuda nos?

3. Kon nos sa ku Yehova ke pa nos hasi orashon regularmente asta si ta difísil pa hasi esei?

³ Asta ora nos ta sinti ku ta difísil pa hasi orashon, ta importante pa hasi esei, manera e ilustrashon di e yu pèrdí ta mustra. Den e ilustrashon, Hesus a kompará Yehova ku un tata amoroso. Su yu a hasi vários fayo, i e tabata sinti ku su tata lo no asept’é bèk. Kon e tata a reakshoná ora e yu a bini bèk? Hesus a bisa ku ora e tata a mira e yu ta bini, mesora el a “kore bai serka dje, bras’é i sunch’e tiernamente.” (Lúk. 15:​17-20) Asina tambe Yehova ta trata ku su sirbidónan ku tin kurason kibrá pa motibu di piká ku nan a kometé òf debí na preokupashon. Ora nan hasi orashon na Yehova, su humildat ta motiv’é pa skucha nan mesora. (Lam. 3:​19, 20) Komo ku e ta sinti pa nan, ta komo si fuera e ta kore bai serka nan, pa konsolá nan i pa yuda nan komprondé ku e ta stima nan. (Isa. 57:15) Hopi biaha e ta usa e ansianonan, nos famianan ku ta den e bèrdat i nos rumannan pa konsolá nos. (Sant. 5:​14, 15) Yehova ke pa nos papia kuné den orashon, pasobra e ke pa nos tin un amistat será kuné.

4. Dikon hende a sinti nan mes kómodo pa bai serka Hesus?

⁴ Hesus ta imitá su Tata. Hesus ta humilde, meskos ku su Tata. P’esei, tempu ku e tabata riba tera, hende a sinti nan mes kómodo pa bai serka dje. Nan no tabatin miedu pa hasié pregunta. (Mar. 4:​10, 11) Ora el a puntra nan opinion, nan a sinti nan mes liber pa bis’é kiko nan tabata pensa. (Mat. 16:​13-16) I ora nan a hasi algu robes, nan no tabatin miedu ku Hesus lo a rabia ku nan, pasobra nan tabata sa ku Hesus tabata amabel, miserikòrdioso i ku e tabatin pasenshi ku nan. (Mat. 17:​24-27) Dor ku Hesus a imitá su Tata, su sirbidónan por a siña konosé Yehova mihó. (Huan 14:9) Hesus a yuda nan mira ku Yehova ta humilde i ku e ke pa hende bini serka dje. Yehova no tabata niun tiki manera e lidernan religioso ku tabata kruel i arogante.

5. Dikon ta mas fásil pa otro hende aserká nos ora nos ta humilde?

⁵ Kon nos por imitá Yehova? Mas humilde nos bira, mas fásil ta pa hende bini serka nos, pasobra humildat ta yuda nos pa ta amoroso, pa nos tin pasenshi ku otro hende i pa nos ta kla pa pordoná. (Kol. 3:​12-14) Pero si nos no ta humilde, nos por kuminsá envidiá otro hende, sinti ku nos ta mihó ku nan òf keda sin pordoná otro hende. I esei ta stroba hende di bini serka nos. Foral ansianonan mester hasi esfuerso pa yuda e rumannan den kongregashon sinti nan kómodo pa aserká nan. P’esei, ansianonan mester pasa mas tantu tempu posibel ku e rumannan. Pues, nan lo hasi esfuerso pa bai e reunionnan en persona, en bes di wak e reunionnan online. I nan lo hasi esfuerso tambe pa prediká di kas pa kas ku e ruman hòmbernan i e ruman muhénan di nan kongregashon. Ora nan hasi esei, e rumannan lo siña konosé nan mihó i e rumannan lo sinti nan mas kómodo pa papia ku nan ora nan mester di yudansa.

YEHOVA TA RASONABEL

6-7. Menshoná algun ehèmpel ku ta mustra ku Yehova ta dispuesto pa tene kuenta ku e petishonnan di su sirbidónan.

⁶ Hopi biaha, hende orguyoso ta keda para riba nan opinion pasobra nan ta pensa ku nan sa mihó ku otro hende. Pero Yehova sí no ta asina; komo ku e ta humilde, e ta rasonabel. Yehova semper sa kiko ta mihó, tòg e ta skucha i tene kuenta ku loke otro hende ta bisa, i e ta dispuesto pa asta kambia di idea. Pensa por ehèmpel kon el a trata ku Míriam, e ruman muhé di Moises. Imaginá bo, Míriam i Áròn a kritiká Moises, e representante di Yehova. Bon mirá, ta Yehova Míriam a falta rèspèt. P’esei, Yehova a rabia masha pisá ku Míriam, i el a laga Míriam haña lepra. Áròn a roga Moises pa yuda Míriam, i Moises a roga Yehova pa kura su ruman. Kiko Yehova a hasi? Yehova no a keda para riba su punto. Komo ku Yehova ta humilde, el a bai di akuerdo ku Moises, i el a kura Míriam.—Num. 12:​1-15.

⁷ E manera ku Yehova a trata Rei Ezekías tambe ta mustra ku Yehova ta humilde. Yehova a laga Profeta Isaías bisa Ezekías ku e ta bai muri. Ku awa na wowo, Ezekías a roga Yehova pa kur’é. Yehova a bai di akuerdo ku e petishon di Ezekías, i el a dun’é 15 aña mas di bida. (2 Rei. 20:​1, 5, 6) Sí, Yehova ta sinti pa hende. Komo ku e ta humilde, e ta dispuesto pa tene kuenta ku nan petishonnan.

8. Menshoná algun ehèmpel ku ta mustra ku Hesus ta rasonabel. (Marko 3:​1-6)

⁸ Hesus ta imitá su Tata. Tempu ku Hesus tabata riba tera, kada bes ku e haña un chèns e tabata hasi kos bon pa otro hende. Por ehèmpel, e tabata kura hende riba sabat maske ku e lidernan religioso no tabata di akuerdo ku esei. Nan tabata rígido, pero Hesus tabata rasonabel. (Lesa Marko 3:​1-6.) Awe, komo kabes di e kongregashon, ainda e ta rasonabel. Por ehèmpel, ora un persona den kongregashon kometé un piká serio, Hesus ta tene pasenshi kuné i ta dun’é sufisiente tempu pa hasi kambio.—Rev. 2:​2-5.

9. Kon nos por mustra ku nos ta rasonabel? (Wak e plachinan.)

⁹ Kon nos por imitá Yehova? Pa nos ta rasonabel, nos mester siña pensa i aktua manera Yehova. (Sant. 3:17) Por ehèmpel, mayornan no mester ta permisivo, pero nan mester ta rasonabel sí. Esei ke men ku nan lo no ferwagt pa nan yunan hasi kos ku nan no por hasi. Yákòb a pone un bon ehèmpel pa mayornan; el a tene kuenta ku e limitashonnan di su yunan. (Gén. 33:​12-14) Ademas, mayornan ku ta humilde i rasonabel no ta kompará nan yunan ku otro. Ansianonan tambe mester ta rasonabel. Por ehèmpel, ora ku e ansianonan mester tuma un desishon, un ansiano lo no keda para riba su punto. Mas bien, lo e apoyá loke mayoria di e ansianonan ke hasi si esei no ta bai kontra prinsipio di Beibel. (1 Tim. 3:​2, 3) Anto nos tur den kongregashon ke hasi esfuerso pa mustra ku nos ta rasonabel. (Flp. 4:5) Por ehèmpel, si nos no ta di akuerdo ku un ruman, nos mester hasi esfuerso pa purba di komprondé kon e ruman ta pensa i sinti.—Rom. 14:1.

YEHOVA TIN PASENSHI

10. Menshoná algun ehèmpel ku ta mustra ku Yehova tin pasenshi.

¹⁰ Hopi bes, hende orguyoso no ta gusta ora otro hende ta pone nan warda, pasobra nan no tin pasenshi. Yehova sí no ta asina. E tin pasenshi pa no kaba. Por ehèmpel, den tempu di Noe, El a bisa ku lo e warda 120 aña promé ku e destruí hende malbado. (Gén. 6:3) Esei a duna Noe sufisiente tempu pa lanta su yunan i traha e arka huntu ku su famia. Na un otro okashon, ora Ábraham tabata hasi Yehova pregunta tokante destrukshon di Sódoma i Gomora, Yehova a keda skuch’é ku pasenshi. Kisas un hende orguyoso lo a drei bisa Ábraham: “Ki mishi bo ta puntra mi esei!” Pero komo ku Yehova ta humilde, e tabatin pasenshi ku Ábraham.—Gén. 18:​20-33.

11. Segun 2 Pedro 3:​9, dikon Yehova ta mustra pasenshi den nos tempu?

¹¹ Den nos tempu tambe Yehova ta mustra pasenshi. E ta wardando ku pasenshi pa e tempu ku el a stipulá pa e fin yega. Dikon? “Pasobra e no ke pa ningun hende bai pèrdí. E ke pa tur hende arepentí.” (Lesa 2 Pedro 3:9.) Danki na e pasenshi ei, miónes di hende a logra bira amigu di Yehova. I nos ke pa miónes di hende mas bira amigu di Yehova. Pero nos sa tambe ku Yehova su pasenshi tin límite. E ta stima hende, pero lo e no laga nan sigui hasi loke nan ke pa semper. E tempu lo yega ku lo e kaba ku hende ku ta hasi malu.—Hab. 2:3.

12. Kon Hesus ta mustra ku e tin pasenshi meskos ku su Tata?

¹² Hesus ta imitá su Tata. Meskos ku Yehova, Hesus tambe ta mustrando pasenshi pa míles di aña. Hesus mester a para mira kon Satanas ta plama tur sorto di mentira tokante su Tata i e sirbidónan fiel di su Tata. (Gén. 3:​4, 5; Yòb 1:11; Rev. 12:10) Ademas, Hesus a mira kon masha hopi hende a sufri aki riba tera. Bo no ta kere ku e tin masha gana di “destruí e obranan di Diabel”? (1 Huan 3:8) E dia lo yega ku Yehova lo bisa Hesus pa destruí e obranan di Diabel. Kiko ta yuda Hesus warda ku pasenshi tanten? Komo ku Hesus ta humilde, e ta rekonosé ku ta Yehova ta esun ku ta disidí ki dia e fin ta yega.—Echo. 1:7.

13. Kon Hesus a mustra ku e tabatin pasenshi ku su apòstelnan, i dikon el a hasi esei?

¹³ Hesus tabatin pasenshi tambe ku su apòstelnan. Por ehèmpel, ora ku e apòstelnan tabata blo diskutí ku otro tokante ken tabata mas importante, Hesus no a pensa ku nan tabata kaso pèrdí. Mas bien, el a sigui tene pasenshi ku nan. (Lúk. 9:46; 22:​24-27) E tabatin sigur ku nan lo a kambia i bira mas humilde. Bo tambe a yega di hasi e mesun fout bes tras bes? Probablemente, bo ta hopi kontentu ku bo tin un Rei ku ta humilde i ku tin asina tantu pasenshi.

14. Kon nos por haña mas pasenshi?

¹⁴ Kon nos por imitá Yehova? Pa nos por pensa i aktua manera Yehova, nos mester hasi esfuerso pa siña pensa manera Hesus ta pensa. (1 Kor. 2:16) Kon nos por hasi esei? Un manera ta di lesa i meditá riba e relatonan tokante Hesus su bida den Beibel. Nos mester wak kiko Hesus a hasi den sierto situashon i purba di komprondé dikon el a hasi esei. Ademas, nos mester pidi Yehova pa yuda nos ta humilde i tin pasenshi meskos ku Hesus. Mas nos siña pensa manera Hesus, mas nos lo imitá Yehova, i esei lo yuda nos tin mas pasenshi ku nos rumannan i ku nos mes.—Mat. 18:​26-30, 35.

YEHOVA TIN ATENSHON PA HENDE INSIGNIFIKANTE

15. Menshoná algun ehèmpel ku ta mustra ku Yehova ta balorá hende ku otro hende kisas ta konsiderá insignifikante. (1 Sámuèl 2:8)

¹⁵ Lesa 1 Sámuèl 2:8. Pensa riba esaki: E Persona di mas importante den universo tin atenshon pa hende humilde. Maske otro hende kisas a konsiderá algun di nan insignifikante i nos mes no konosé nan muchu bon, Yehova a menshoná nan den Beibel. Por ehèmpel, Yehova a laga Moises skirbi nòmber di un señora ku yama Débora den Beibel. Débora a sirbi e famia di Ísak i di Yákòb pa 125 aña. Beibel no ta konta nos masha kos tokante e señora fiel ei. Pero, Yehova a hasi sigur pa laga Moises skirbi un detaye interesante ku ta mustra ku Yehova i Yákòb ku su famia tabata stima Débora mashá. (Gén. 24:59; 35:​8, nota) Algun siglo despues, Yehova a skohe David, un wardadó di karné hóben, pa bira rei di Israel. (2 Sám. 22:​1, 36) Anto djis promé ku Hesus a nase, Yehova a manda angel serka un grupo di wardadó di karné pa laga nan sa ku e Mesías a kaba di nase na Bètlehèm. Nan tabata e promé hendenan ku a tende e bon notisia ei. Sí, Yehova a onra e hòmbernan ei! (Lúk. 2:​8-11) I ora Hose ku Maria a bai ku Hesus na e tèmpel, Yehova a duna dos hende di edat, esta, Símeòn i Ana, e onor di mira su Yu. (Lúk. 2:​25-30, 36-38) Sí, maske Yehova ta biba te den shelu, e tin atenshon pa hende insignifikante!

16. Kon Hesus a imitá e manera ku su Tata ta trata hende?

¹⁶ Hesus ta imitá su Tata. Hesus tambe a balorá hende ku otro hende a konsiderá insignifikante. Por ehèmpel, el a siña “hende gewon ku no tabatin muchu edukashon” tokante e Reino di Dios. (Echo. 4:13; Mat. 11:25) Ademas, Hesus a kura hende malu. E manera ku el a kura nan a laga nan sinti balorá i respetá. (Lúk. 5:13) Riba e último anochi promé ku Hesus a muri, el a laba pia di su apòstelnan. Esei tabata algu ku normalmente un kriá lo a hasi. (Huan 13:5) Anto promé ku Hesus a bai shelu, el a duna tur su disipelnan, inkluso nos awe, e onor di hasi e trabou di mas importante ku tin: e trabou di yuda hende haña bida eterno.—Mat. 28:​19, 20.

17. Kon nos por mustra ku nos ta stima i respetá otro hende? (Wak e plachi.)

¹⁷ Kon nos por imitá Yehova? Nos ta mustra ku nos ta stima i respetá hende ora nos ta kompartí bon notisia ku tur hende, sin importá e persona su background, su rasa òf kuantu edukashon e tin. Ademas, nos ta mustra ku nos ta stima i respetá nos rumannan ora nos ta konsiderá nan superior na nos, sin importá ki abilidat òf privilegio nos tin den kongregashon. (Flp. 2:3) Yehova ta keda kontentu ora nos ta humilde i ta mustra onor na otro hende na e maneranan ku nos a menshoná i na vários otro manera.—Rom. 12:10; Sof. 3:12.

18. Dikon bo ke imitá Yehova su humildat?

¹⁸ Ora nos ta hasi esfuerso pa imitá Yehova su humildat, hende lo haña mas gana di bini serka nos. Tambe nos lo ta mas rasonabel, i nos lo tin mas pasenshi. Ademas, nos lo mustra amor i rèspèt na otro hende, meskos ku Yehova ta hasi. Anto kòrda, ora nos ta hasi tur nos esfuerso pa imitá Yehova, nos lo bira aun mas balioso den su bista!—Isa. 43:4.