Kon pa Plania Boso Dia di Kasamentu pa E Duna Onor na Yehova

1-2. Kon Yehova ke pa bo dia di kasamentu bai?

BOSO ta bai kasa? Si ta asina, esaki ta un temporada felis den boso bida. Naturalmente boso lo tin hopi kos ku boso mester plania. Yehova ke pa boso disfrutá di e dia ku boso ta kasa,a i e ke pa boso biba felis ku otro.—Pro. 5:18; Kant. 3:11.

² Ta hopi importante pa e dia di boso kasamentu duna onor na Yehova. Dikon boso kasamentu mester duna onor na Yehova? Anto kiko boso por hasi pa onra Yehova? E artíkulo akí ta spesialmente pa e parehanan ku ta bai kasa. Pero nos tur por saka benefisio for di e prinsipionan den e artíkulo akí, sea ku nos ta invitá na un kasamentu òf si un pareha pidi nos konseho pa yuda nan plania nan kasamentu.

DIKON BOSO KASAMENTU MESTER DUNA ONOR NA YEHOVA?

3. Ora un pareha ta plania nan dia di kasamentu, kiko nan tin ku tene kuenta kuné, i dikon?

³ Ora un pareha ta plania nan kasamentu, nan mester tuma desishon ku ta basá riba e prinsipionan di Beibel ku Yehova a duna nos. Dikon? Pasobra ta Yehova a krea matrimonio. E ta esun ku a kasa Ádam ku Eva. (Gén. 1:28; 2:24) P’esei, ora un pareha ta plania nan kasamentu, ta hopi importante pa nan pensa kon nan dia di kasamentu por duna onor na Yehova.

4. Ki otro motibu un pareha tin pa onra Yehova?

⁴ Yehova ta boso Tata selestial i boso mihó Amigu. (Heb. 12:9) Esei ta un motibu mas pa boso tene kuenta ku e manera ku Yehova ta pensa. Boso ke keda ku un amistat será kuné. P’esei, boso no ke hasi nada riba e dia ei ni despues ku lo hasi boso Amigu tristu. (Sal. 25:14) Ora boso pensa riba tur e kosnan bon ku Yehova a hasi i lo hasi pa boso, boso lo ke hasi tur boso esfuerso pa onr’é riba boso dia spesial.—Sal. 116:12.

KIKO BOSO POR HASI PA ONRA YEHOVA?

5. Kon Beibel por yuda un pareha ora di plania nan kasamentu?

⁵ Beibel no ta duna regla kon un kasamentu òf resèpsi mester bai. Pues, un pareha por plania nan kasamentu segun nan sirkunstansia, kultura i loke nan ta gusta. Un kristian berdadero lo obedesé lei ku gobièrnu tin pa matrimonio. (Mat. 22:21) Di tur manera ora un pareha ta sigui prinsipio di Beibel segun ku nan ta plania nan kasamentu, nan lo onra Yehova i hasié kontentu. Laga nos wak ki prinsipio un pareha tin ku tene kuenta kuné.

6. Dikon ta importante pa un pareha kumpli ku e rekisitonan legal pa kasamentu?

⁶ Kumpli ku rekisito legal. (Rom. 13:​1, 2) Den mayoria di pais tin rekisito legal ku e pareha mester kumpli kuné promé ku nan kasa. E pareha mester sa bon kiko e rekisitonan ei ta den nan pais. Si boso tin pregunta tokante kon pa kumpli ku eseinan, pidi un ansiano yuda boso ku esei.b

7. Kon bo por sòru pa bo kasamentu ta un okashon onorabel?

⁷ Hasi sigur ku boso kasamentu ta onra Yehova. (1 Kor. 10:​31, 32) Boso lo ke pa e okashon spesial ei reflehá e bunita kualidatnan di Yehova, no e spiritu di mundu. (Gal. 5:​19-26) Komo ku e brùidehòm lo bira kabes di famia, e mester sòru pa e fiesta di kasamentu ta un okashon kontentu i onorabel. Kiko por yud’é ku esei? E por hasi areglo pa un ruman duna un diskurso basá riba Beibel na un manera amoroso i ku rèspèt. Esei lo yuda tur hende presente komprondé ku matrimonio ta un regalo di Yehova i ku e ta algu hopi importante i serio. Mayoria di pareha kristian ta skohe pa tene e diskurso ei na un Salòn di Reino. Si abo ke hasi esei, lo bo tin ku manda un karta adelantá i pidi e kuerpo di ansiano di e kongregashon si bo por usa e Salòn di Reino.

8. Si bo ke pa bo resèpsi onra Yehova, kiko ta algun kos ku bo tin ku tene kuenta kuné? (Romanonan 13:13)

⁸ Lesa Romanonan 13:13. Si bo ta bai tene un resèpsi òf fiesta, tin algun kos ku bo tin ku tene kuenta kuné. Puntra bo mes: ‘Ki mi por hasi pa evitá ku mi fiesta ta reflehá e spiritu di mundu?’ E ekspreshon griego tradusí komo “festehá na un manera deskontrolá” a referí na e fiestanan kaminda tin bebementu di alkohòl sin kontrol i muzik duru te den oranan di mardugá. Si bo ta skohe pa sirbi bibida alkohóliko, pensa adelantá kon lo bo por sòru pa niun hende no bebe di mas.c Si tin muzik, lo ta bon pa bo hasi sigur ku e zonido ta di tal manera ku bo invitadonan por kòmbersá trankil sin tin nodi di papia muchu duru. Tambe lo bo tin ku kontrolá e sorto di muzik i e letranan di e kantikanan. Esei lo yuda bo evitá di pone kualke hende trompeká.

9. Kiko un pareha mester tene kuenta kuné ora un hende ta bai duna un spich i ora di skohe entretenimentu na e fiesta?

⁹ Tin algun famia òf amigu ku lo ke papia algun palabra na e resèpsi òf fiesta? Òf bo a pensa di pasa slideshow di algun potrèt, vidio òf kualke otro entretenimentu pa bo invitadonan? Esakinan ta algun kos ku lo hasi bo dia di kasamentu mas spesial. Pero, hasi sigur ku loke sea bo hasi lo ta pa “animá hende.” (Flp. 4:8) Puntra bo mes: ‘Esei ta mustra ku mi tin rèspèt pa mi invitadonan? Mi ta mustra rèspèt pa e areglo di matrimonio? Anto mas importante ainda, e kasamentu ta onra Yehova?’ Aunke tin biaha ta dushi pa hasi prèt, evitá kòmbersashon inapropiá òf ekspreshon ku tin un toke inmoral òf dòbel sintí. (Efe. 5:3) Hasi sigur ku e hendenan ku ta bai duna spich ta komprondé i respetá bo punto di bista.

10. Dikon un pareha mester ta modesto ora nan ta plania nan kasamentu? (1 Huan 2:​15-17)

¹⁰ Sea modesto. (Lesa 1 Huan 2:​15-17.) Yehova ta keda masha kontentu ora su sirbidónan ta hasi esfuerso pa onr’é i no ta hala atenshon na nan mes. Komo su sirbidónan, nos ke ta modesto i evitá di gasta demasiado plaka i di broma. Awor, kiko ta algun benefisio di plania un kasamentu simpel? Wak e ehèmpel di Mike, un ruman hòmber di Noruega. El a bisa: “Nos no a hinka nos mes den debe. Esei a pone ku nos por a sigui traha pionero. Nos kasamentu tabata simpel, bunita i memorabel.” Un otro ehèmpel ta di Tabitha, un ruman muhé di India. El a bisa: “Nos a evitá hopi strès. Nos a tene nos kasamentu simpel. Esaki a pone ku tabatin ménos kos pa plania i a surgi ménos desakuerdo entre ami i mi futuro esposo i nos famianan.”

11. Kon un brùit i un brùidehòm por demostrá ku nan ta modesto? (Wak e plachinan.)

¹¹ Boso a skohe kaba loke boso ta bai bisti na boso kasamentu? Di mes, boso ke bisti algu nèchi. Asta den tempu di Beibel, un brùit i un brùidehòm tabata wak pa nan aparensia ta bon. (Isa. 61:10) E pañanan ku boso ta bisti na boso kasamentu lo ta poko diferente for di e pañanan ku boso ta bisti na otro okashon. Pero, boso bistí di kasamentu mester ta modesto i desente, i no mester ofendé otro hende. (1 Tim. 2:9) No laga loke boso ta bai bisti ni boso aparensia ni kos material bira e kos di mas importante di boso kasamentu.—1 Ped. 3:​3, 4.

12. Dikon un pareha no mester sigui kustumber ku no ta na armonia ku Beibel?

¹² No sigui kustumber ku no ta na armonia ku Beibel. (Rev. 18:4) Satanas su mundu ta pata pata di tradishon, superstishon i kustumber di religion falsu en konekshon ku kasamentu. Yehova ta spièrta nos pa nos keda leu for di loke ta impuru. (2 Kor. 6:​14-17) Kaminda boso ta biba kisas tin algun kustumber i tradishon relashoná ku kasamentu. Pero kisas boso no sa si nan ta agradá Yehova. P’esei, buska informashon tokante nan i buska prinsipio di Beibel ku por yuda boso skohe kiko pa inkluí den boso kasamentu.

13. Kon un pareha por imitá Yehova su punto di bista relashoná ku dunamentu di regalo?

¹³ Kisas kaminda boso ta biba, ta normal pa invitado duna e pareha un regalo. E regalo ku boso por haña lo varia dependé di e situashon finansiero di un invitado. Beibel ta animá un kristian pa duna, i nan lo ta kontentu pa hasi esei. (Pro. 11:25; Echo. 20:35) Sinembargo, un pareha lo no ke laga nan invitadonan sinti ku nan mester duna un regalo ni laga nan sinti malu si nan duna algu chikitu. Nos tur lo ke imitá Yehova i tin mesun punto di bista kuné. Nos ke laga kada invitado sinti nan bon ku loke nan por duna di kurason.—2 Kor. 9:7.

KON PA TRATA KU DIFIKULTAT KU POR PRESENTÁ

14. Ki difikultat un pareha por haña nan kuné?

¹⁴ Segun ku boso ta plania un kasamentu ku lo onra Yehova, boso lo por haña boso ku algun difikultat. Por ehèmpel, kisas ta difísil pa plania algu simpel. Charlie, un ruman hòmber ku ta biba na Islanan Sálomon, a bisa: “Tabata hopi difísil pa disidí ken pa invitá na nos resèpsi. Nos tin hopi amigu, i den nos kultura, tur hende ta ferwagt ku nan ta ser invitá.” Tabitha, menshoná anteriormente, a bisa: “Kaminda mi ta biba, hende gusta pone fiesta grandi. A tuma tempu pa nos mayornan komprondé ku nos no kier a invitá hopi hende.” Un ruman muhé di India ku yama Sarah a bisa: “Tin hende ta muchu preokupá ku kuantu sèn nan tin i kiko hende ta pensa di nan. Algun famia di mi tabatin un kasamentu ekstrabagante. Anto mi a sinti ku mi tambe mester tabatin un kasamentu asina.” Kiko por yuda boso ku e difikultatnan ku boso por haña boso kuné?

15. Dikon ta importante pa boso hasi orashon ora boso ta plania boso kasamentu?

¹⁵ Hasi orashon na Yehova ora boso ta plania boso kasamentu. Boso por papia ku Yehova tokante kualke kos òf preokupashon ku boso tin. (Flp. 4:​6, 7) Pidié yuda boso pa tuma bon desishon, pa keda trankil ora boso tin strès òf preokupashon i pa boso mustra kurashi ora boso skohe algu ku ta diferente for di loke otro hende ta pensa. (1 Ped. 5:7) Boso lo haña mas konfiansa den Yehova ora boso mira ku e ta kontestá boso orashonnan. Tabitha, kende nos a menshoná anteriormente, a bisa: “Ami ku mi futuro esposo tabata preokupá ku nos lo tin desakuerdo ku otro i ku nos famianan. Pues, kada biaha ku nos tabata bini huntu pa papia tokante e plannan di nos kasamentu, nos tabata kuminsá ku un orashon. Nos a ègt sinti Yehova su yudansa i nos por a keda na pas ku otro i ku nos famianan.”

16-17. Kon bon komunikashon por yuda ora di plania un kasamentu?

¹⁶ Papia ku otro ku rèspèt. (Pro. 15:22) Komo pareha, boso tin hopi desishon pa tuma. Entre otro, boso mester skohe fecha, traha budget, disidí ken boso lo invitá i hopi otro kos mas. Promé ku boso tuma desishon, pensa riba e opshonnan ku boso tin i ki prinsipio di Beibel por yuda boso. Ademas, kòmbersá tokante kualke konseho ku boso a haña for di ruman ku ta spiritualmente fuerte i ku sa kon pa apliká prinsipio di Beibel bon. Ora boso ta papia ku otro i boso famianan tokante kiko boso ke, sea bondadoso, rasonabel i fleksibel. Kòrda ku boso kasamentu ta un okashon spesial pa boso famianan tambe. Si boso famianan yegá, por ehèmpel, boso mayornan, pidi boso pa hasi algu na boso kasamentu ku ta rasonabel, purba di hasi loke nan pidi boso. Si akaso boso no por hasi loke nan a pidi, splika nan na un manera amoroso i bondadoso dikon boso no por hasi loke nan a pidi. (Kol. 4:6) Laga boso famianan komprondé bon kla ku boso meta prinsipal ta pa boso dia di kasamentu ta un okashon felis ku ta onra Yehova.

¹⁷ Si boso mayornan no ta den e bèrdat, kisas ta difísil pa splika nan tokante boso desishonnan, pero boso por logra. Santhosh, un ruman hòmber di India, a bisa: “Nos famianan tabata ke pa nos inkluí vários kustumber di religion hindú. A tuma ami ku mi futuro esposa hopi tempu pa splika nan tokante nos desishonnan. Pero tin sierto kos ku nan a pidi nos ku sí nos a hasi ora nos a sinti ku esei lo no a hasi Yehova tristu. Por ehèmpel, nos a pone kuminda ku nan ta gusta riba e menú. I nos no a pone bailamentu ni kantamentu pasobra nos famianan no ta kustumbrá ku esei.”

18. Kiko lo yuda boso pa kosnan kana bon i na òrdu? (1 Korintionan 14:40) (Wak e plachi.)

¹⁸ Plania bon i adelantá. Ora boso kosnan ta bon organisá, boso lo tin ménos strès dia di boso kasamentu. (Lesa 1 Korintionan 14:40.) Wayne di Taiwan a bisa: “Un par di dia promé ku nos kasamentu, nos a tene un reunion chikitu ku e hendenan ku lo bai yuda nos e dia ei. Nos a repasá algun areglo i a train un parti di e seremonia ku lo tuma lugá na Salòn pa nos ta sigur ku tur kos ta kana bon.” Sòru pa tur kos tuma lugá na tempu pasobra asina boso ta mustra rèspèt pa boso invitadonan.

19. Kon boso por hasi sigur ku tur kos ta kana bon na boso resèpsi?

¹⁹ Nos por evitá hopi problema si nos pensa adelantá. (Pro. 22:3) Por ehèmpel, si kaminda bo ta biba hende sa presentá na un resèpsi sin ku nan ta invitá, pensa kiko boso por hasi pa evitá esei. Hasi sigur ku famianan ku no ta den e bèrdat ta na altura di kiko nan por spera, i splika nan kiko ta bo punto di bista tokante kustumbernan di kasamentu. Bo por manda nan e artíkulo “Kon Kasamentu di Testigunan di Yehova Ta Bai?” ku tin riba jw.org. Boso por puntra un ruman hòmber di konfiansa pa supervisá loke ta sosodé na e resèpsi. (Huan 2:8) Si bo papia kuné tokante boso plannan pa e kasamentu, lo bo ta sigur ku tur kos ta kana na un manera digno i manera boso a plania.

20. Kiko un pareha mester kòrda tokante nan kasamentu?

²⁰ Ora boso pensa riba kuantu kos boso mester hasi pa plania boso kasamentu, kisas boso ta sinti strès. Pero kòrda ku loke ta tuma lugá riba boso dia di kasamentu no ta e kos di mas importante. E dia ei ta djis e komienso di e bunita bida ku boso lo tin huntu sirbiendo Yehova. Pues, hasi bo bèst pa boso dia di kasamentu ta simpel i ta duna onor na Yehova. Konfia den dje. Anto ku Yehova su guia, boso por plania un kasamentu ku lo keda komo un dushi rekuerdo sin nada di lamentá.—Sal. 37:​3, 4.