Pakico Algun Hende Ta Cambia di Religion

Pa hopi hende, religion no ta nada mas cu un etiket. Kisas e ta indicá unda un persona ta bai de bes en cuando riba diadomingo, unda e ta casa i unda lo e ser derá. Pero e no ta bisa ki clase di persona e ta, ni kico e sa of kico e ta kere. Por ehempel, un encuesta a revelá cu 50 porciento di hende cu ta bisa cu nan ta cristian no tabata sa ta ken a duna e Sermon Riba Ceru. Figurá bo, asta e famoso lider indio, Mohandas Gandhi, un hindú, tabata sa esei!

TA UN sorpresa cu hende ta drif bai for di religion ora asina tantu di nan sa asina tiki di nan fe? No, e no ta. Sin embargo, e no ta inevitabel tampoco. Esnan cu a aceptá yudansa pa siña tocante Bijbel, hopi bes ta keda asombrá ora nan ripará cuantu e ta beneficiá nan. Bijbel mes ta bisa: “Ami, Jehova, ta bo Dios, Esun cu ta siñá bo beneficiá bo mes, Esun cu ta hací bo stap den e caminda den cua bo mester cana.”—Isaías 48:17.

Kico esnan cu tin un hamber spiritual cu no a ser saciá mester haci? Nan no mester legumai di sirbi Dios! Mas bien, nan mester wak den Bijbel i mira loke Dios mes ta haci disponibel na nan.

Contesta Riba Preguntanan Difícil

Na edad di shete aña, Bernd a mira su mama muri.a Durante e resto di su infancia, el a puntra su mes: ‘Unda mi mama ta? Pakico mi tin cu crece sin dje?’ Como tiener, Bernd tabata un miembro activo di iglesia. Preocupá cu e sufrimentu di humanidad, el a spera di bai yuda un dia den un pais den desaroyo. Tog, preguntanan riba cua su iglesia no tabatin contesta satisfactorio a molesti’é.

Anto Bernd a papia cu un compañero di scol cu a resultá di ta un Testigo di Jehova. E hóben aki a mustra Bernd for di Bijbel cu su mama ta inconciente, drumí den morto. Bernd a haña sa cu tin hopi versículo di Bijbel cu ta splica esaki, manera Eclesiástes 9:5: “En cuanto e mortonan, nan no ta conciente di nada en absoluto.” Pues Bernd no tabatin motibu pa preocupá tocante si su mama tabata sufriendo den un of otro clase di purgatorio—of algu pió. Aunke mayoria religion ta siña e doctrina di alma inmortal, Bernd a mira den Bijbel cu un alma humano ta djis un persona. Ora e persona muri, e alma ta muri. “E alma cu ta peca—e mes lo muri.”—Ezekiel 18:4.

Tambe Bernd a siña dje prospecto maraviyoso p’e mortonan. E mes a lesa den e buki bíblico di Echonan: “Lo bai tin un resureccion di tantu e hustunan como e inhustunan.” (Echonan 24:15) Ki emocioná e tabata ora el a haña sa cu e resureccion aki lo tuma lugá aki riba tera, cu Dios lo restorá na un paradijs!—Salmo 37:29; Revelacion 21:3, 4.

No a tarda mashá pa conocimentu exacto di Bijbel satisfacé Bernd su necesidad spiritual. Bernd no a legumai religion. Mas bien, el a sali for dje iglesia cu no por a sacia su hamber i a aceptá un forma di adoracion firmemente basá riba Bijbel. E ta bisa: “Esei tabata 14 aña pasá, i nunca mi a lamentá e decision ei. Awor mi sa cu e Creador no ta causa sufrimentu. Satanas ta e dios dje sistema aki, i ta e nos mester culpa p’e condicionnan rond di nos. Pero dentro di poco Dios lo corigí tur e daño cu e mundu di Satanas a causa. Mi mama tambe lo bolbe bek den e resureccion. Ki un goso esei lo ta!”

Por cierto, Bernd a alcansá su meta di bai traha den exterior pa yuda otro hende. E ta traha den un pais stranhero yudando otronan siña tocante e Reino di Dios, e berdadero solucion pa nan miseria. Mescos cu Bernd, miyones di hende a siña cu pronto Dios lo pone fin na sufrimentu humano. Nan ta yena cu emocion ora nan haña sa cu tin un religion cu ta satisfacé nan necesidad spiritual.—Mateo 5:3.

Kico Ta e Propósito di Bida?

Segun cu e paisnan di Occidente ta bira mas i mas indiferente pa cu religion, hopi hende ta puntra: ‘Kico ta e propósito di bida?’ Nan por haña e contesta den Bijbel, manera Michael a descubrí. Meimei di añanan ’70, Michael kier a djoin un grupo terorista. Su único meta den bida tabata terorisá e hendenan cu el a considerá responsabel p’e inhusticianan dje sistema capitalista. “Mi no tabata sali cas sin mi revolver,” e ta bisa. “Mi plan tabata pa mata mas tantu político i capitalista di rango haltu posibel. Mi tabata dispuesto pa entregá mi bida pa e causa.”

Michael tabata un baidó di misa, pero ningun hende den su iglesia por a splik’é e berdadero propósito di bida. P’esei ora Testigonan di Jehova a bishitá su cas i a mustr’é e contestanan di Bijbel riba su preguntanan, Michael a scucha atentamente. El a cuminsá asistí na reunionnan pa adoracion n’e Salon di Reino local di Testigonan di Jehova.

Michael su amigunan tabata curioso tocante e interes cu el a caba di haña den Bijbel. “Bini reunion diadomingo awor,” Michael a urgi nan. “Keda un ratu. Si bo no gusta loke bo tende, bai cas numa.” Asina a sosodé cu despues di un discurso di 45 minuut basá riba Bijbel, mayoria di su amigunan a sali for di salon. Pero un di nan—Susan—a keda. Loke e muher hóben aki a tende a fasin’é. Despues Michael cu Susan a casa i a bautisá como Testigonan di Jehova. “Awor mi sa pakico nos ta aki riba tera,” Michael ta bisa. “Jehova ta esun cu a crea nos. Nos berdadero propósito den bida ta pa conoc’é i haci su boluntad. Esei ta loke ta trece berdadero satisfaccion!”

Miyones di hende tin e mésun conviccion cu Michael. Nan ta tuma na pechu e palabranan di Bijbel: “E conclusion dje asuntu, despues di a tende tur cos, ta: Teme e Dios berdadero i warda su mandamentunan. Pasobra esaki ta henter e obligacion di hende.”—Eclesiástes 12:13.

Enfrentando e Problemanan di Bida

Nos tur ta experenciá e cumplimentu dje profecia na 2 Timoteo 3:1: “Den e último dianan lo presentá tempu crítico.” Ningun hende por scapa dje problemanan dje “tempu crítico” aki. Pero Bijbel ta yuda nos enfrentá nan.

Tuma por ehempel Steven i Olive, un pareha casá. Ora nan a cuminsá studia Bijbel cu Testigonan di Jehova, nan, mescos cu hopi otro pareha, tabatin problemanan matrimonial. “Nos tabata drif bai for di otro,” Steven ta splica. “Nos cada un tabatin otro meta i interesnan.” Kico a yuda nan keda huntu? “Testigonan di Jehova a mustra nos con nos por aplicá principionan di Bijbel den nos bida,” Steven ta continuá. “Tabata promé biaha cu nos a siña kico kier men ser inegoista i mustra interes den otro. Aplicacion di principionan di Bijbel a mara nos huntu. Awor nos ta disfrutá di un matrimonio felis i stabil.”

Un Relacion Intimo cu Dios

Segun un encuesta recien di Gallup, 96 porciento di mericano ta kere den Dios, i mayoria di esakinan ta haci oracion na dje. Sin embargo, un encuesta separá a mustra cu pa e último 50 añanan, baimentu di misa i snoa awor ta na su nivel di mas abou. Rond di 58 porciento di mericano ta bisa cu nan ta bai misa un biaha pa luna of ménos. Ta bisto cu religion no a hala nan mas cerca Dios. I e problema aki no ta limitá na Merca so.

Linda a lanta na Bavaria. El a biba su fe católico i tabata haci oracion regularmente. Na mésun tempu, e tabatin miedu di futuro. E no tabata sa nada tocante e propósito di Dios pa hende. Ora Linda tabatin apénas 14 aña di edad, el a topa Testigonan di Jehova, i e ta informá: “Loke nan a bisa tabata interesante, p’esei mi a aceptá dos publicacion pa studia Bijbel i a lesa nan mesora.” Dos aña despues, Linda a cuminsá studia Bijbel cu Testigonan di Jehova. “Tur loke mi a siña tocante Dios for di Bijbel tabatin sentido,” e ta bisa. Linda a kita su nomber for di su misa i a bautisá como Testigo di Jehova cu 18 aña di edad.

Kico a conmové Linda pa cambia di religion? E ta splica: “Mi iglesia a yudá mi mira cu ta existí un Dios, i mi a siña kere den dje. Pero pa mi, Dios tabata impersonal i leu fo’i mi. Mi studio di Bijbel no solamente a confirmá mi creencia den Dios, sino tambe a yudá mi yega na conoc’é i stim’é. Awor mi tin un relacion personal precioso cu Dios, algu cu ta mas balioso cu cualkier otro cos.”

Religion Berdadero Ta Bale la Pena!

Bo religion ta duná bo guia spiritual i ta mustrá bo con Bijbel por yudá bo enfrentá problemanan di bida? E ta siñá bo e speransa cu Bijbel ta duna pa futuro? E ta trecé bo den un relacion íntimo i personal cu e Creador, basá riba un conocimentu exacto di Bijbel? Si no ta asina, no entregá. En bes di legumai religion, busca e forma di adoracion cu ta firmemente basá riba Bijbel. E ora ei lo bo ta manera esnan cu e buki bíblico di Isaías a profetisá di dje: “Esaki ta loke e Señor Soberano Jehova a bisa: ‘Mira! Mi mes sirbidónan lo come . . . Mi mes sirbidónan lo bebe . . . Mi mes sirbidónan lo alegrá . . . Mi mes sirbidónan lo sclama cu goso debí n’e bon condicion di curason.’”—Isaías 65:13, 14.

[Nota]

[Plachinan na página 4, 5]

Bijbel ta yuda nos conocé Dios i stim’é