Pakico Nan Ta Bandonando Religion?

MEIMEI di siglo 19, prácticamente no tabatin ningun residente di Prusia (awor nort Alemania) cu a bisa cu e no ta pertenecé na un religion specífico. De facto, djis combertí for di un religion tradicional pa un iglesia cu ta bai contra di creencianan generalmente aceptá, por a pone polis cuminsá vigilá bo. Con tempu a cambia!

Awe, un cantidad récord di aleman ta kita nan nomber for di iglesia. Segun informe, 1 di cada 4 ta bisa cu nan no ta pertenecé na ningun religion mes. Nos por mira un tendencia similar na Austria i Suisa. Si ta membresia ta e sanger cu ta tene un religion na bida, anto, manera e escritor aleman Reimer Gronemeyer a expres’é: “Iglesianan di Europa ta sangrando pa muri.”

Pakico Nan Ta Rechasá Religion

Pakico hopi hende ta rechasá religion organisá? Hopi biaha, pa motibunan financiero, specialmente den paisnan caminda miembronan tin cu paga belasting di iglesia. Hopi ta puntra: ‘Pakico e placa cu mi a gana cu sodó di mi frenta mester bai pa iglesia?’ Pa algun, e rikesa grandísimo i poder di iglesia ta repugná nan. Probablemente nan ta di acuerdo cu Cardinal Joachim Meisner di Cologne, Alemania, kende a bisa cu ta e rikesa di iglesia kisas ta loke a hiba iglesia na duna demasiado atencion na cosnan material i “no na tuma fe den Cristo suficientemente na serio.”

Un cantidad di hende ta bandonando nan iglesia pasobra nan ta hañ’é secu, laf, incapas pa satisfacé nan hamber spiritual. Nan ta sufri dje hamber cu e profeta Amos a predicí, “un hamber, no di pan, i un sed, no di awa, sino pa tende e palabranan di Jehova.” (Amos 8:11) Pa motibu cu nan religion apénas ta sacia nan hamber spiritual, nan ta legumai e.

Aunke e problemanan cu hende ta encontrá ta berdadero, ta sabí pa legumai tur religion? Imaginá bo un hende hambrá cu ta mira algu cu ta parce un pida pan. Ma ora e purba com’é, e ta ripará cu e ta trahá di sas di palu. Lo e legumai e idea di come i satisfacé su hamber? No, lo e busca algu di come di berdad. Mescos tambe, si un religion no ta satisfacé e hamber spiritual di su miembronan, nan mester legumai loke ta religion? Of lo ta mas sabí pa nan busca un manera pa satisfacé nan hamber spiritual? Esei ta loke hopi hende a haci, manera e siguiente artículo ta mustra.