Ta ken su falta?

E PROME homber, Adam, a cuminsá e tendencia. Despues cu el a peca el a bisa Dios: “E muher cu bo a duná mi pa ta huntu cu mi, é a duná mi e fruta for dje palu i asina mi a come.” En efecto, e tabata bisando: “No ta mi falta!” E promé muher, Eva, a haci mescos ora el a bisa: “E colebra—é a gañá mi i asina mi a come.”—Génesis 3:12, 13.

Pues e precedente a ser establecí den e hofi di Eden p’e echo cu sernan humano ta nenga di aceptá responsabilidad pa nan propio accionnan. Abo a yega di ta culpabel di esaki? Ora problemanan ta presentá, bo ta lihé pa culpa otronan? Of bo ta analisá e situacion pa mira di ken e falta ta realmente? Den bida diario, ta asina fácil pa cai den e trampa di culpa otronan pa nos erornan i pa bisa, “No ta mi falta!” Laga nos considerá situacionnan comun i mira kico algun hende tin tendencia di haci. Mas importante, reflehá riba loke abo lo a haci bou dje mésun circunstancianan.

Dificultad Financiero

“No ta mi falta—ta falta dje economia, comerciantenan desonesto, e costo haltu di bida,” algun talbes ta bisa ora nan ta haña nan mes den problema financiero profundo. Pero e factornan aki realmente ta culpabel? Talbes condicionnan insigur a hiba nan den proyectonan di negoshi cuestionabel of speculativo. Tin biaha golosidad ta tapa obhetividad, i hende ta haña nan mes landando den awanan desconocí, birando víctima fácil di tribon. Nan ta lubidá e dicho, “No ta tur loke ta lombra ta oro.” Nan ta busca conseho cu nan kier tende, pero ora dificultad económico bira un realidad mahos, nan ta busca un otro hende pa culpa. Esaki, desafortunadamente, tin biaha ta sosodé asta den e congregacion cristian.

Algun persona a cai den e trampa di programanan di inversion imprudente of asta falsu, manera cumpramentu di diamanta cu no a existí, financiamentu di programanan ‘hit’ di television cu a fracasá unbes, of sostené plannan di desaroyo di tereno i edificio cu a bai bankrut. Un deseo inmoderá pa rikesa por a haci nan memoria dof p’e conseho bíblico: “Esnan cu ta determiná pa bira ricu ta cai den tentacion i un trampa . . . i a hinca nan mes tur caminda cu hopi dolor.”—1 Timoteo 6:9, 10.

Gastamentu di placa indisipliná tambe por hiba na ruina financiero. Algun persona ta pensa cu nan mester parce hende den e revistanan di último moda, bai vacansi costoso, come afó den restaurantnan luhoso, i cumpra e último “huguetenan” pa adulto—vehículo di recreacion, boto, cámara, ekipo di zonidu. Naturalmente, cu tempu algun lo por yega n’e cosnan aki mediante planeamentu sabí i sparmentu. Sin embargo esnan cu ta purá pa yega na nan por haña nan mes den debe pisá. Si esei ta sosodé cu nan, ta ken su falta? Obviamente nan a ignorá e conseho sano di Proverbio 13:18: “Esun cu ta neglishá disiplina ta cai den pobresa i desonor.”

Decepcion Cu Yunan

“Ta falta dje ancianonan cu mi yunan a bandoná e berdad,” algun mayor por bisa. “Nan no a presta suficiente atencion na mi yunan.”

E ancianonan en berdad tin e responsabilidad pa pastoreá i percurá p’e tou, pero kico dje mayornan mes? Nan ta ehemplar den manifestá e frutanan di spiritu di Dios den tur nan tratonan? E studio di Bijbel di famia a ser conducí cu regularidad? E mayornan a demostrá celo den Jehova su sirbishi i a yuda e yunan prepará p’e? Nan tabata cuidadoso tocante e asociacion di nan yunan?

Di igual manera, ta fácil pa un mayor bisa relacioná cu lesnan di scol: “Ta e maestronan su falta cu mi yu no a bai bon na scol. Nan no tabata gusta mi yu. I di tur manera e scol tin un clasificacion masha abou.” Pero e mayor a comunicá estrechamente cu e scol? E mayor tabata interesá den e materia i studionan dje yu? Su ‘huiswerk’ tabata programá, i e mayornan a ofrecé yudansa ora e yu tabatin mester? E problema fundamental por ta un asuntu di actitud of flohera di parti dje mucha of e mayor?

En bes di e mayornan culpa e sistema di scol, ta hopi mas productivo si nan tuma accion positivo pa haci sigur cu nan yunan tin e actitud corecto i cu nan ta haci uso dje oportunidadnan di siña cu ta disponibel pa nan na scol.

Fracasando pa Progresá Spiritualmente

De bes en cuando nos ta tende un hende bisa: “Lo mi por tabata spiritualmente mas fuerte, pero no ta mi falta cu mi no ta. E ancianonan no ta presta suficiente atencion na mi. Mi no tin ningun amigu. Jehova su spiritu no ta riba e congregacion aki.” Miéntras tantu, otronan den e congregacion tin amigu, ta contentu i ta haci progreso spiritual excelente; i e congregacion ta bendicioná cu crecementu i prosperidad spiritual. Pues pakico algun tin problema?

Poco hende kier ta compañé íntimo di esnan cu ta manifestá un spiritu negativo i kehoso. Un lenga skerpi i kehamentu constante por ta masha desanimador. Dor cu nan no kier ser debilitá spiritualmente, algun por limitá nan asociacion social cu personanan asina. Considerando cu esaki ta un manifestacion di frialdad di parti dje congregacion, un persona por cuminsá un migracion, mudando promé pa un congregacion, despues pa un otro, i atrobe un otro. Mescos cu e tounan di bestia migratorio dje sabananan africano cu semper ta en busca di terenonan mas berde, e cristiannan “migratorio” aki semper ta en busca dje congregacion cu ta cumbiní nan. Cuantu mas felis nan lo tabata si, mas bien, nan a bai en busca di e bon cualidadnan den otro hende i purba manifestá mas plenamente e fruta di spiritu di Dios den nan mes bida!—Galatio 5:22, 23.

Algun ta haci esei dor di haci un esfuerso special pa papia cu un persona diferente na cada reunion na Salon di Reino i pa encomend’é sinceramente riba un bon punto. Esei por ta riba su yunan cu bon comportacion, regularidad na reunionnan cristian, comentarionan bon-prepará den e studio dje Toren di Vigilancia, hospitalidad pa a pone su cas disponibel pa un Studio di Buki di Congregacion i reunionnan pa sirbishi di veld, etcétera. Dor di haci’é bo meta pa fiha bou dje casca di imperfeccion, siguramente lo bo descubrí cualidadnan noble den bo rumannan cristian. Esaki lo hací bo stima nan, i lo bo no tin scarcedad na amigunan leal.

E Peor Excuus

“Ta e boluntad di Dios.” “Culpa e Diabel.” Probablemente e peor excuus ta pa culpa sea Dios of e Diabel pa nos propio fracasonan. Ta cierto cu Dios of Satanas por influenciá algun suceso den nos bida. Sin embargo, algun hende ta kere cu prácticamente tur cos, sea bon of malu, den nan bida ta e resultado di intervencion di Dios of di Satanas. Ta como si nada cu a sosodé cu nan tabata un consecuencia di nan mes accionnan. “Si Dios kier pa mi haña e auto nobo ei, lo e percurá pa mi hañ’é.”

Hende asina hopi biaha ta hiba un bida descabeyá, tumando decisionnan financiero i di otro índole bou dje suposicion cu Dios lo scapa nan. Si nan accionnan imprudente resultá den un desaster, económico of di otro sorto, nan ta culpa e Diabel. Haci algu imprudente sin ‘calculá e gastu’ promé i despues culpa Satanas p’e fracaso, of peor ainda, spera pa Jehova intervení, lo no ta solamente presumido sino tambe contrario cu e Scritura.—Lucas 14:28, 29.

Satanas a purba haci Jesus pensa asina i no carga responsabilidad pa Su accionnan. En coneccion cu e segundo tentacion, Mateo 4:5-7 ta informá: “E Diabel a hib’é cuné den e stad santu, i el a stacion’é riba e toren dje tempel i a bis’é: ‘Si bo ta un yu di Dios, tira bo mes abou; pasobra ta pará skirbí, “Lo e duna su angelnan un encargo en cuanto bo, i nan lo cargá bo riba nan mannan, pa bo no dal bo pia ningun ora so contra un piedra.” ’ ” Jesus a realisá cu e no por a spera pa Jehova intervení si e mester a tuma un curso prufiá, asta di suicidio. P’esei, el a contestá: “Ta pará skirbí, ‘Bo no mester pone Jehova bo Dios na prueba.’ ”

Esnan cu tin e tendencia di culpa e Diabel of Dios pa nan mes accionnan cuestionabel ta masha parecido n’e siguidornan di astrologia, kendenan simplemente ta substituí Dios of e Diabel cu e streanan. Cabalmente convencí cu casi tur cos cu ta sosodé ta fuera di nan control, nan a pasa por haltu dje simpel principio declará na Galatio 6:7: “Kico cu un hende sembra, esaki lo e cosechá tambe.”

Enfrentando Realidad

Ningun hende lo cuestioná cu nos ta bibando den un mundu imperfecto. E problemanan tratá aki ta di bida real. Hende lo probechá financieramente di nos. Algun doño di trabou lo ta di mala fe. Conocirnan por tin un mal influencia riba nos yunan. Algun maestro i scol tin cu mehorá. Ancianonan tin biaha por ta mas amoroso i interesá. Pero nos tin cu reconocé e efecto di imperfeccion i cu, manera Bijbel ta mustra claramente, “henter e mundu ta drumí den e poder dje malbado.” Pues no ta realístico pa spera cu nos curso atrabes di bida lo bai ta sin problema tur ora.—1 Juan 5:19.

Ademas, nos mester reconocé nos mes imperfeccion i limitacionnan i realisá cu hopi biaha nos problemanan ta e resultado di nos mes bobedad. Pablo a spierta e cristiannan na Roma: “Mi ta bisa tur hende ei entre boso pa no pensa mas di su mes cu loke ta necesario pa pensa.” (Romano 12:3) E conseho ei ta aplicá cu mes forsa na nos awe. Ora algu ta bai robes den nos bida, nos lo no sigui nos antepasadonan Adam i Eva mesora i bisa: “No ta mi falta!” Mas bien, nos lo puntra nos mes, ‘Kico mi por a haci diferente pa a evitá e resultado fastioso aki? Mi a ehercé sano huicio den e asuntu i a busca conseho for di un fuente sabí? Mi a duna e otro partido of partidonan enbolbí e beneficio di duda, atribuyendo dignidad na nan?’

Si nos sigui principionan cristian i ehercé sano huicio, nos lo tin mas amigu i ménos problema. Hopi dje dificultadnan innecesario den nos bida diario lo ser resolvé. Nos lo haña goso den nos trato cu otronan i nos lo no ser tormentá cu e pregunta: “Ta ken su falta?”

[Plachinan na página 28]

Mayornan por contribuí hopi pa yuda nan yunan progresá spiritualmente