“Nunca Mi A Mira Algu Asina’ki!”

NA 1993 e oficina di Watch Tower Society na Argentina a ser invitá pa manda mil delegado na Santiago, Chile, pa e cuater dianan dje Congreso di Distrito di Testigonan di Jehova “Siñansa Divino.” Esaki tabata e promé biaha cu Testigonan argentino a ser invitá pa biaha como un grupo grandi pa un congreso den estranheria.a Kico tabata e reaccion? Un avalancha di mas cu 8.500 aplicacion a drenta, for di cua 1.039 delegado a ser scogé.

Un total di 14 bus a ser di charter pa haci e biahe aki di 1.400 kilometer for di Buenos Aires pa Santiago. E biahe di 26 ora a bira interesante dor dje paisahe espectacular. Crusando e Cerunan di Andes, e delegadonan a pasa banda di Aconcagua, na 6.960 meter e punta di mas haltu den e Hemisferio Occidental. Specialmente memorabel tabata e bahada skerpi yen di bogt pa drenta Chile. E conductornan a ricibí un aplauso largu i generoso pa nan abilidad den manehá e busnan riba tereno difícil asina!

Sin embargo, e bista di mas bunita a ser hañá n’e congreso mes. Den un mundu di conflicto nacional i tension racial, ki refrescante tabata pa mira un multitud uní di 80.000 persona for di 24 pais den asistencia—berdaderamente un hermandad internacional! Ora nan a mira personalmente e unidad entre esnan cu a asistí n’e congreso, algun dje conductornan di bus a expresá interes den siña mas tocante Testigonan di Jehova. “Nunca mi a mira algu asina’ki!” un di nan a sclama.

[Notanan]