Satisfaciendo un Necesidad Humano Básico Mediante Reconocimentu

UN EXPRESION sincero manera “Bon trabou!” “Mi ta contentu pa bo!” of “Bo a haci bo best; nos ta orguyoso di bo” ta yuda mashá pa fomentá respet propio, specialmente ora e ta bini di un persona cu bo ta respetá. Hende ta bai dilanti ora nan ta ricibí reconocimentu. Cuné, nan ta haci progreso i ta mas felis. En berdad, reconocimentu merecí ta mes vital p’e mente i curason cu cuminda saludabel ta p’e curpa.

Un diccionario ta definí reconocimentu como “aceptá cu un individuo tin derecho riba consideracion of atencion” i “observacion of atencion special.” E ta estrechamente relacioná cu respet, e sintimentu di aprecio, cua ora e ser duná ta implicá un apreciacion of evaluacion bon argumentá di un persona pa un otro i e midí di reconocimentu cu e persona ta merecé.

Reconocimentu​—⁠Un Necesidad Básico

Dunando mérito unda mérito ta apropiado, ta razonabel i hustu. Jesus a establecé e patronchi den su ilustracion dje esclabonan na kende e doño a confia su pertenencianan. Reconociendo e maneho corecto di su posesionnan, el a bisa: “Bon trabou, esclabo bon i fiel!” (Mateo 25:​19-23) Sin embargo, masha hopi biaha, e cortesia merecí aki ta ser neglishá. Keda sin duna reconocimentu ta sofocá entusiasmo i iniciativa. Iona ta bis’é asina aki: “Reconocimentu ta poné bo sinti cu hende mester di bo, cu hende kier bo i ta apreciá bo . . . E ta duná bo iniciativa. Si bo ser pasá por haltu, bo ta sintí bo desanimá i lagá na caya.” Patrick ta agregá: “E ora ei ta difícil pa mantené un nivel haltu di calidad i produccion.” P’esei, ta ki vital anto pa nos siña con i ki ora pa duna reconocimentu. Nos tur ta anhelá e siguridad di sa cu hende rond di nos ta aceptá nos. Esei ta un necesidad humano básico.

Un palabra di elogio, mas responsabilidad, of asta un regalo material ta stimulá bo pa sigui haci bo best. Esaki ta cierto sea bo ta un mayor, esposo, esposa, yu, miembro of superintendente di congregacion. “Ora mi haña reconocimentu,” Margaret ta bisa, “mi ta sintí mi contentu, cu hende mester di mi, i mi tin un deseo pa haci mihó.” Andrew ta bai di acuerdo, bisando: “Mi spiritu ta alegrá, dunando mi estímulo pa traha asta mas duru.” Sin embargo, dunamentu di reconocimentu i respet na hende ta rekerí pensamentu cuidadoso i bon huicio.

Imitá Jehova Su Patronchi den Duna Reconocimentu

E ehempel di mas principal di reconocé e balor di otronan ta Jehova Dios. E ta reconocé esnan cu ta digno di reconocimentu. El a tuma nota di hombernan manera Abel, Enoc i Noe. (Génesis 4:4; 6:8; Hudas 14) Jehova a reconocé David pa su fieldad sobresaliente. (2 Samuel 7:16) Samuel, kende como profeta a onra Jehova pa añanan, na su turno den órden di sucesion a ser onrá dor di Dios, kende a respondé lihé n’e oracion di Samuel pa yudansa pa derotá e filisteonan. (1 Samuel 7:​7-13) Lo bo no sintí bo onrá pa haña un reconocimentu divino asina?

Gratitud i aprecio ta estrechamente ligá cu reconocimentu. Bijbel ta insta nos pa ‘mustra nos mes gradicidu’ i pa nos ta gradicidu pa loke otronan ta haci na nos fabor. (Colosense 3:15; 1 Tesalonicense 5:18) Aunke esaki ta aplicá specíficamente na gratitud pa cu Jehova, mescos ta cierto den asuntunan di bida diario. Apostel Pablo a reconocé esaki. El a duna reconocimentu na Febe como “un defensor di hopi” i na Prisca i Aquila pa ‘riscamentu di nan garganta’ na fabor di dje i na fabor di otronan. (Romano 16:​1-4) Imaginá con nan mester a sinti ora nan a ricibí tal gratitud expresá públicamente. Tabata bon pa Pablo tambe pa haña e felicidad den duna reconocimentu, onor i animacion. Nos tambe por imitá Jehova i su adoradornan apreciativo dor di mustra debido reconocimentu na esnan cu merecé esei.​—⁠Echo 20:⁠35.

Reconocimentu Dentro dje Círculo di Famia

“Un poco reconocimentu ta contribuí masha hopi na haci bida agradabel,” Mitchell, un esposo i anciano cristian ta bisa. “E ta poné bo stima, probablemente pa semper, esun cu ta duná bo reconocimentu.” Por ehempel, un esposo cristian ta hiba un carga pisá di responsabilidad i ta tuma decisionnan importante cu ta enbolbé e bienestar dje famia. E mester proveé p’e necesidadnan spiritual, material i emocional dje famia. (1 Timoteo 5:⁠8) Ki gradicidu e ta ora debido reconocimentu ta ser mustrá pa su asignacion duná di Dios como cabes di famia i ora su esposa ta mustr’é “respet profundo”!​—⁠Efesio 5:⁠33.

No mester pasa por haltu dje trabou di un ama di cas, locual hopi hende no ta mira. Conceptonan moderno por degradá tal trabou i hort’é di su dignidad i balor. Sin embargo, e ta agradá Dios. (Tito 2:​4, 5) Ta ki refrescante ora un esposo cu dicernimentu ta elogiá su esposa, particularmente den tur aspecto di bida den cua e ta sobresalí, dunando e tal reconocimentu bou di hefatura dje esposo! (Proverbio 31:28) Rowena ta bisa di su esposo: “Ora e ta reconocé loke mi ta haci, mi ta haña ta mas fácil pa ta sumiso na dje i pa onr’é i respet’é.”

E educador mericano Christian Bovee a yega di bisa: “Elogio huicioso pa yunan ta loke solo ta pa flornan.” Sí, asta un yu masha chikitu tin mester dje siguransa constante cu e ta un miembro balioso di famia. Durante e añanan formativo di tiener, yená cu cambionan emocional i físico nobo, e tiener ta cada bes mas conciente di su mes tocante aparencia personal, combiná cu un anhelo pa independencia i reconocimentu. Durante e tempu ei specialmente, un tiener mester sinti su mes stimá dor di su mayornan i tratá cu comprendimentu i bondad humano. Mayornan i welonan di edad di igual manera mester dje siguransa cu ainda nan por yuda cu algu i cu nan ta ser stimá, cu nan no a ser ‘tirá afó den biehes.’ (Salmo 71:9; Levítico 19:32; Proverbio 23:22) Satisfaciendo apropiadamente e necesidad pa reconocimentu ta trece mas felicidad i éxito p’e círculo di famia.

Reconocimentu Dentro dje Congregacion Cristian

Tin gran balor den cultivá un interes sincero den otronan den e congregacion cristian i den expresá libremente aprecio pa nan obra i esfuersonan. Ancianonan cristian mester hiba delantera den reconocé e logro i esfuersonan di otronan den e congregacion. “Tabata te despues cu mi a ricibí un cantidad di bishita di pastoreo cu mi a realisá cuantu e palabranan di reconocimentu a nificá en relacion cu animacion, satisfaccion i felicidad,” Margaret a bisa. “Mi a realisá kico un hende ta perde ora e no haña reconocimentu general.” Ki un bon motibu pa mustra interes personal genuino i amoroso den tur miembro den e congregacion! Reconocé nan bon trabou. Encomendá i animá libremente. Den hopi congregacion tin famianan di un solo mayor cu ta traha duru pa inculcá balornan spiritual den nan yunan. Tal rumannan ta merecé elogio special. Resaltá e aspectonan positivo mas bien cu e aspectonan negativo. Laga otronan mira bo cariño fraternal pa nan. Laga nan mira cu bo ta interesá den nan. Den e manera aki, superintendentenan amoroso ta traha pa edificá e congregacion. (2 Corintio 10:⁠8) Miembronan individual ta corespondé bek dunando reconocimentu i respet merecí na tal rumannan fiel ei cu ta traha duru na nan fabor.​—⁠1 Timoteo 5:17; Hebreo 13:⁠17.

Pero tin un otro banda, of ángulo, den e asuntu aki. Ta cierto cu e deseo pa reconocimentu ta hopi fuerte. Den tempu di Jesus el a bira un preocupacion entre e lidernan religioso. Jesus mester a corigí e punto di bista robes di su disipelnan den e aspecto aki. (Marco 9:​33-37; Lucas 20:46) Cristiannan mester ta razonabel i balansá. Si nos no control’é, e deseo pa reconocimentu por ta spiritualmente peligroso. (Santiago 3:​14-16) Lo ta ki trágico, por ehempel, si un anciano bira orguyoso i cuminsá exigí pa otronan aceptá su propio opinion exaltá di su mes!​—⁠Romano 12:⁠3.

Apostel Pablo sabiamente a spierta compañénan cristian na Roma: “Den amor fraternal tene tierno cariño pa un e otro. Den mustra onor na un e otro hiba delantera.” (Romano 12:10) E palabranan aki ta aplicá principalmente na ancianonan cristian, kendenan semper mester reconocé Cristo como e Cabes dje congregacion. Sumision na su man drechi di autoridad ta ser manifestá dor di busca e direccion di Cristo pa medio di spiritu santu, principionan di Bijbel i e delantera cu e Cuerpo Gobernante di “e esclabo fiel i discreto” ta hiba.​—⁠Mateo 24:​45-47; mira Revelacion 1:​16, 20; 2:⁠1.

Pues, ora ancianonan ta reuní, i nan ta resa p’e guia di Jehova pa pastoreá e tou di Dios, nan lo forsa pa tuma decisionnan cu ta bíblicamente sano. Modestia cristian, mansedumbre i humildad lo prevení cualkier anciano di purba exaltá su mes, dominá riba su rumannan i imponé su opinion n’e reunionnan aki. (Mateo 20:​25-27; Colosense 3:12) Ki ora cu ta posibel, e presidente dje cuerpo di anciano lo haci bon pa invitá delantá expresion di pensamentu for di co-ancianonan i e ora ei proveé un agenda suficiente tempu delantá pa permití nan pensa cuidadosamente huntu cu oracion riba cada punto cu ta ser specificá. Durante e reunion di anciano, lo e trata, no pa forma e opinion dje ancianonan, sino, mas bien, pa animá nan pa ehercé “libertad di expresion” riba asuntunan bou di discusion. (1 Timoteo 3:13) En buelta, co-ancianonan mester scucha cuidadosamente n’e expresionnan di otro i beneficiá gustosamente dje perspicacia di ancianonan cu tin hopi aña di experencia cristian.​—⁠Exodo 18:​21, 22.

Sin embargo, superintendentenan ta comprendé cu Cristo por usa cualkier anciano den e cuerpo pa proveé principionan di Bijbel necesario pa trata cu un situacion of pa tuma un decision importante. Un bon spiritu lo prevalecé entre e cuerpo ora reconocimentu apropiado ta ser duná na cada anciano pa su contribucion den percurá p’e interesnan spiritual dje congregacion.​—⁠Echo 15:​6-15; Filipense 2:​19, 20.

Haci un Esfuerso pa Duna i Gana Reconocimentu Merecí

Reconocimentu ta edificá. E ta animá i ta hací bo encantador. “Asta ora nos sinti cu nos ta hende comun,” Mary ta bisa, “nos mester di animacion pa nos mes balor propio.” Reconocé sinceramente e esfuersonan diario di otronan. Haciendo esei ta haci bida muchu mas bale la pena i placentero pa nan. Mayornan, yunan, superintendentenan i miembronan dje congregacion cristian, boso por gana reconocimentu dor dje manera cu boso ta papia i cu boso ta actua. Bijbel ta papia faborablemente di personanan industrioso, modesto i humilde. (Proverbio 11:2; 29:23; Hebreo 6:​1-12) Siña reconocé bondadosamente e balor di otronan. Tuma e sintimentu di otronan na consideracion segun cu bo ta traha cu nan. Apostel Pedro a duna e spiertamentu aki: “Boso tur ser dje mésun ánimo i parecer, mustrando compasion, teniendo cariño fraternal, tiernamente compasivo, humilde di mente.” (1 Pedro 3:⁠8) Esaki ta exigí pa duna reconocimentu na otronan, satisfaciendo asina un necesidad humano básico.