‘Su Obranan Ta Sigui’e’

PA 8:50 a.m. riba diahuebs, 28 di juli, 1994, George D. Gangas a terminá su curso terenal. E tabatin 98 aña di edad. Como un ungí, George Gangas tabata un miembro dje Cuerpo Gobernante di Testigonan di Jehova desde 15 di october, 1971.

Tur hende cu a conocé ruman Gangas personalmente tabata sa di su amor pa husticia i odio contra maldad. Nan ta corda bon e manera cu bes tras bes e tabata describí Satanas como un mentiroso grosero, monstruoso, malbado, degradá i despreciabel. Na contraste, e tabata papia di Jehova como un Tata amoroso, bondadoso, compasivo, tierno i interesá den nos. Hopi ruman ta corda tambe su amor pa hacimentu di pregunta di Bijbel. Den cualkier combersacion, sin falta e tabata lansa pregunta​—⁠algun di nan simpel, algun di nan mas difícil. En berdad, el a stima berdad di Bijbel.

Ruman Gangas a ser bautisá dia 15 di juli, 1921. El a cuminsá su carera den e ministerio di predicacion di tempu completo (trahando pionero) na mart 1928. Di manera cu e tabata den e sirbishi di tempu completo pa un total di 66 aña. El a bira un miembro di personal dje sede di Watch Tower Bible and Tract Society na Brooklyn, dia 31 di october, 1928.

Su biografia a aparecé den e edicion di E Toren di Vigilancia [na ingles], di 15 di october, 1966. E ta describí un homber di Dios berdaderamente spiritual. Den e artículo ei, el a haci e siguiente expresion conmovedor: “Mi ta stima bida i mi kier pa mi rumannan gana bida. Mi ta considerá, huntu cu apostel Pablo, cu tur otro cos ta ‘pérdida pa causa dje balor sobresaliente dje conocimentu di Cristo Jesus.’ ”​—⁠Filipense 3:⁠8.

Ruman Gangas a demostrá mediante su accionnan cu e, en berdad, a stima bida, i el a compartí entusiásticamente su “conocimentu di Cristo Jesus” cu otronan. Nos lo sinti su falta, pero cuantu nos ta alegrá cu awor el a ricibí su recompensa celestial! Awor, ‘lo e sosegá di su labor, pasobra su obranan ta sigui’é.’​—⁠Revelacion 14:​13, New International Version.