Graduadonan di Galad

Ansioso pa Plama e Bon Nobo

“E COS di mas maraviyoso cu nos hamas por a imaginá.” Asina Anders i Amalia Groth a sinti tocante nan entrenamentu di misionero. Nan a expresá e sintimentunan di tur e 48 graduadonan di klas 97 di Watchtower su Scol Bíblico di Galad ora nan a agregá: “Entrenamentu di Galad a motivá i a prepará nos, di manera cu nos ta ansioso pa bai na nos asignacionnan nobo.”

Nos por sinti e goso aki segun cu e studiantenan ta comentá riba e programa di graduacion; 6.420 persona a bini huntu dia 4 di september, 1994, p’e ocasion.

“Theodore Jaracz dje Cuerpo Gobernante a habri e programa papiando riba e tema ‘Siendo Siñá dor di Jehova,’ ” David Abel i su esposa, Kelli, a bisa. “E punto cu nos lo no lubidá nunca tabata ora Ruman Jaracz a bisa: ‘Nos mester reconocé nos propio insignificancia na comparacion cu Jehova,’ i a ilustr’é cu e les poderoso hañá den Job capítulo 38 i 39. Ruman Jaracz a mencioná specíficamente cu aunke nos a aumentá nos conocimentu di Bijbel dor dje Scol di Galad, nos no sa e contesta pa tur pregunta. Nos tin cu sigui studia e Palabra di Dios.”

Christian i Angele Coffy a bisa despues: “Nos a keda impresioná cu e discurso cu Max Larson a duna riba e tema ‘Kico Ta e Balor di un Bon Fundeshi?’ Nos a gusta e echo cu el a compará nos cu un edificio cu mester di un fundeshi profundo den tera sólido pa por keda stabil asta den un temblor. Dor di studia diligentemente, nos por desaroyá un relacion mas íntimo cu Jehova i por basa nos fe riba conocimentu profundo di manera cu nos por keda stabil den tempu di dificultad.”

“E discurso di Milton Henschel, presidente dje scol, riba e tema ‘E Cunucunan Ta Cla pa Cosecha’ lo ser recordá pa hopi tempu,” Gary i Lynn Elfers a bisa. “E texto clave, Juan 4:​35-38, a enfatisá e privilegio cu nos tin di drenta un teritorio cu ya a ser sembrá caba dor di trahadornan promé cu nos. Esaki lo stimulá nos pa traha cu un sentido di urgencia.” Compartiendo e opinion aki, Jan i Sirpa Vaahtola a remarcá: “Ruman Henschel a lanta nos anticipacion pa cu e cosecha ainda nos dilanti dunando e último informe for dje Estadonan Báltico. E aumento na Estonia tabata di 51 porciento, na Latvia 106 porciento, i na Lituania 51 porciento. Ki emocionante! E rumannan aya ta rogando e Doño pa manda mas trahador. Nos tabata specialmente contentu pa tende esaki, pasobra nos asignacion ta pa bai Estonia!”

“Joel Adams a duna e siguiente discurso riba e tema ‘Confia den Jehova,’ ” Kevin i Evelyn Cortina a corda. “El a consehá nos cu nos nunca mester pensa cu tin biaha nos por confia den Jehova i tin biaha nos por dependé riba nos propio sabiduria. Den nos asignacion nos lo enfrentá hopi desafio​—⁠salú, cuminda, idioma, custumbernan, etcétera. Nan tur lo rekerí pa nos confia den Jehova.”

E siguiente orador tabata Gerrit Lösch, un miembro dje Cuerpo Gobernante, kende a desaroyá e tema “Sigui Reflehá Jehova su Misericordia.” Alen i Ann Marie Gokavi a bisa: “El a mustra cla cu ta un indicacion di madures cristian pa extendé misericordia na nos compañénan misionero i esnan cu ken nos ta compartí e bon nobo. Asignacionnan den stranheria ta encerá sacrificio, pero si tin falta di misericordia, e ora ei nos sacrificio lo ta di masha poco balor.” (Mateo 9:13) Peter i Fleur Hupston a agregá: “Ruman Lösch a bisa cu nos mester ta misericordioso cu nos rumannan tambe, mirando nan dor di un ‘verrekijker’ robes pa drechi, na moda di papia, di manera cu nan erornan lo ser minimisá en bes di magnificá.”

“Jack Redford, un di nos instructornan di Galad, a sigui riba e tema ‘Bo Por Aceptá un Reprendimentu?’ ” Mickey i Sherry Minsky a corda. “El a mustra cla cu orguyo ta haci’é difícil pa aceptá reprendimentu i cu si nos ta demasiado sensitivo pa conseho, nos lo ser privá di su beneficionan. E ora ei el a duna algun sugerencia práctico riba aceptacion di reprendimentu basá riba Lamentacion 3: 27-31.” Charles i Joan Held a agregá: “Mayoria biaha nos ta ciegu pa nos propio faltanan; p’esei, nos mester mira reprendimentu como un manera pa habri nos wowo pa cosnan cu nos no tabata conciente di dje. Reprendimentu of conseho for di Jehova ta un evidencia di su amor pa nos.”

“Un otro instructor, Ulysses Glass, a papia riba e tema ‘Gana e Sabiduria Práctico Cu Ta Hiba na Bida.’ El a puntra: ‘Kico lo bo haci cu loke bo a siña?’ ” Kenneth i Lisbeth Ardkäll a bisa. “E ora ei el a duna un ilustracion basá riba Proverbio 30:​24-26 tocante e ‘klipdas’ chikitu [Procavia syriaca] i con Jehova a ekip’é completamente pa sobrebibencia. Nos, na otro banda, no ta instintivamente sabí, pues nos mester haci esfuerso pa gana sabiduria. Jehova a ekipá nos cu tur loke nos mester pa haci esei. Tanten cu nos ta hala cerca Jehova i na un e otro den amor, nos lo logra hopi.”

Discurso Principal

“Ruman Karl F. Klein, un miembro dje Cuerpo Gobernante, a considerá afectuosamente Salmo 19 cu nos den su discurso ‘Un Hoya Entre Hoyanan,’ ” Jay i Gwen Abraczinskas a bisa. “El a resaltá e salmista David su aprecio profundo pa Jehova i e cariño cu e tabatin pa Dios su Palabra.” “Ruman Klein a dividí e salmo den tres parti,” Keith i Donna Hornback a bisa. “Parti 1 (versículo 1-6) ta mustra David su aprecio pa Dios su creacion, parti 2 (versículo 7-10) ta expresá su aprecio pa Dios su leynan, i parti 3 (versículo 11-14) ta recordá nos cu, mescos cu David, nos mester kier tin un bon relacion cu Jehova.”

“Nos a disfrutá dje punto cu temor di Jehova ta vital si nos kier evitá loke ta malu. Esaki ta hiba nos na haci loke ta puru den su bista,” David i Raylene Long a bisa. Frank i Vibeke Madsen tabata di acuerdo. “Ruman Klein su comentarionan tocante con beneficioso Jehova su recordatorionan, leynan i mandamentunan ta, a resumí aptamente loke nos a siña na Galad,” nan a bisa. “Esei a haci nos asta mas determiná pa pega na Dios su Palabra den futuro i pa trat’é manera un caha di tesoro yen di hoya.”

Despues dje discurso principal, e studiantenan a ricibí nan diploma, i nan asignacion den stranheria a ser anunciá. Despues di un pausa pa refresco i pasa boca, tur hende a bini huntu atrobe p’e sesion di atardi. E graduadonan a participá den dunamentu di contesta riba e preguntanan cu a ser lansá durante un Studio di Toren di Vigilancia abreviá.

“Despues a sigui e programa dje studiantenan ‘Entrená pa Bira Proclamadornan di Reino na Tur Parti dje Tera,’ ” Bob i Shannon Lakatos a corda. “E promé parti dje programa a trata cu experencianan dje studiantenan den sirbishi di veld durante nos curso di cincu luna. El a enfocá riba e uso ábil di pregunta den nos ministerio. Un parti consistiendo di entrevistanan a mustra maneranan positivo pa enfrentá e desafionan i cambionan di circunstancia den bida di misionero. E tres presentacionnan di ‘slide,’ di Costa Rica, India i Malawi a duna nos un bistaso di Jehova su organisacion mundial.”

“E drama cu a sigui, Sea Teocrático, No Mundano, a ilustrá e mal influencia cu algun miembro di famia mundano, cu actitud independiente, por tin,” Jesse i Michelle Duncan a bisa. “E drama a mustra cu cristiannan mester reconocé cu e guia i direccionnan di e Teocracia ta tantu necesario como beneficioso,” Wenzel i Kelly Koula a agregá.

Un cantica i oracion di conclusion a trece un fin n’e programa encantador. Segun cu e graduadonan tabata bai anticipando nan salida pa asignacionnan den 18 pais den stranheria, nan pensamentunan a ser expresá masha bon dor dje comentario di despedida aki di Tommi i Jael Kauko: “Nos ta masha ansioso pa bai nos asignacion i pa pone na práctica loke nos a siña. Nos a ricibí asina tantu​—⁠awor ta nos turno pa duna.”

[Caption on page 26]

Klas 97 di Graduadonan di Watchtower su Scol Bíblico di Galad

Den e lista aki bou, e rijnan ta numerá for di dilanti bai patras, i e nombernan ta mencioná di robes pa drechi den cada rij.

(1) Hong [Pron: häŋʹ], J [Jack]. [male]; Hong, D [Dede]. [Pron: dēʹdē] [female]; Groth, A [Amalia].; Cortina, E [Evelyn].; Lakatos, S [Shannon].; Hornback, D [Donna].; Acevedo [Pron: äseveʹdō], L [Lizzy]. [Pron: lizʹē]; Coffy, A [Angele]. (2) Elfers, L [Lynn].; Gokavi, A [Ann Marie].; Ardkäll, L [Lisbeth].; Abraczinskas, G [Gwen].; Knott, K [Katy]. [Pron: kāʹtē] [female]; Lizer [Pron: līzʹər], T [Tammy]. [Pron: taʹmē] [female]; Abel, K [Kelli].; Abel, D [David]. (3) Duncan, M [Michelle].; Gokavi, A [Alen].; Held, J [Joan].; Hupston, F [Fleur].; Lakatos, B [Bob].; Long, R [Raylene].; Minsky, S [Sherry].; Acevedo, E [Eddie]. (4) Ardkäll, K [Kenneth].; Kauko, J [Jael].; Vaahtola, S [Sirpa].; Cortina, K [Kevin].; Carson, N [Nancy]. [Pron: nanʹsē] [female]; Minsky, M [Mickey].; Lizer, G [Greg]. [Pron: gregʹ] [male]; Koula, K [Kelly]. (5) Duncan, J [Jesse].; Abraczinskas, J [Jay].; Vaahtola, J [Jan].; Madsen, F [Frank].; Madsen, V [Vibeke].; Long, D [David].; Carson, C [Colin]. [Pron: kȯlʹən] [male]; Elfers, G [Gary]. (6) Kauko, T [Tommi].; Hupston, P [Peter].; Held, C [Charles].; Groth, A [Anders].; Hornback, K [Keith].; Koula, W [Wenzel].; Knott [Pron: nȯt], D [Doug]. [Pron: dugʹ] [male]; Coffy, C [Christian].