Aprecia bo sirbishi sagrado

PA NOS alcanza cualkier meta cu ta bale la pena, nos mester ta prepará pa haci sacrificio. Pa bira docter, hopi aña di estudio, determinacion, i també placa ta necesario. Un gimnástico exitoso tin cu dedica casi tur nan hubentud trahando riba rutina progresivamente mas dificultoso sigiendo sin fin tras di perfeccion. Pianista capaz di igual manera por corda añanan di entrenamento dedicá.

Sin embargo, tin un meta cu ta duna resultado hopi mas ayá cu cualkier prijs cu bo tin cu paga. Cua meta? Esei ta e privilegio di ser un sirbidor di Dios Haltísimo, Jehova. Sea loke sea e sacrificio cu nos ta haci en cuanto tempo, placa, of energía, e privilegio di rindi sirbishi sagrado na nos Creador ta duna recompensa sin comparacion. E palabra di apóstol Pablo ta cierto: “Debocion piadosa ta beneficioso pa tur cos, pasobra e ta encerra promesa dje bida djawor i di loke ta bini.” (1 Timoteo 4:⁠8) Láganos mira con esei ta cierto.

Ora nos ta siña tocante Dios na principio

E mayor parti di hende cu ta responde favorablemente ne bon nobo i ta cuminza studia e Bijbel probablemente no sa cuanto cambio lo resulta den nan bida. Promé, e studiante nobo di Bijbel por perde algun amigo cu no por comprende pakico e no ta bai hunto cu nan den interésnan cu e ta reconoce awor como un desonor pa Dios. (1 Pedro 4:⁠4) Algun por experimenta oposicion di famía i por keda afligí di mira hende cu nan ta stima manifesta un disgusto, i asta odio, pa Jehova Dios. (Mateo 10:36) Esei por ta un prijs dificultoso pa paga.

Na trabao of na scol, també por tin un prijs pa paga. E studiante nobo di Bijbel gradualmente lo kita for di participacion den fiesta i otro celebracion di mundo. E no ta scucha mas na papiamento sushi di colega di trabao of compañé di scol, ni no tin un intercambio di chasco obseno cu nan. Mas bien, lo e purba di pone na práctico e conseho hayá den Efesio 5:​3, 4: “Ni sikiera menciona fornicacion ni impureza di ningun sorto ni golosidad den boso, tal como ta propio pa hende santo; ni conducta bergonzoso ni papiamento disparate ni chanzamento obseno, cosnan cu no ta bonita, sino mas bien e dunamento di agradicimento.”

Tal cambio por haci studiante di Bijbel un hende straño. Esei por ta dificultoso, specialmente pa hovenan den scol ainda. Cu un celebracion tras di otro pa enfrenta, i també siñanza anti-Dios, tal como evolucion, i presion constante pa bai hunto cu e mayoría, cristianan hoven tin cu haci un lucha constantemente pe fe. Sigimento dje camina di Dios por hácinan diferente i por resulta den mofa di parti di compañé di scol i di maestro. Esei ta specialmente dificultoso pa acepta durante añanan delicado como tiener, pero e aprobacion di Dios ta haci esei bale la pena.

Nan realmente ta sacrificio?

Otro cosnan cu na principio por parce di ser sacrificio ta resulta di ser bendicion. Algun a bandona e bicio di tabaco. (2 Corintio 7:⁠1) Esei por ta un lucha, pero ki un bendicion ora bo finalmente ta vence tal bicio ofensivo! Nos por bisa mescos tocante hende cu ta vence adiccion na otro droga of na alcohol. Bida ta cuanto mas mihor sin tal costumber destructivo! Otronan tin cu drecha nan bida matrimonial. Esnan cu ta biba compañá sin e beneficio di matrimonio mester casa of no biba compañá mas. (Hebreo 13:⁠4) Esnan cu ta biba cu varios muher mester keda solamente cu e esposa di nan hubentud. (Proverbio 5:18) Tal cambio ta enbolbe sacrificio, pero nan ta resulta den paz na cas.

Corda e recompensa

En berdad, ken cu ta obedece e ley di Jehova Dios berdaderamente ta saca probecho. Pe promé bez den su bida, studiante di Bijbel ta cuminza yama su Creador pa Su nomber, Jehova. (Salmo 83:18) Un studiante ta yega di stima Jehova Dios mientras cu e ta siña tocante e cosnan maraviyoso cu El a haci i lo haci ainda pa humanidad. Den país unda cu hende tin miedu di spiritu di hende morto, e ta perde tal miedu supersticioso, sabiendo cu hende morto ta drumi, sperando e resureccion. (Eclesiastés 9:​5, 10) I ta ki un alivio pa sa cu Jehova Dios no ta tormenta hende pa semper den fiernu! Sí, e berdad realmente ta haci hende liber.​—⁠Juan 8:⁠32.

Mientras cu studiante ta armoniza nan bida mas i mas cu norma di Jehova, nan ta gana un concenshi limpi i respet propio. Siñando di biba como un cristian berdadero ta yúdanan atende mihor na nan famía, locual ta resulta den gran contentamentu i gozo. Anto, tin asistencia na reunion den Salón di Reino. Ki un experencia gozoso! Tin ei hende cu realmente ta practica e amor caloroso cu e Bijbel ta bisa mester identifica e pueblo di Dios. (Salmo 133:1; Juan 13:35) Nan papiamento ta limpi i edificante ora nan ta papia “e cosnan magnificente di Dios.” (Echo 2:11) Sí, yegando na contacto cu “tur e asociacion di rumanan” ta un fuente di felicidad. (1 Pedro 2:17) Tal compañerismo excelente ta yuda studiante di Bijbel “bistí e personalidad nobo cu a wordu creá conforme cu e boluntad di Dios den berdadero husticia i lealtad.”​—⁠Efesio 4:⁠24.

E paso di dedicacion

Segun cu un persona ta progresa den conocimento, cu tempo amor pa Jehova ta motivé pa dedica su bida na dje i simboliza su dedicacion cu bautismo bao di awa. (Mateo 28:​19, 20) E conseho di Jesús ta cu promé cu su disípelnan ta dal tal paso, nan mester calcula e gasto. (Lucas 14:28) Corda, cristian dedicá ta pone e boluntad di Jehova promé i ta bira lomba pa cosnan di carni. Nan ta traha duro pa bandona “obra di carni” i cultiva “fruta di spiritu.” (Galatio 5:​19-24) E conseho hayá den Romano 12:2 awor ta hunga un papel mas cabal den nan bida: “Kita for di conformacion cu e sistema di cosnan aki, mas bien transformá boso rehaciendo boso mente, pa boso proba pa boso mes loke ta e bon i aceptabel i perfecto boluntad di Dios.” Asina, cristian dedicá ta hiba nan bida cu un sintimento renobá di un propósito.

Sin embargo, considera loke nan ta recibi. Entre otro cosnan, awor nan ta den un relacion personal cu e Creador dje universo. Nan ta ser declará husto afin di ser un amigo di Dios! (Santiago 2:23) Cu un nificacion hopi mas profundo, e ta dirigié na Dios como “nos Tata cu ta den cielo.” (Mateo 6:⁠9) Un otro bendicion pa hende recién ta di sa cu bida realmente tin un propósito, i cu e ta hiba su bida na armonía cu tal propósito. (Eclesiastés 12:13) Sigiendo e guía di Jesús, nan por duna prueba cu e Diabel ta mentiroso, door di permanece fiel. Ki un gozo esei ta causa pe curazón di Jehova Dios!​—⁠Proverbio 27:⁠11.

Naturalmente, segun cu hende cristian ta persevera den e camina di fieldad, tin mas sacrificio pa ser hací. Tempo ta necesario pa ocupábo den un estudio personal i congregacional significante dje Palabra di Dios. (Salmo 1:​1-3; Hebreo 10:25) Tempo pe sirbishi di feld mester ta cumprá for di otro actividad. (Efesio 5:16) Tempo i esfuerzo també ta necesario pa asisti na reunion di Testigo di Jehova i bai na nan asamblea. Sacrificio propio por ta necesario pa financiá e Salón di Reino i e trabao mundial di predica. Sin embargo, manera miyones di hende cristian por testigua, participacion sincero den tal cosnan ta trece felicidad. Jesús a bisa: “Tin mas felicidad den duna cu tin den recibi.”​—⁠Echo 20:⁠35.

E recompensa di duna apoyo ne trabao di Jehova Dios ta yega di ser hopi mas grandi cu e costo. Mientras cu nos ta crece te na mas madurez, nos ministerio ta bira mas fructífero i gozoso. En berdad, nada por duna tanto satisfaccion como siñamento di otro hende e berdad bíblico i míranan acepta e adoracion di Jehova Dios. I si e adorador nobo ta miembro di un famía, kizás un yiu cu a ser entrená “den e disiplina i reglamento mental di Jehova,” esei por duna gozo special. (Efesio 6:⁠4) Nos ta mira bendicion ricu di Dios riba nos esfuerzo pa ser “colaborador” di dje.​—⁠1 Corintio 3:⁠9.

Otro recompensa pa fiel sirbishi

Ta cierto cu nos lo tin problema tan tempo cu e sistema di cosnan ta existi. Probablemente, problema lo bira mas severo mientras cu e tempo di e Diabel ta bira mas corto. Kizás nos tin cu sufri persecucion of wanta tentacion. Pero, e conocimento di cu Dios ta cu nos ta consolános i ta dúnanos e fortaleza pa wanta. (1 Corintio 10:13; 2 Timoteo 3:12) Algun otro hende cristian a wanta hopi aña di maltrato, pero nan ta persevera debí na nan amor pa Dios. Esnan cu ta logra wanta prueba di varios sorto ta síntinan mescos cu e apóstolnan ora nan tabata zutá anto librá. Echo 5:41 ta bisa: “P’sei, nan a bai di dilanti dje Sanedrín, alegrando pasobra nan a wordu considerá digno di ser desonrá pa causa di su nomber.”

E recompensa pa awante ta bal hopi mas cu e costo asta awor. Pero, no lubida, debocion piadosa ta “duna promesa” no solamente “pe bida djawor” sino també dje ‘bida cu lo bini.’ (1 Timoteo 4:⁠8) Ki grandísimo ta e prospecto di hende cu ta persevera! Si bo ta fiel, lo bo sobrebiba e tribulacion grandi cu ta marca e fin dje sistema di cosnan aki. Of si bo ta muri promé cu tal suceso memorable, lo bo haya resureccion den e mundo nobo cu ta sigi. (Daniel 12:1; Juan 11:​23-25) Imaginábo e sintimento di alegría cu lo bo haya ora bo por bisa: “Cu e yudanza di Jehova Dios, mi a alcanza!” Lo ta ki emocionante pa hereda un parti den e tera nobo, locual “siguramente lo ser yená cu e conocimento di Jehova mescos cu awa ta yena lamá mes.”​—⁠Isaías 11:⁠9.

Sí, ta costa algo pa sirbi Dios. Pero, compará cu e recompensa, e costo ta mínimo. (Filipense 3:​7, 8) Den bista di tur loke Dios ta haci pa sirbidor di dje awor i lo haci den futuro, nos ta repiti e palabra dje salmista: “Kico mi por paga Jehova pa tur beneficio di dje pa mi?”​—⁠Salmo 116:⁠12.