Restriccion ta desanimábo?

RESTRICCION! Ningun hende realmente ta gústanan; pero nos tur tin cu soportánan te na un grado. Pero, tin bez cu bo ta keda desanimá pa motibo cu bo bida ta parce di ser mucho limitá? Tal bez lo bo sintíbo mihor si bo ta cambia bo punto di bista. En bez di shagriná en cuanto loke bo no por haci, pakico no probecha plenamente di cualkier libertad cu abo sí ta goza?

Por ehempel, hopi hende cu ta pober económicamente ta deseá di ser ricu. Pero, aunque pobreza ta limitá loke nos por haci den e sistema di cosnan aki, cos importante di bida ta disponibel pa tur hende. Tanto hende pober como hende ricu ta enamora, ta casa, ta cria yiu, ta disfruta di bon amistad, etc. Mas importante, tanto hende pober como ricu ta conoce Jehova Dios i ta spera e mundo nobo primintí. Tanto hende pober como ricu ta progresa den sabiduría i conocimento cristian, locual ta mihor cu riqueza. (Proverbio 2:​1-9; Eclesiastés 7:12) Tur hende​—⁠ricu i pober​—⁠por alcanza un nomber excelente pa nan mes pa cu Jehova Dios. (Eclesiastés 7:⁠1) Den e tempo di Pablo e congregacion cristian a consisti principalmente di hende di rango social abao​—⁠algun tabata esclabo​—⁠cu a haci uso sabí di cualkier libertad cu nan circunstancia a permiti.​—⁠1 Corintio 1:​26-29.

Hefatura bíblico

Den matrimonio cristian, esposa ta sumiso na nan esposo​—⁠un arreglo cu e propósito di beneficiá henter e famía. (Efesio 5:​22-24) Un esposa mester sintié degradá pe motibo ei? Di ningun manera. Esposo i esposa ta un equipo. Hefatura dje homber, ora e ta cumpli cuné na moda cristian, ta pone relativamente poco restriccion riba esposa i ta laga hopi oportunidad pe realiza su potencial. (Efesio 5:​25, 31) “Esposa capaz” di Proverbio capítulo 31 ta ocupá cu hopi tarea interesante cu ta exigi aptitud i determinacion. Claramente, sumision na su esposo no a frustré.​—⁠Proverbio 31:​10-29.

Di igual manera, no tin arreglo pa hende muher hiba delantera riba homber capacitá den e congregacion cristian. (1 Corintio 14:34; 1 Timoteo 2:​11, 12) Hende muher cristian mester shagriná bao di tal restriccion? No. E mayoría di nan ta keda agradicido pa mira cu homber ta atende na tal aspecto dje ministerio cristian na moda teocrático. Nan ta contento pa beneficiá dje pastoreamento i siñamento di anciano nombrá i ocupánan den e trabao vital di predica i haci disípel. (Mateo 24:14; 28:​19, 20) Hende muher cristian ta logra hopi den tal campo, i esei ta resulta den onor pa nan den e bista di Jehova Dios.​—⁠Salmo 68:11; Proverbio 3:⁠35.

Restriccion pa hovenan

Tin bez cu hovenan ta keha cu nan bida ta mucho frená, hopi bez pasobra nan ta bao di autoridad di nan mayornan. Pero, esei també ta bíblico. (Efesio 6:⁠1) Hovenan cristian sabí, en bez di keda irritá bao di restriccion cu nan mayornan ta impone riba nan, ta enfocá riba gozamento di libertad cu nan sí tin​—⁠incluyendo, generalmente, libertad for di responsabilidad pisá. Asina nan por probecha di nan forza huvenil i circunstancia pa preparánan pa bida di adulto.

Un exsuperintendente di circuito den Brasil ta corda bon un mucha homber di 12 aña di edad den un grupo chikito isolá cu tabata frená den loke e por a haci. Esun cu tabata encargá cu registro dje congregacion tabata ocupá den su trabao seglar i no por a presta mucho atencion ne grupo, pero el a haci arreglo pe hoven yudé. El a haya sa unda tur formulario dje congregacion a keda i semper tabata disponibel pa yuda. Su interés tabata animador, i e tabata un fiel compañé den e sirbishi di feld. Awor e hoven ta un anciano nombrá.

Tin hopi situacion cu ta limita e libertad di hende. Maleza ta limitá algun hende. Algun ta biba den famía partí i ta haya cu nan libertad ta limitá bao di exigencia di un casá no creyente. Aunque esnan bibando bao di restriccion por deseá pa cosnan ser diferente, toch nan por hiba un bida di satisfaccion. E revista aki tin hopi relato di hende asina cu ta mashá animador pa otronan pasobra nan ta depende di Jehova Dios i ta saca e mayor probecho for di nan circunstancia.

Mencionando un situacion común den su mes dia, apóstol Pablo a bisa: “Bo tabata yamá ora bo tabata esclabo? No laga esei preocupábo; pero si bo por bira liber també, mas bien probechá dje oportunidad.” (1 Corintio 7:21) Ki un punto di bista balanzá! Algun situacion ta cambia. Hovenan ta bira grandi. Tin bez cu casá opositor ta acepta e berdad. Ta sosode cu situacion económico ta cambia. Hende enfermo por mehora. Den otro caso, kizás cosnan no ta cambia te cu e mundo nobo di Jehova ta yega. No obstante, kico nos por gana si nos ta shagriná pa motibo cu nos no por haci loke otronan por?

Bo nunca a wak páhara zweef na halto den cielo i admira e boniteza i libertad di nan movimento? Kizás bo a deseá di bula manera esei. Wel, bo no por ni nunca por bula manera páhara! Pero, probablemente bo no ta keha. Mas bien, alegrá den bo abilidadnan duná di Dios. Bo ta haci mashá bon camnando rond riba superficie dje tera. Di igual manera, sea loke sea e situacion den nos bida, si nos ta concentra riba loke nos por haci en bez di shagriná riba loke nos no por haci, bida lo ser satisfactorio, i nos por haya gozo den e sirbishi di Jehova Dios.​—⁠Salmo 126:​5, 6.

[Caption on page 28]

Bo ta kere cu bo mayornan ta tenébo restringí?