Dios no ta inhusto pe lubida “e amor cu boso a mustra pa su nomber”

“DIOS no ta inhusto pe lubida boso trabao i e amor cu boso a mustra pa su nomber, pasobra boso a sirbi e santonan i ta sigi sirbi.” (Hebreo 6:10) E palabra ei di apóstol Pablo ta cierto pa Testigo di Jehova den Oosteuropa. Sirbiendo fielmente den e interés dje nomber di Dios, nan a traha pa hopi aña i a traha duro bao di restriccion cu gobierno a impone bao di control soviético di antes. Jehova Dios ta corda nan bon obra i ta recompensánan cu bendicion di Reino. Por ehempel, láganos tira un bista riba e raport dje último aña di sirbishi di tres país so.

Territorio dje Union Soviética di antes

Territorio dje Union Soviética di antes ta informa cu durante e aña di sirbishi di 1992, e máximo di publicador di Reino a aumenta pa 33 porciento​—⁠for di 49.171 te na 65.486! Pero, esei no ta tur, siendo cu tal publicador tabata mashá activo, manera nos ta mira den e aumento excelente di partimento di literatura bíblica, incluyendo revista. Nan a parti hopi foyeto també, partiendo 1.276.108. Esei ta mas cu dobel e cantidad di 477.235 di aña pasá! Ki reaccion tabatin na tanto partimento di literatura? Un redoblamento dje cantidad di estudio bíblico di cas. Awor nan ta conduci 67.555 estudio bíblico.

Además, participacion den e sirbishi di pionero auxiliar a aumenta pa 94 porciento. Esei a contribui claramente ne cantidad sobresaliente di disípel recién bautizá, 18.087 na comparacion cu e total di aña pasá di 6.570, un aumento asombroso di 175 porciento!

Con algun di esnan recién bautizá a bira interesá den e bon nobo na principio? Aveces interés profundo dje ruman cu a conduci e estudio tabata un factor. Un superintendente presidente di Moldova a relata:

“Mi esposa i mi a bishita un señora cu a mustra interés na antes den e berdad bíblico. Nos a cuminza un estudio bíblico cuné. Pero, su esposo no a mustra ningun interés cualkiera. Un dia ora nos tabata riba camina pa bishité pa sigi cu e estudio, tabata mashá friu i sneu tabata cai. Casi ningun hende tabata riba caya, pero nos a yega na su cas net ne ora stipulá. E señora a bisa su esposo: ‘Bo ta mira cuanto interés e hendenan aki tin den nos? Nan ta puntual apesar dje sneu.’ E incidente a haci su esposo pensa. El a cambia di idea i a participa den e estudio, i awor e i su esposa ta testigo bautizá.” Na otro tempo e cortesía dje testigo por lanta interés den e bon nobo. Un anciano, també di Moldova, tabatin e sigiente experencia:

“Un homber cu mi a bishita den e territorio unda mi ta predica no tabata interesá den Testigo di Jehova. El a bisa cu e ta católico griego, mescos cu su tata i abuelo. P’sei el a pidími bandona su terreno. Pero, promé cu mi a bai, el a dunámi e oportunidad di spliqué e doel di mi bishita. Mi a menciona Mateo 28:​19, cu ta bisa: ‘Bai pues i haci disípel di hende di tur nacion, i bautizánan den e nomber dje Tata i dje Yiu i dje spiritu santo.’ Anto mi a duné e direccion di nos lugar di reuni i mi a bai. Pa mi sorpresa, un siman despues e homber a asisti na nos reunion! El a keda te na fin dje programa. El a splica cu durante tur e siman el a sinti duele cu e tabata tanto brusco cu mi. Mi a cuminza un estudio un bez, i awor e ta un ruman di nos.”

Un otro rasgo sobresaliente dje aña di sirbishi tabata e diluvio di yudanza pe rumanan den e territorio cu tabatin necesidad. Durante e tempo di friu di 1991-1992, mas cu 400 ton di cuminda i un gran cantidad di paña pa homber, muher, i mucha tabata mandá pa esnan den necesidad. Tal provision tabata compartí den casi tur parti dje territorio di antes dje Union Soviética, asta tanto leu como Irkutsk den Siberia i Khabarovsk, cerca Hapón. Berdaderamente un indicacion impresivo di cu Jehova Dios no a lubida e amor cu nos rumanan a mustra pa su nomber! Tal evidencia dje amor fraternal cu e spiritu di Jehova a estimulá també tabatin e resultado di unínan cu nan famía mundial. Por ehempel, un hermana di Ucrania a skirbi e oficina di sucursal:

“E yudanza cu boso a dúnanos a afecta profundamente nos emocion. Nos tabatin cu yora i agradici Jehova Dios pasobra e no a lubidános. Ta cierto cu nos tin falta di cosnan material awor mes, pero gracias ne yudanza cu a yega for di nos rumanan den e Occidente, nos a recobrános di manera material. Awor, debí na boso yudanza, nos famía por dedica mas tempo ne sirbishi di Jehova Dios. Si Jehova kier, mi yiu muher i mi tin intencion di ser pionero auxiliar durante e tempo di calor.”

Además, e yudanza duná tabata un testimonio pa hende di mundo pasobra nan por a mira cu Testigo di Jehova ta desplega amor na accion. Un famía di un otro congregacion a skirbi: “Nos a recibi yudanza material cu a consisti di cuminda i paña. Esei tabata asina tanto! Bo apoyo i animacion ta un les pa nos di cu nos mester yuda otronan. Tal acto di amor no por a scapa atencion di hende no creyente, i també di hende interesá i nan famía; esei tabata un testimonio grandi dje berdadero hermandad.”

E cinco asamblea di districto i un asamblea internacional celebrá den Juni i Juli di aña pasá cu e tema “Portador di Luz” tabata un otro evidencia dje bendicion di Jehova riba e trabao duro di su testigonan i e amor cu nan a mustra dunando di conoce su nomber. Tabatin un asistencia di 91.715 hende na tal asamblea, i 8.562 a bautiza. E asistencia mayor tabata den Ciudad di San Pedro, e sitio dje asamblea internacional, unda 46.214​—⁠incluyendo delegado di aproximadamente di 30 país rond di mundo​—⁠a reuni den e stadion di Kirov.

Den Siberia un homber di rond di 60 aña di edad a bini ne terreno dje asamblea den Irkutsk solamente pa mira. El a bisa: “Tur hende cu ta asisti ta bon bistí, tin sonrisa, i ta trata otro cu bondad. E hendenan ei ta manera un solo famía uní. Bo por sinti cu nan ta amigo, no solamente den e stadion sino també den nan bida diario. Mi a recibi literatura bíblica excelente i a conoce hopi mas mihor e clase di organizacion cu esei tá. Mi kier keda den contacto cu Testigo di Jehova pa mi studia e Bijbel.”

Ne mesun asamblea den Irkutsk, unda 5.051 a asisti, un señora interesá dje República di Yakut den Siberia, a comenta: “Mi ta wak e hendenan, i mi kier sclama cu gozo. Mi ta keda mashá agradicido na Jehova Dios cu el a yudámi conoce hende asina. Aki ne asamblea, mi a recibi literatura, i mi kier papia cu otro hende tocante dje. Mi ta deseá mashá hopi pa ser un adorador di Jehova Dios.”

E director dje Stadion Central den Alma Ata di Kazakstan, unda 6.605 a asisti ne asamblea, a bisa lo sigiente: “Mi ta keda emocioná tocante boso actitud. Mi ta keda convencí awor cu boso tur, hoven i bieu, ta un pueblo respetable. Mi no por bisa cu mi ta kere den Dios, pero ami sí ta kere den e cosnan sagrado cu boso hermandad ta comunica, den boso actitud tocante balornan spiritual i material.”

Un oficial di poliz ne asamblea di Alma Ata a bisa: “Mi a yega na contacto cu boso dos biaha, cada bez na un asamblea. Ta mashá agradabel pa traha cu Testigo di Jehova.”

Rumania

Jehova no a lubida e amor cu e rumanan den Rumania a mustra pa su nomber tampoco. E aña di sirbishi cu a pasa a mira hopi suceso feliz pe testigonan. Promé, un oficina di surcursal tabata establecí di nobo den Bucarest. E último actividad legal segun e gobierno rumanio a termina na 1949. E oficina tin rond di 20 ruman homber i muher trahando den facilidad nobo. E oficina di sucursal ta sirbi 23.938 publicador​—⁠un máximo cu nan a alcanza na April i esei ta representa un aumento di 17 porciento mas cu e promedio di aña pasá.

Despues di hopi aña di predica den secreto, e publicadornan ta mihor ahustá ne trabao público di duna testimonio di cas pa cas. Un experencia di Mures ta mustra cu algun testigo ta probecha di tur oportunidad di predica na otronan, asta ora nan ta biahando. E oficina di sucursal a skirbi:

“Un publicador a decidi di predica di un ­bagón di trein pa otro. E reaccion di hende generalmente tabata favorable, pero den e último compartimento tabatin dificultad. Ningun hende kier acepta copia di nos revista. Pa caba, un homber, basta molestiá, a lanta i a grita: ‘Mi ta bai tira tur boso revista for di bentana! Pakico boso ta molestiános asina tanto cu boso religion?’ E publicador a bisa bondadosamente cu aunque el a tíranan for di bentana, otro hende lo probecha di su accion​—⁠hende cu ta lanta e revistanan for di tera. Riparando cu e publicador a keda calmo, e homber a keda asina impresioná cu el a tuma e revistanan i a cuminza pártinan cu otro hende den e compartimento. Sorprendiblemente, nan tur a acepta un revista. Despues di a parti tur, e homber a keda sin ningun. P’sei, e publicador a puntra: ‘Señor, bo no kier algun revista pa bo mes?’ Anto e homber a kita un revista for di un hende cu tabatin dos i a bisa: ‘Awor un revista a yega cefca mi també!’ ”

Den hopi país tabatin bez cu e trabao di predica di Testigo di Jehova a instiga oposicion di clero di cristiandad. Den Rumania, pastor dje religion católico griego hopi bez ta bira furioso cu e testigonan. Pero, esei no por kita e bendicion di Jehova Dios riba su pueblo pe amor cu nan ta mustra pa su nomber. Un superintendente di circuito a skirbi:

“Nos a bai traha den e sirbishi den campo hunto cu e congregacion local. Tabatin cien ruman. Nos a huur un bus cu a híbanos rond di 50 km den campo, na un pueblo. Nos a invita hopi hende ne discurso público cu nan lo duna den e Centro di Cultura. Asina cu e reunion a cumiza, e pastor católico griego local a yega pa causa disturbio pe reunion. Oficial di poliz a purba di para e pastor. No obstante, el a nenga di calma su mes. El a logra para e reunion ora el a kibra e glas den e porta dje entrada. Sin embargo, hopi hende local no a gusta ningun tiki e conducta dje pastor. Un testimonio cabal por a ser duná na tur hende den e auditorio, i un gran cantidad di literatura tabata compartí.”

Desafortunadamente, den algun parti dje país, tin mashá poco Testigo di Jehova. Ora un pionero regular a yega pe promé bez den e provincia di Olt, el a haya nuebe ruman so den tur e país i un territorio grandi pa nan predica den dje. Despues di un aña e cantidad di testigonan a aumenta te na 27, di locual cinco tabata publicador reactivá. E pionero a establece su central den Corabia, unda cu no tabatin ningun testigo. Despues cu e testigonan tabatei pa 45 dia so, e pastor local a protesta riba Craiova contra nan trabao. El a bisa cu nan a “invadi” e stad di Corabia cu nan siñanza, haciendo esfuerzo pa hende cambia nan religion. Atake a sigi, cu e intencion di pone fin ne trabao i destrui e bon nomber di Testigo di Jehova den e territorio. Tur esei a culmina ora e rumanan local tabata den Bucarest pe asamblea di districto. E pastor católico griego di Corabia a haci un anuncio fuerte despues di misa: “Nos tur mester haci manifestacion riba caya pa instiga e poliz pa tuma medida contra Testigo di Jehova, cu a infecta tur e territorio cu nan publicacion i a venená e pueblo.” Pero, net e anochi promé cu e reunion mester a cuminza, algo extraordinario a tuma lugar. Un grupo di bandido a destrui e misa local i e Centro di Cultura dje stad. P’sei, e reunion di protesta nunca a tuma lugar!

Yugoslavia

E aña di sirbishi di 1992 tabata un aña sumamente dificultoso pe rumanan den e tera di Yugoslavia. No obstante, ne mesun tempo nan tabatin algun experencia gozoso. Agradicidamente, Jehova Dios no ta lubida e trabao i e amor mustrá pa su nomber.

Gera a cuminza promé den Slovenia, yamá Croacia promé, i despues den Bosnia i Herzegovina. Dentro di un aña, for di un solo república, cinco estado nobo tabata haci esfuerzo pa establece nan mes frontera, ley, i placa. Cientos di testigo tabatin cu hui foi nan cas i haya refugio cerca nan rumanan den otro parti. Mescos cu otro país den Oosteuropa, comité di emergencia tabata nombrá den stad mas grandi, atendiendo na posada, cuminda, i paña pa nos rumanan den necesidad. Durante e aña di sirbishi, rond di 55 ton di cuminda tabata partí pe rumanan den congregacion den territorio di dificultad. Nos a recibi hopi carta di aprecio.

E rumanan den Dubrovnik a bisa ki agradicido nan a keda pe yudanza duná na nan. Ora un hermana a bai cas cu su paki di cuminda, un beciña a puntra unda el a cumpra webu. E ruman a bisé cu tabata su rumanan spiritual di otro sector cu a mándanan pe. E beciña a keda asombrá. Den un otro caso un homber desconocí di Slovenia a yama un anciano i a bisa: “Mi a tende cu Testigo di Jehova ta compartí cuminda cu nan a recibi for di nan rumanan na moda husto. Mi a manda varios paki pa hende; pero, nan nunca a yega. Mi por manda provision pa alivio na boso, i boso por pártinan?” També, curant i radio a informa favorablemente tocante nos trabao di duna alivio.

Un ruman cu tabata bautizá ne asamblea internacional den Zagreb na 1991 tabata sa dje dificultad binidero i el a cumpra henter un tienda di cuminda. El a hiba e cuminda na su cas cerca e zona dje gera. Ora e scarcidad di cuminda a bira mas severo, e cuminda a resulta di ser un berdadero bendicion pe rumanan.

Tabata posibel pa obtene permit pa un truck grandi hiba provision básico di cuminda pe rumanan cercá den Sarajevo. Nos ta keda contentu pa bisa cu nan tabatin bon éxito entregando e cuminda pa nan.

E gera a mata basta dje pueblo cu no tabata den e gera. Lamentablemente, te na fin dje aña di sirbishi, seis di nos rumanan homber i muher i dos hende interesá a perde nan bida, i algun a haya herida.

Sin embargo, hopi experencia ta mustra cu en general, ta un proteccion pa ser un Testigo di Jehova. Den un caso nos rumanan tabata haci biahe pe asamblea di districto den Belgrado ora soldad a para e bus i a puntra si tabatin miembro di un cierto religion na bordo. E rumanan a contestá cu no tabatin ningun. Nan tabatin cu mustra nan cédula, i algun hende tabatin nomber indicando cu nan por tá dje religion ei. Soldad a acusánan di gañamento, pero e rumanan tabatin evidencia den nan poder di nan retiro for dje religion; aunque nan a nace den e religion ei, nan a bisa cu awor nan ta Testigo di Jehova, biahando pe asamblea. Anto e soldadnan a láganan sigi.

Pionero ta sigi den e sirbishi cu e mesun celo, i esei a resulta di ser un berdadero estímulo pe trabao. E Toren di Vigilancia cu su capa alegre den pleno color ta ser traducí simultáneamente den tur idioma principal dje region. E ta percura regularmente pa amante di berdad i husticia nan “midí di provision [alimento spiritual] ne debido tempo.” (Lucas 12:42) Durante e aña di sirbishi di 1992, 674 ruman nobo homber i muher tabata bautizá.

Por cierto, Dios no a lubida e trabao i e amor cu e ruman den Oosteuropa a mustra pa su nomber. Además, Dios kier pa tur adorador di dje, no ta importa unda nan ta biba, sigi e conseho excelente cu Pablo a duna den Hebreo 6:​11, cu ta bisa: “Nos ta deseá pa cada un di boso mustra e mesun diligencia afin di tene plena siguranza dje speranza te na fin.”