Paisahe dje Tera Primintí

Gerasa—Unda Hudío i Griego a Topa

APOSTOL Pablo a skirbi cu den e berdadero simía di Abraham, “no tin ni hudío ni griego.” (Galatio 3:26-29) Sí, e origen of cultura nacional no ta conta den e aceptacion di Dios.

Tal palabra por parce apropiado pa hende cristian plamá den provincia romano, tal como e provincia di Galacia, unda tabatin un mezcla di hudío, griego, romano, i e pueblo local. Pero, kico di parti di Israel mes, tal como Galad?

E region ta pariba di Jordán, entre e Lamá di Salu (Lamá Morto) i Lamá di Galilea. For dje central dje sabana gordo halto, e rio Jabok ta sali pa basha den Jordán. E paisahe anterior ta contene algun resto impresivo di Gerasa, yamá awor Jerás, cu ta situá cerca e fuente di Jabok.

Un ruta di comercio di antigua corriendo nort i zuid yamá “camina di rey” a cruza Galad. Despues di a bandona Harán, Jacob i su famía evidentemente a biaha den e camina di Jabok. El a lucha cu un angel i a contra cu Esau cerca e sitio unda nan a traha Gerasa. (Génesis 31:17-25, 45-47; 32:22-30; 33:1-17) Na un tempo despues, israelita a bini di zuid pasando den e camina di rey rumbo e Tera Primintí. Dos tribu i mei a establecénan panort i pazuid dje rio Jabok cant’i camina di comercio.—Número 20:17; Deuteronomio 2:26, 27.

Griego a enbolbénan den e tera ei, i si nan a hacié, di ki manera? Sí, nan a haci esei ora Alehandro Magno a conquista e tera. Segun tradicion, el a funda Gerasa pa veterano di su ehército. Gradualmente, influencia griego a bira bon establecí. Diez stad colonial di nan pariba di Jordán i di Lamá di Galilea a forma un confederacion yamá Decápolis. Kizás bo a mira e nomber den e Bijbel, cu ta bisa cu “multitud grandi a sigié for di Galilea i Decápolis i Jerusalem i Hudea i di otro banda di Jordán.” Gerasa tabata un stad di Decápolis.—Mateo 4:25.

‘Un parti dje plan di Alehandro tabata pa introduci e pueblo griego den tur parti dje imperio. Siria pabao [incluyendo Decápolis], ­specialmente, como un centro estratégico, a recibi un parti grandi di poblacion helenista. Te ne dia djawe ningun parti dje mundo oriental por desplega tanto ruina griego ni tanto notable como e tera pariba di Jordán. Stad griego a desplegá, superficialmente, un establecimento completo di institucion i custumber griego—tempel magnífico di dios i diosa griego, gimnasio, baño público, celebracion anual di wega, i den hopi caso scol filosófico i academia.’—Hellenismo, di Norman Bentwich.

Si bo ta bishitá ruina den Gerasa, bo por haya prueba amplio di esei. Cerca e entrada di zuid, tin un foro of mercado rondó, visibel den e portret. Probablemente lo bo keda asombrá di baño, tempel, teater, edificio público, hopi di locual ta conectá cu caya furá cu piedra cu colom na tur dos banda. Pafó dje stad bo por mira borchi of marca marcando miya cant’i camina di antigua cu a conecta Gerasa cu otro stad di Decápolis i cu haf mediterráneo.

Asta despues cu Roma a domina Gerasa na aña 63 PEC, e sabor helenista a persisti. Bo por imaginábo con tal sabor por a influenciá hudío cu a biba den Gerasa i den e region. E buki Hellenism ta bisa: “Gradualmente pero siguramente hudío a cuminza absorbe idea religioso dje pueblo rond di nan, i pa considera e Scritura bao di influencia di tal idea.”

Aunque ta posibel cu Jesús no a predica den e stad, el a drenta den e districto di Gerasa, cu por a yega te ne Lamá di Galilea. El a saca demoño for di un homber den e districto, permitiendo nan drenta den un tao di porco. (Marco 5:1-17) Probablemente, su disípelnan di promé a predica na hudío den stad di Decápolis, i despues di 36 EC, e bon nobo por a ser compartí cu griego den Gerasa. Sea cu un persona cu a acepta cristianismo tabata un practicante estricto di hudaísmo, un hudío helenizá, of un griego, e Dios berdadero a acepté como parti dje simía spiritual di Abraham.

[Mapa na página 24]

(Pa teksto den su formato kompletu, wak publikashon)

Dión

Gerasa (Jarás)

Filadelfia (Rabá)

Camina di rey

Lamá di salu

Jerusalem

Jordán

Jabok

Pela

Escitópolis (Bet-seán)

Gadara

Lamá di Galilea

[Rekonosementu]

Segun un mapa di derecho di Pictorial Archive (Near Eastern History) Est. and Survey of Israel

[Plachi na pagina 24]

E portret anterior ta den forma grandi den e Calendario de los Testigos de Jehová para 1992.

[Rekonosementu]

Pictorial Archive (Near Eastern History) Est.

[Rekonosementu di plachi na página 25]

Pictorial Archive (Near Eastern History) Est.