Nan a bini apesar di molester i peliger

TABATA dia 2 di Januari di 1992. E lugar—Maxixe, Provincia di Inhambane. Sonido di anochi africano di Mozambique tabata interrumpi un bez ora nan a cende e radio. “Testigo di Jehova ta celebra nan Asamblea ‘Stimador di Libertad’ den nos provincia,” segun e anuncio dje locutor. “Nan propósito ta di instrui hende tocante con nan por haya berdadero libertad den e mundo djawe. Tur hende ta ser invitá pa asisti.”

Den e skina lehano di Africa ei, nan tabata haci algo pe promé bez! Pe promé bez, Testigo di Jehova tabata celebra un asamblea di districto, i 1.024 hende tabatei pa disfruta di dje. Un poco aña pasá, tal suceso nunca por a sosode tanto abiertamente den Mozambique, siendo cu e trabao di Testigo di Jehova tabata prohibí. Bo kier leza tocante sacrificio balente cu nan a haci pa asisti ne asamblea?

E Provincia di Inhambane, mescos cu hopi otro parti di Africa, ta exquisitamente bonita. Boto di pisca di clase arabir cu bela triángulo ta pasa den lamá for di costa. Tin un abundancia di mata di coco. Pero, un situacion spantoso ta domina e país: gera civil!

Pa hende cu ta drumi den rancho di hal’i coco madrugá, no ta straño pa e tiramento bum-bum-bum di artillería pisá lantábo for di soño den e campo cercano mientras cu gera di mondi ta ser bringá henter anochi. Cu demasiado frecuencia ta ciudadano inocente cu ta sufri. Tin bez cu bo ta mira mucha cohando riba un solo pia of un pia mancá. Asta algun Testigo di Jehova tin cicatriz riba nan cara i curpa resultando di brutalidad cu nan a sufri.

Den tal circunstancia e Asamblea “Stimador di Libertad” tabata apreciá mashá pa tur esnan cu a asisti. Apesar dje posibilidad di un emboscada riba camina pe asamblea, hopi grupo di famía di campo a keda determiná di bini. E biahe pa yega no tabata cómodo tampoco, siendo cu transporte público tabata principalmente den e parti patrás di truck grandi habrí. Tabatin bez cu tanto como 400 pasahero a stiwa den un solo truck! Varios truck asina den fila a forma convoy cu a corre den compañía di truck militar.

Nora i su tres yiu muher, di edad di uno, tres, i seis aña, tabata un famía cu a risca nan bida biahando asina. El a spaar placa pa varios luna di antemano pe por paga pe biahe. E echo cu no tabatin posada sigur disponibel ne asamblea no a strobé. Hunto cu hopi otronan, Nora i su famía simplemente a cushiná, a come, i a drumi riba tera den aire liber ne sitio dje asamblea.

Ni sikiera e calor tropical feroz sigí pa awaceru duro no por a hoga e gozo desenfrená dje rumanan disfrutando dje fiesta spiritual hunto. Nan a kere cu nada tabata mas importante pa nan cu nan asistencia ne asamblea. Un total di 17 hende a simboliza nan dedicacion den e awa caloroso di Lamá Indio. Ora e bautismo a tuma lugar, un ­grupo grandi di mirones gozoso tabata inspirá ­espontáneamente pa canta alabanza pa Jehova.

E grupo di adorador berdaderamente a descubri loke kier men pa bira stimador di libertad divino. Hans, un representante dje capital, Maputo, a bisa: “Nos a caba di mira e comienzo di un capítulo nobo den e trabao di Testigo di Jehova den e parti aki di Africa.”