Atrocidad—Kico Ta Dios Su Solucion?

CON por prevení atrocidad? Kico ta e solucion? Ora nos studia historia, ta bira bisto cu solucionnan humano a faya. Eigenlijk, tin un gran elemento di contradiccion, si no ta hipocresia abierto, den e manera cu lidernan humano a trata na manehá e asuntu.

Tuma, por ehempel, aña 1995. El a marca e di 50 aniversario dje fin dje Holocausto nazi, di Guera Mundial II i dje explosion dje bom atómico. E aña ei, a tene ceremonianan conmemorativo na hopi parti di mundu, na cua lidernan di mundu a asistí. Di con? Pa duna e idea cu nan tin un repugnancia contra e atrocidadnan aki, pa asina nan no ser ripití nunca mas. Sin embargo, algun observadó a nota un dósis insaludabel di contradiccion den e ceremonianan ei.

Hipocresia

Den e ceremonianan aki cu a haña amplio publicidad, tur e representantenan religioso i gubernamental kier a ser mirá como benefactor of por lo ménos evitá di ser mirá como malechor. Pero nacionnan cu a condená atrocidadnan di pasado a traha arsenalnan di arma i a presupuestá sumanan inmenso di placa p’e propósito ei. N’e mésun momento, nan no a resolvé problemanan importante manera pobresa, deterioro moral i contaminacion, bisando hopi bes cu nan no tin suficiente fondo pa esakinan.

Religion di mundu ta busca manera di duna un version dje historia cu ta camuflá nan silencio largu riba e atrocidadnan di dictaduranan i pa purba sconde cu nan a cera cabes cu otro. E religionnan aki no a haci nada pa stop hende dje mésun religion di mata otro. Por ehempel, den Guera Mundial II, católico a mata católico i protestant a mata protestant, pa motibu cu nan tabatin otro nacionalidad i tabata n’e otro banda dje frontera. Tur dos banda a afirmá di ta cristian, pero a practicá net lo contrario di loke Jesus a siña. (Mateo 26:52; Juan 13:34, 35; 1 Juan 3:10-12; 4:20, 21) Otro religionnan a haci mescos. Awe, na vários parti di mundu, ainda miembronan dje religionnan aki ta cometiendo atrocidad.

Den tempu di Jesus, e lidernan religioso tabata hipócrita. Jesus a denunciá nan, bisando: “Ai di boso, escriba i fariseonan, hipócritanan! pasobra boso ta edificá e keldernan dje profetanan i ta dorna e grafnan memorial di esnan hustu, i boso ta bisa: ‘Si nos tabat’ei den e dia di nos antepasadonan, nos lo no tabata participante cu nan den e sanger dje profetanan.’ P’esei boso ta duna testimonio contra boso mes cu boso ta yu di esnan cu a mata e profetanan.” (Mateo 23:29-31) E lidernan religioso ei a pretendé di ta deboto, pero tabata hipócritanan cu a persiguí Jesus i su disipelnan.

Lesnan cu Bijbel Ta Siña

Nos por siña algun les for di historia seglar, pero Bijbel ta e fuente dje lesnan mas probechoso. E no ta laga e tarea di interpretá historia den man di huicio of prehuicio humano. Bijbel ta splica historia i e futuro den lus dje manera cu Dios ta pensa.—Isaías 55:8, 9.

E Scritura ta papia di sucesonan bon i malu; tambe di bon hende i di mal hende. Hopi bes nos por siña for dje relatonan aki un les corecto, un les cu ta na armonia cu e boluntad di Dios. Despues di mencioná un cantidad di suceso den e historia di Israel di antigwedad, apostel Pablo a yega n’e siguiente conclusion: “Awor, e cosnan aki a sigui sosodé nan como ehempel, i nan a ser skirbí como spiertamentu pa nos.” (1 Corintionan 10:11) Jesus mes a usa historia pa siña hende un les ora el a bisa su disipelnan: “Corda e esposa di Lot.”—Lucas 17:32.

Loke Dios Ta Corda i Loke E Ta Lubidá

Nos ta siña for di Bijbel cu Dios ta corda of ta lubidá individuonan a base di nan accionnan. Esnan cu ta peca pero cu ta mustra repentimentu, Dios ta pordoná “den un gran manera.” (Isaías 55:7) Si un malbado repentí i “bolbe for di su picá i efectuá rectitud i husticia, . . . ningun di su picánan . . . lo ser recordá contra dje.”—Ezekiel 33:14-16.

Pablo a skirbi cu “Dios no ta inhustu p’e lubidá boso trabou i e amor cu boso a mustra pa su nomber.” (Hebreonan 6:10) Di manera cu Jehova lo recompensá esnan cu e ta corda cu fabor. Fiel Job a pidi den oracion: “Ai, scondé mi den Sheol [e graf comun di henter humanidad], . . . pone un límite di tempu pa mi i cordá mi!”—Job 14:13.

Di otro banda, Dios lo trata cu e malechor cu no ta repentí di acuerdo cu e palabranan cu El a papia cu Moises: “Lo mi skrap e for di mi buki.” (Exodo 32:33) Sí, Dios lo lubidá malbadonan pa semper.

Esun Cu Ta Husga Finalmente

Dios ta esun cu finalmente ta husga e historia. (Génesis 18:25; Isaías 14:24, 27; 46:9-11; 55:11) Segun su huicio superior, lo e no lubidá e gran cantidad di atrocidad cometí contra humanidad. Riba e dia di su rabia hustu, lo e husga tur persona i institucion responsabel.—Revelacion, capítulo 18, 19.

Entre esakinan lo tin e sistema completo di religion falsu, cu e Scritura a duna e nomber simbólico di “Babilonia e Grandi.” Di dje ta pará skirbí: “Su picánan a montoná huntu te na shelu, i Dios a corda su actonan di inhusticia.”—Revelacion 18:2, 5.

Supuestamente e religionnan aki mester a siña nan siguidónan haci loke ta corecto, pero nan a faya. P’esei e Palabra di Dios ta bisa di tur religion di mundu: “Den dje a ser hañá e sanger di profetanan i di santunan i di tur esnan cu a ser matá riba tera.” (Revelacion 18:24) Debí cu nan a keda sin instruí nan miembronan pa stima nan próhimo i tambe nan compañeronan creyente, e religionnan aki ta ser acusá di culpa di sanger.

Un Mundu Nobo Ta Cerca!

Por fin, e dia cu maldad lo ser destruí ta cerca. (Sofonías 2:1-3; Mateo 24:3, 7-14) Despues dje dia ei, e tempu lo bini ora “lo no tin morto mas, ni lo tin lamento ni sclamacion ni dolor mas” pa e residentenan felis di tera. (Revelacion 21:3-5) Atrocidad i masacre lo no tuma lugá nunca mas, pasobra e gobernacion dje tera aki lo ser kitá for di hende i lo ser entregá n’e Reino celestial di Dios den man dje “Prins di Pas,” Jesucristo.—Isaías 9:6, 7; Daniel 2:44; Mateo 6:9, 10.

N’e tempu ei e profecia di Salmo 46:9 lo cumpli plenamente: “[Dios] ta haciendo gueranan stop te n’e extremidad dje tera.” E pas ei lo permanecé pa semper, pasobra, manera Isaías 2:4 ta predicí: “Nacion lo no hisa spada contra nacion, ni nan lo no siña mas di guera.” Salmo 37:11 ta predicí lo siguiente: “E mansunan mes lo poseé e tera, i berdaderamente nan lo haña nan deleite exkisito den e abundancia di pas.” Sí, n’e tempu ei nos lo por bisa cu “henter e tera a drenta den descanso, a bira liber di disturbio. Hende a bira alegre cu gritunan gososo.”—Isaías 14:7.

Tur esaki ta nificá cu un hustu mundu nobo ta cerca. Anto den e mundu nobo ei, bou dje gobernacion dje Reino celestial di Dios, un otro suceso maraviyoso lo tuma lugá: e resureccion dje mortonan! E Palabra di Dios ta sigurá nos: “Lo bai tin un resureccion di tantu e hustunan como e inhustunan.”—Echonan 24:15.

Tempu Jesus a cana riba tera, el a demostrá esaki dor di lanta hende for di morto. Por ehempel, ora el a resucitá un mucha muher chikitu, e relato ta bisa: “Unbes e hobencita a lanta i a cuminsá cana . . . Unbes [esnan cu a mira] tabata for di nan mes cu gran éxtasis.” (Marco 5:42) Den e resureccion esnan matá den atrocidadnan i tambe esnan cu ta morto pa hopi tempu, lo ser lantá for di morto i lo haña e oportunidad di biba pa semper den un paradijs riba tera. (Lucas 23:43) I cu tempu “e cosnan anterior lo no ser recordá, ni nan lo no subi na curason.”—Isaías 65:17.

Ta sabí pa bo adkerí conocimentu exacto dje Palabra di Dios, Bijbel, i haci su boluntad. E ora ei Dios lo cordá bo cu fabor ora e solucioná e problema di atrocidad pa semper i duna e víctimanan bida atrobe. Jesus a bisa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.”—Juan 17:3.

[Plachinan na página 9]

Dios lo transformá e tera aki den un paradijs pacífico

[Plachinan na página 10]

Dios lo eliminá e efectonan dje atrocidadnan di pasado dor di resucitá e mortonan