Bo Ta Apreciá Libertad di Religion?
Dje coresponsal di Spierta! na Estonia
PÄRNU ta un stad na costa i un centro di turista n’e pais chikitu di Estonia na Laman Báltico, cu na ántes tabata un república di Union Soviético. E stad tin un poblacion di mas cu 50.000 hende. Awor e pueblo ta disfrutá di un libertad di practicá e religion cu nan ta scoge—un libertad cu nan no tabatin un poco aña pasá. Dia 17 di juni, 1995, Pärnu Leht, un corant local, a bisa cu Pärnu tin 11 religion i cu e corant tabatin plan pa publicá un seri di artículo tocante nan.
E promé artículo a splica: “Nos ta cuminsá cu e congregacion di Testigo di Jehova, e actividad di kende a parce di a afectá nos tur. Awor nan ta tene nan reunion den e sala di un fábrica di cerbes. . . . Na 1931 e Studiantenan di Bijbel a cuminsá yama nan mes Testigo di Jehova, i nan tin e nomber ei te n’e dia djawe. Tin mas cu cincu miyon Testigo di Jehova den tur e mundu. E oficina central di Testigo di Jehova na Estonia ta situá na Tallinn.”
E artículo a sigui: “E congregacion di proclamador di Jehova a ser establecí na Pärnu un aña i mei pasá. Na principio tabatin 25 miembro; awor el a aumentá te na 120 . . .
“E promé impresion ta basta positivo. E hendenan—casi tur pareha hóben—ta amabel, nechi bistí, i razonabel. Ta asombroso cu e yunan ta asina disipliná, pasobra no ta fácil pa un mucha sinta ketu den un solo lugá pa un ora i mei—pero nan ta hacié.”
Splicando e diferencia entre Testigo di Jehova i otro religion, e corant a bisa: “Nan ta enfatisá e Paradijs cu ta bini pronto. Tambe ta notabel ki bon e congregacion conocé e Bijbel, i nan ta cit’é na tur momento posibel.” Na conclusion e artículo a bisa: “E 120 hendenan ei, cu ta proclamador di Jehova, a tuma nan decision; i nan ta sigur cu esei ta e decision corecto. Nan fe i e proclamacion di dje ta e doel di nan bida.”
No tur hende na Pärnu a gusta e promé artículo aki den e seri cu nan a primintí tocante religion dje stad. Dia 8 di juli, 1995, e corant Pärnu Leht a informá: “Nos kier publicá un peticion cu nos a ricibí for di cuater religion en relacion cu e cuminsamentu di un columna nobo.” E peticion, of carta, dirigí n’e corant tabatin e firma di representantenan dje Iglesia Ortodox di Estonia, e Iglesia Luterano Evangélico di Estonia, e Union di Cristian Evangélico i Bautista di Estonia, i e Iglesia Metodista di Estonia.
E cuater representantenan religioso aki a keha: “Ta parce mashá straño pa nos cu boso a principiá e seri cu un artículo tocante Testigo di Jehova.” Ademas, nan a bisa: “En relacion cu e seri, nos kier bisa cu nos ta considerá cu ta imposibel pa duna entrevista na Pärnu Leht.”
E representantenan religioso a concluí: “Den un comunidad unda hopi hende ta keda confundí debí na presion agresivo di vários religion i secta nobo cu ta propagá ‘spiritualidad,’ nos ta mira e necesidad pa publicacionnan tuma na consideracion e situacion religioso local i ser capas pa distinguí entre religion histórico i secta i movementu extremista. E miembronan dje Concilio di Iglesianan di Estonia, cu ta representá iglesianan cristian cu ta disfrutá di cooperacion ecuménico, mester percurá un lus guiador suficientemente claro pa haci esei.”
Sin embargo, despues dje carta aki, e skirbidor di Pärnu Leht a presentá e siguiente opinion serio: “Tur loke nos ta considerá como corecto, kisas no ta corecto. I e punto di bista i opinion di Dios tocante vários congregacion kisas no ta e punto di bista dje cuater distinguido iglesianan aki, i vise versa. Ningun di nos ta infalibel, ni sikiera iglesianan cu tradicionnan di siglonan bieu.”
Con bo ta sintí bo tocante e cambio di actitud en cuanto religion den repúblicanan cu na ántes tabata dje Union Soviético? Nos tin e confiansa cu hende buscador dje berdad na tur parti ta apreciá e libertad di religion cu nan ta gosa ei awor.
[Mapa na página 23]
(For fully formatted text, see publication)
FINLANDIA
Helsinki
Laman Báltico
ESTONIA
Tallinn
Pärnu
LATVIA
Riga
LITUANIA
Vilnius
RUSIA
St. Petersburg
Moscú
BELARUS
Minsk
[Plachinan na página 24]
E congregacion di Testigo di Jehova na Pärnu