Agka Ompapayag ya Nabalang so Pokus Mo

1-2. Anggano importante so sakey ya bengatla, posible kasi ya atan so mangibalang na pokus tayo? Mangiter na ilustrasyon.

IMADYIN mo pa ya manmamaneho ka, insan biglan walay tinmawag ed cellphone mo. Ompan importante met iman ya tawag. Pero no ebatan mo, agka la laingen makapampokus ed panmamanehom. Antam ya diad saman ya bekta, mas importante ya akapokus kad dalan.

² Dakel so ontan ya situasyon ed bilay tayo—amay kaukolan tayoy mandesisyon no antoy mas importantin gawaen. Bilang Kristiano, dakdakel so responsabilidad tayo tan kaukolan tayon gawaen. Pero amta tayo ya say sankaimportantian et say panagdayew tayo ed si Jehova.a (Mat. 6:33) Singa samay punto na ilustrasyon diad parapo 1, agtayo labay ya nabalang so pokus tayo.—Pro. 4:25; Mat. 6:22.

3. Antoy pantongtongan tayo ed sayan artikulo, tan antoy nitulong to iya ed sikatayo?

³ Siempre, agtayo gagalaen ya paulyanan so panagdayew tayo ed si Jehova. Pero dakel natan so nayarin mangibalang na pokus tayo. (Luc. 21:​34-36) Pian agtayo napaulyanay panagdayew tayo, pantongtongan tayo sirin no anto ray nayarin mangupot na panaon tan biskeg tayo, no antoy ginawa nen Jesus pian aga nabalang so pokus to, tan no anto met so gawaen tayo natan pian aga nabalang so pokus tayo.

ANTO RAY NAYARIN MANGUPOT NA PANAON TAN BISKEG TAYO?

4-6. Anto ray nayarin mangupot na panaon tan biskeg tayo?

⁴ Nandurumay dadalanen tayo ed bilay ya kaukolan tayon iyulo. Singa bilang, ompan walay sakit mo, odino walay problema na pamilya yo. Siempre, importante iratan ya bengatla kanian duga met labat ya isipen tayo iratan. Pero no atan lay sankanonot tayo tan atan lay manguupot na panaon tan biskeg tayo, ompan napaulyanan tayo laingen so panagdayew tayod si Jehova.

⁵ Say arum met ed sikatayo et manaayam ed lugar ya ampetapetang so isyu ed politika, mairap so mananap na pambilay, wala ray onkakayat ya sakit, tan agmanunday gulo. (2 Tim. 3:1) Makaaru-arum iratan ed saray iisipen tayo, tan ompan onsabi ni ingen ed punto ya puros problema lay sankanonot tayo.

⁶ Seguro wala ray kabat mo ya aguloy bilay da nen walay dinalan dan ambelbelat ya problema. Normal labat ya na-stress tayo no ondadalan tayod mairap ya situasyon ta agpinalsa nen Jehova so too ya manirap tan manaburido. Kampegan say arum, no walay ambelat ya problema da, say pakalikna ra et singa ra nasisibletan tan walay kulang ed bilay da. Pian nalingwanan da kunoy problema da, iyuupot day panaon da ed panliliket tan ed nanduruman libangan. Antoy gawaen tayo no ontan so situasyon tayo? Makaaral tayod si Jesus. Nengnengen tayo no antoy ginawa to pian mansiansian akapokus ed panggaway linawa nen Jehova.

ANTOY GINAWA NEN JESUS PIAN AGA NABALANG SO POKUS TO?

7. Anto ray nayarin mangibalang komon ed pokus nen Jesus?

⁷ Diad panaon nen Jesus, dakel met so nayarin mangibalang ed pokus to. Wala ray isyu ed politika tan problema ed komunidad. Mair-irap so bilay na totoo tan dakdakel so mansasakit. (Mat. 14:14; Mar. 14:7) Papairapen ira na saray Romano tan saray kapara dan Judio. Nen anengneng na saray totoo ya walay pakayari nen Jesus ya manggawa na milagro, labay dan gawaen ya ari. (Juan 6:​14, 15) Sinali ingen nen Satanas ya patitan si Jesus pian natukso ya uleyan so interon mundo diad saman ya panaon. (Mat. 4:​8, 9) Tan nen imbaga nen Jesus ed saray disipulo to so amin ya dalanen ton irap, oniay imbaga nen apostol Pedro ed sikato: “Kasian moy sarilim, Katawan.” Singa ibabaga nen Pedro ed si Jesus ya nonoten to met so sarili to.—Mat. 16:​21, 22.

8. Antoy ginawa nen Jesus pian aga nabalang so pokus to?

⁸ Antoy ginawa nen Jesus pian aga nabalang so pokus to? Unona, inalig toy panagnonot nen Jehova. (Juan 8:28; 14:9) Komadua, amasya ed impanbangat tan impanpulong to. (Mat. 9:35) Tan komatlo, agton balot nilingwanan no antoy sankaimportantian ed bilay to. (Juan 4:34) Kanian tinanggian ton tampol so opresi nen Satanas. Tan anggano maong met so intension nen Pedro, agto dinengel. (Mat. 4:10; 16:23) On, aga nampaapekto si Jesus ed iisipen, ibabaga, tan gagawaen na arum. Talagan akapokus ed panggaway linawa nen Jehova. Sika ey? Anto ray nalilikas mo ya mangibabalang ed pokus mo? Ompan duma iratan ed saramay asali nen Jesus. Pero no aligen moy alimbawa to, seguradon agmet nabalang so pokus mo. Pantongtongan tayo sirin no panon tayon naalig so alimbawa nen Jesus.

ANTOY GAWAEN TAYO PIAN AGA NABALANG SO POKUS TAYO?

9. Antoy labay ya ibaga na samay nabasad Efeso 5:17 ya “itultuloy [tayon] tebeken no antoy linawa nen Jehova”?

⁹ Aral mo no panon ya mannonot si Jehova. Makatulong itan pian mainomay mon ‘natebek no antoy linawa to’ tan no antoy makapaliket ed sikato. (Basaen so Efeso 5:17.) Naamtaan mo no panon ya mannonot si Jehova no lanang mon basaen tan dalepdepen so Salita to. No kabisadoen moy panagnonot to tan mabulos kan manpaigiya ed sikato, natebek mo no antoy panlabayan to anggano anggapoy espisipikon ibabaga na Biblia ed situasyon mo.

10. Panon tayon nakabisado so panagnonot nen Jehova?

¹⁰ Nakabisado tayoy panagnonot nen Jehova no dalepdepen tayo ray salaysay ed Biblia ya pakaaralan tayo no panoy panagtrato to ed saray totoo. (Jer. 45:5) No babasaen mo so sakey ya salaysay, tepetan moy sarilim: ‘Antoy naaralan kod saya nipaakar ed si Jehova? Anto ray kaukolan kon umanen ed sarilik pian naalig koy panagnonot to?’ Siempre, ‘mas atagey so kanonotan nen Jehova nen say kanonotan tayo.’ (Isa. 55:9) Marakep sirin no ipikasi tayod sikato ya tulongan to tayon natalosan tan naalig so panagnonot to. (1 Juan 5:14) Ipikasi tayo met ya ibangat to tayon gawaen so linawa to.—Sal. 143:10

11. Antoy labay nen Jehova ya gawaen tayo?

¹¹ Labay nen Jehova ya akaparaan tayo parad isabi na anggaan. (Mat. 24:44) Agto labay ya masyado tayon manpaga ta nayarin atan laingen so mangibalang ed pokus tayo. (Mat. 6:​31, 32) Panon tayon naalig so panagnonot nen Jehova no wala ray panaaburidoan tayo? Diad tua, dakel so impaisulat ton bilin diad Biblia ya makatulong ed sikatayo. No aralen tan iyaplika tayo iratan, amta tayoy gawaen tayo no abupburido tayod panayaman tayo, pangalaan tayoy pambilay tayo, walay sakit tayo, tan arum nin problema ed pamilya. No mantiwala tayod sikato, insipan to ya ikdan to tayoy karunongan tan biskeg pian naanosan tayo ray subok.—Sal. 55:22; Pro. 3:​5-7.

12. Antoy gawaen tayo pian aga nabalang so pokus tayo anggano dakel so mauges ya nagagawad mundo? (Mateo 5:3)

¹² Mamasya kad panaglingkor mo. Normal labat ya panaburidoan tayo ray mauges ya nagagawad mundo. Pero siempre, agtayo iratan kontrolado. Pian aga nabalang so pokus tayo, marakep no mamasya tayod panaglingkor tan panagdayew tayod si Jehova. Tandaan tayo ya pinalsa to tayo nen Jehova ya walay espiritual ya pankaukolan tayo. Nalikna tayo labat so tuan liket no peneken tayo itan ya pankaukolan. (Basaen so Mateo 5:3.) Nagawaan tayo itan no makuli tayon aralen so Biblia tan no iter tayoy sankaabigan tayo diad pandadayew tayod si Jehova. No atan so panguusaran tayoy panaon tayo, seguradon napaliket tayoy Jehova.—Pro. 23:15.

13. Panon tayon ‘nausar ed sankaabigan so panaon tayo’?

¹³ Bibilinen itayo na Biblia ya ‘usaren tayod sankaabigan so panaon tayo.’ (Efe. 5:​15, 16) Aglabat iya ontutukoy ed no panon tayon apagen so oras tayod sanagew pian nasumpal tayoy amin ya kimey tayo. Say manunan tutukoyen to iya et no panon tayon uusaren so nakekeran panaon antis ya deralen nen Jehova iyan sistema na mundo. No upoten tayoy oras tayo diad idengel tan pambantay na mauges ya balita, nabalang so pokus tayo, onkapuy so liknaan tayo, tan naapektoan so seseg tayod panaglingkor. Limitaan tayo sirin so panaon ya uusaren tayod idengel tan pambantay na balita. Mas maabig no usaren tayoy panaon tan biskeg tayo parad si Jehova. No iyabuloy na situasyon tayo, manisip tayoy paraan pian napalaknab tan napaaligwas tayo ni ministeryo tayo. Singa bilang, anto kasi no aruman tayoy panaon tayo parad pan-RV? Samboten tayoy kada pankanawnawa ya tulongan iray totoo pian “niliktar [ira] tan nawalaan ira na suston kakabatan ed katuaan.”—1 Tim. 2:4.

14. No mamasya tayod panaglingkor, antoy nitulong to ’tan ed sikatayo? (Nengnengen met so litrato.)

¹⁴ No mamasya tayod panaglingkor, aga nabalang so pokus tayo anggano wala ray makapuy ya nagagawad mundo. Imbes ya ontakot tayo no nanenengneng tayoy gulo ed politika, ibabagsak na ekonomiya, tan ikakayat na sakit, mas ombibiskeg ingen so pananisia tayo ta amta tayon nasusumpal la iray propesiya ed Biblia. Paneknek iratan ya asingger lan sumpalen nen Jehova so gagala to parad sikatayo. Legan tayon aalagaren itan, makapanmatalek tayo ya tulongan to tayo nen Jehova pian mansiansia tayon kalmado tan makapan-anos tayo ni.—Sal. 16:8; 112:​1, 6-8.

15. No ‘limpioy kanonotan tayo,’ antoy epekto to ’tan ed sikatayo? (1 Pedro 4:7)

¹⁵ Agmo lilingwanan no antoy sankaimportantian ed bilay mo. Say sankanonot na totoo ed mundo natan et puros panliliket tan panagrelaks, tan anggapoy pibabali da ed manasingger lan isabi na anggaan. Tua, anggapo met so uges na panrelaks, pero say makapuy et no atan la so manguupot na panaon tayo. Anto sirin so gawaen tayo pian agtayo naalig so panagnonot na totoo ed mundo? Kaukolan ya ‘limpioy kanonotan tayo.’ (Basaen so 1 Pedro 4:7.) No say sakey et limpioy kanonotan to, maalwar ed panagdesisyon to, tan agto iyuupot so panaon tan biskeg to ed panliliket tan panagrelaks. Nanengneng ed saray desisyon to ya ikokonsidera to no antoy nibaga nen Jehova, tan sankanonot to no antoy sankaimportantian ed bilay to.—2 Tim. 1:7.

16. Anto nin siansiay sankanonot nen Jesus anggano manasingger lay ipatey to?

¹⁶ Anggan diad samay nakekera la ran oras na bilay nen Jesus diad dalin, say sankanonot to nin siansia et no panon ya makapanmatoor pian nasumpal toy ipapagawa nen Ama to. Anggano mair-irap so dadalanen to, labay to ya mansiansian alerto so nonot to, kanian tuloytuloy ya “nampikasin masimsimoon.” Saray disipulo to balet, akaugip ira. “Kinmapuy la rad paneermen da.”—Luc. 22:​39-46; Juan 19:30.

17. Akin et labalabay na dakel ya totoo natan so social media, pero antoy nayarin epekto to ’tan ed sikatayo? (Nengnengen met so litrato.)

¹⁷ Singa saray disipulo nen Jesus, ompan wala ray panaon ya nakekesawan tan onkakapuy tayo met. No nababalitaan tayo ray nagagawad mundo, agtayo napaliisay manaburido. Say gagawaen na dakel ya totoo natan, ibabaling da lay atension da ed social media pian nalingwanan da kunoy problema da. Uusaren da itan pian nanengneng na saray kakaaro tan kapamilya da iray litrato da tan saray nagagawad bilay da. Ditan met la ra manggagalaw na saray video games tan manbabantay na nanduruman video o palabas. Pero agda nalilikas, diad loob na sanagew, nanaupot la manayay panaon tan biskeg da ed social media. Sikatayo balet ey, kumustay panguusar tayo ed social media? Tepetan moy sarilim, ‘Kasin talagan narerelaks ak ed social media, o atan la laingey rason ya agko la nagagawaan no antoy sankaimportantian ed bilay ko?’

18. Akin et kaukolan tayoy manalwar no manpipili tayo na libangan?

¹⁸ Tua, marakep met no walay panaon tayon manrelaks ta makatulong itan pian nabawasay stress tayo. Pero kaukolan tayon limitaan so panaon tayo parad satan. Tan manalwar tayo ed saray pipilien tayon libangan, balanglan diad TV o Internet. Wala ray video ed Internet ya no kayarim ya bantayan et walan tampol so onsublay. Lapud agtayo napili so ompaway ya video, ompan makabantay tayo laingen na saray imoral tan bayolentin eksena. Ontan so agawad sakey ya brother ya tagad Asia. Nen unaan, manbabantay labat na saray antirikey ya video na pelikula. Pero ag-abayag, wala la ray pinmapaway ya video ya imoral so karga to. Makapaermen ta manlapud saman, ginmapo laingen ya manbantay na pornograpiya. Maong labat ta diad tulong na saray elder tan saray kakaaro to, nitunda to itan. In-delete to la ray apps ya pambabantayan to diad cellphone to, tan inistriktoan toy sarili to ed panguusar toy cellphone to. Naaralan tayo ed sayan eksperiensya ya anggan diad panagrelaks tan panagpili na libangan, agtayo dapat mankakampante. Kaukolan tayoy manalwar!

19. Antoy nagawa no ontetelek labat so bilay tayo ed pambakasyon tan pampasyar?

¹⁹ Say panagbakasyon tan pampasyar ey? Kaukolan tayo met so magmaliw ya balanse ed satan. Tua, makatulong itan pian makapanrelaks tan makapanpainawa tayo met ya sagpaminsan. Pero no ontetelek lay bilay tayo ed panagbakasyon tan pampasyar, laen to lay panaon tayo ya para komon ed saray mas importantin bengatla. (Fil. 1:10) Siempre, personal itan ya desisyon. Pero niay itepet tayod sarili tayo: ‘Kasin say panaon ya igaganak parad pambakasyon tan pampasyar et pakapatnagan ya balanse ak? Kasin seseguroen ko ya iyuunak iray mas importantin bengatla? Kasin ipaparaan koy sarilik ed isabi na “anggaan na amin a bengatla”?’

20. Akin et parad pankaabigan tayo lanlamang no gawaen tayoy anggaay nayarian tayo ya agnabalang so pokus tayo?

²⁰ No gawaen tayoy anggaay nayarian tayo ya agnabalang so pokus tayo, parad pankaabigan tayo lanlamang itan. (Isa. 48:17) Diad tulong nen Jehova, mas naanosan tayo ray subok ed bilay. Agtayo masyadon aburido anggano mauges iray nagagawad mundo. Tan nausar tayod duga so panaon tayo ta aliwan puros panliliket so sankanonot tayo. Itultuloy tayo sirin ya aligen so panagnonot nen Jehova, mamasya tayod panaglingkor, tan agtayo lilingwanan no antoy sankaimportantian ed bilay tayo. No gawaen tayo iratan ya amin, aga nabalang so pokus tayo, tan “nabembenan [tayon] malet so tuan bilay.”—1 Tim. 6:19.