Manmatalek Kad Sankatagyan ed Interon Uniberso

1. Anto ran subok so dinalan nen Job?

GRABEN subok so dinalan nen Job! Naupot so kayamanan to, inatey so amin ya ananak to, tan adapoan na makapadimlan sakit. Lapud sayan agawa, abalang so respeto na totoo ed sikato. Wala ray pinmasyar ya kakaaro to, pero imbes ya ligliwaen da, pinakapuy da laingen so liknaan to. Anggan say inar-aro ton asawa et akapansalita lay aliwa lapud graben ermen to. Kuan tod si Job: “Mudmoram so Dios pian ompatey ka la!” (Job 2:9; 15:​4, 5; 19:​1-3) No sikay walad kipapasen nen Job, ompan isipen mo ya pinaulyanan ka la nen Jehova tan anggapoy pibabali tod saray matoor ya lingkor to.

2-3. No ondadalan tayod subok, antoy nayarin isipen tan nalikna tayo, tan antoy pantongtongan tayod sayan artikulo?

² Manbibilay tayo ed “mapeligro tan mair-irap a panaon.” (2 Tim. 3:1) Kanian singa si Job, ondadalan tayo met natan ed grabe iran subok. No mantutumbokan lay problema, ompan wala may liknaan tayo ya singa makakasuko tayo la, tan isipen tayo ni ingen ya agto tayo inaro nen Jehova.

³ No ontan so naliliknam, agka komon nadidismaya. Isip moy agawad si Job. Apaneknekan ton mismo ya agpaulyanan nen Jehova iray matoor ya lingkor To. Kanian makapantiwala ka ya agka met paulyanan na Ama tayod tawen. Pian ombiskeg so tiwala tayo ed si Jehova, pantongtongan tayo so duaran punto ya naaralan tayo ed libron Job. Unona, si Jehova so Sankatagyan ed interon uniberso. Komadua, sarasarag na makapanyarin-amin a Dios tayo ya sumpalen so gagala to tan sarasarag to tayon protektaan ed espiritual tan pisikal.

INMARAP SI SATANAS ED SI JEHOVA TAN ED SARAY MATOOR YA ANGHEL

4. Siopa ray kaiba ed samay pantitipon ya abitla ed libron Job?

⁴ Aminsan, nantitipon iray “ananak na tuan Dios” tan inmarap ira ed si Jehova. Ibabaga na Job 1:6 ya “si Satanas et linma met a kaiba ra.” Diad Biblia, atan so sankaunaan ya beses ya inusar so tawag ya Satanas pian tukoyen so manunan kalaban nen Jehova. Atan so tawag ed sikato ta say kabaliksan na Satanas et “Sumusumpa.” Diad saman ya pantitipon, aliwa lan anak so turing nen Jehova ed si Satanas. Diad tua, nen imbaga nen Jehova imay walad Genesis 3:​15, malinlinew ya si Satanas et agla kaiba ed pamilya To diad tawen.a Manlapu lad saman, kakalabanen la nen Satanas si Jehova, saray matoor ya anghel, tan saray matoor ya totoo.

5. Antoy naaralan tayo no usisaen tayo may agawan pantitipon ya abitla ed libron Job?

⁵ Labay nen Jehova ya naamtaan tayo no antoy agawa diad saman ya pantitipon ed tawen kanian impaisulat to itan ed Biblia. No usisaen tayo itan ya salaysay, nanengneng tayo ya talagan sankaugesan tan sankatilaan si Satanas. (Job 1:9; ikompara so Apocalipsis 12:10.) Pero nia ni naaralan tayo: Lanang ya duga so panguusar nen Jehova ed autoridad tan pakayari to. Tan lapud sikato so Makapanyarin-amin, kanepegan ton ibaga no antoy sarag tan agsarag ya gawaen na arum.

KANEPEGAN NEN JEHOVA YA IBAGA NO ANTOY SARAG TAN AGSARAG YA GAWAEN NA ARUM

6. Diad samay agawan pantitipon ed tawen, panon ya impanengneng nen Jehova ya anggapoy mas atagey nen say sikato? (Job 1:​7, 8)

⁶ Basaen so Job 1:​7, 8. Impanengneng nen Jehova ed amin ya wadman ed saman ya pantitipon ya anggapoy mas atagey nen say sikato. Abasa to la so plano nen Satanas ya biktimaen so matoor ya lingkor Ton si Job. Kanian inunaan to lay Satanas. Oniay tepet to: “Naimanom tay lingkor kon si Job?” Imanoen tayo no panon ya inusar nen Jehova so pakayari to parad si Job.

7. Base ed Job 1:​10, 11, antoy papapawayen nen Satanas ya rason no akin ya manlilingkor iray totoo ed si Jehova?

⁷ Basaen so Job 1:​10, 11. Si Jehova so Sankatagyan ed interon uniberso, kanian walay pakayari tan autoridad to ya gawaen no antoy labay to, tan amta toy sankaabigan ya pangusaran to ed satan. (Jer. 32:17; Dan. 4:35) Pero inakusaan nen Satanas si Jehova ya aliwa kunoy panguusar to ed pakayari to. Singa ibabaga nen Satanas ya susuholan na Dios iray totoo, ya singa si Job, pian manlingkor ira ed sikato. Papapawayen met nen Satanas ya say rason no akin ya manlilingkor ed si Jehova iray totoo et lapud walay napipinawiran da ed sikato. Antoy reaksion nen Jehova ed sarayan akusasyon?

8-9. Antoy imbaga nen Jehova ya sarag tan agsarag ya gawaen nen Satanas, tan akin? (Job 1:12) (Nengnengen met so litrato.)

⁸ Basaen so Job 1:12. Inmabuloy si Jehova ya paneknekan nen Satanas so akusasyon to. Pero inikdan nen Jehova na limitasyon no anto labat so sarag ton gawaen. Oniay malinlinew ya imbaga nen Jehova ed si Satanas: “Amin a kayarian [nen Job] et walad limam. Basta sikatoy agmo didiwiten!” Arengel itan na amin ya anghel. Kanian anggapoy nagawaan nen Satanas noagta unoren itan ya ganggan. Agnayarin onlampas ed no anto labat so inyabuloy nen Jehova. Tan anggan diad panaon tayo, no anto labat so inyabuloy nen Jehova, aman labat so sarag ya gawaen nen Satanas. On, inusar nen Jehova so autoridad tan pakayari To pian naprotektaan si Job tan say mismon reputasyon To.

⁹ Pinmalpak so plano nen Satanas ta anggano nantutumbokan ya subok so indapo to, nansiansian matoor si Job ed si Aman Jehova. (Job 1:22) Pero agni kontento si Satanas.

10. Akin et inabuloyan nen Jehova si Satanas ya dapoan si Job na mas graben subok? (Job 2:​2-6)

¹⁰ Basaen so Job 2:​2-6. Nanisip si Satanas na mas graben subok ya idapo tod si Job. Imbaga nen Satanas ya “seguradon mudmoraen” nen Job so Dios no bilay to la so nalalanor. Pian naebatan lamet itan ya akusasyon, inabuloyan nen Jehova si Satanas ya gawaen tod si Job no antoy plano to. Pero oniay malinlinew ya imbaga nen Jehova: “Agmo aalaen so bilay to!” On, agnayarin pateyen nen Satanas si Job. Anggapoy nagawaan nen Satanas noagta unoren itan ya ganggan. Impanengneng lamet nen Jehova ya sikato so Sankatagyan ta no antoy inyabuloy to, aman labat so sarag ya gawaen nen Satanas.

“IMPANGANGGA NEN JEHOVA SO PANIIRAP NEN JOB”

11. Base ed Job 42:​10-13, nen anampot lay paniirap nen Job, panon ya benendisyonan nen Jehova?

¹¹ Basaen so Job 42:​10-13. Nen malinlinew la ya agbalot ikbanan nen Job so katooran to, pinatunda la nen Jehova si Satanas. Impangangga nen Jehova so paniirap nen Job. Naaralan tayod saya ya anggapoy pakayari nen Satanas ya pigilan so desisyon nen Jehova. Kanian anggano wala ni komoy labay ya gawaen nen Satanas ed si Job, agto la nayarin pibabalian iyan inad-aron lingkor nen Jehova.

12. Panon ya tutulongan nen Jehova iray lingkor to ya mantitiwala ed sikato? Mangiter na alimbawa.

¹² Diad sayan kaunoran iran agew, uusaren met nen Jehova so pakayari to pian tulongan iray lingkor to. Singa bilang, isipen pa imay 230 ya Tasi nen Jehova ed Germany nen 1945 ya kaiba ed samay kabkabat ya Nazi death march. Manlapud concentration camp et nanakar ira na arawrawi. Mair-irap tan makapataktakot so asagmak da. Pero anggapoy anggan sakey ya inatey ed sikara! Nen insalaysay da ed sakey ya dokumento so eksperiensya da, imbaga ra ya singa ra kuno saramay taloran Hebreo ya siningkat nen Jehova ed apoy. Aliklikna day proteksion nen Jehova kanian ag-ira kuno anggan naasyotan. Diad kabaliktaran, napno ira kuno na biskeg tan pakayari ya nanlapud si Jehova. Onia ni inyarum da: “Saksakey labat so pilalek na puso mi. . . . [Natan ta] niliktar kami la manlapud ungib na leon, komon ta makapanlingkor kami la ed si Jehova . . . ya anggad angga. Atan la so ipapasen mi ya sankabalegan ya bendisyon.”—Ikompara so Daniel 3:27; 6:22.

13. Antoy tandaan mo no ondadalan kad graben subok? (Nengnengen met so litrato.)

¹³ No maminsan, ompan pakalikna tayo et singa tayo met walad ungib na leon lapud graben subok ya aarapen tayo. (1 Ped. 5:​8-10) Ompan onkapuy so liknaan tayo tan isipen tayo, ‘Nasumpal ni ’ya kasi?’ No ontan so situasyon mo, dalepdep mo may agawa ed si Job. Makapantiwala ka ya talagan sarasarag nen Jehova ya panganggaen so paniirap mo—no bilang ta aliwan natan, seguradon gawaen to itan diad balon mundo. Wala lay agew ya inyeskedyul nen Jehova na panderal to ed sayan mauges ya mundo, tan agbalot ompayag ya ondere itan na anggan sakey agew!

INAR-ARO NEN JEHOVA IRAY MATOOR YA LINGKOR TO

14-15. Antoy pirpirawat nen Jehova ya gawaen parad saray matoor ya lingkor to, tan akin et makaseguro tayod satan? (Job 14:15) (Nengnengen met so litrato.)

¹⁴ Basaen so Job 14:15. Espisyal ed si Jehova iray matoor ya lingkor to. Mabmabli iran maong ed sikato. Kanian no walay ompatey ya lingkor to, pirpirawat ton bilayen lamet. Labay ton nasalatan na liket so ermen tayo.—Isa. 65:17.

¹⁵ Anggano asumpal lay impanirap nen Job, siempre asali to nin siansia iray problema ed sayan mauges ya mundo. Pero sinegurado nen Jehova ya nabendisyonan so impanmatoor to. Pinaabig toy Job, tan dakdakel so inter ton bendisyon—mas ni nen saray bendisyon ya naawat to antis ya nasubok. Diad tua, ‘patikim’ labat iratan ed saray gawaen nen Jehova parad si Job diad arapen. On, talagan labalabay nen Jehova ya magmaliw ya maliket iray matoor ya lingkor to. Insipan to ingen ya ikdan to ray bilay ya andi-anggaan diad paraison dalin. (Apo. 21:​3, 4) Atan ya premyo so pirpirawat ya iter ed sika na Sankatagyan ed interon uniberso. Kanian no walay dadalanen mon subok, atan komon so lanang mon nonoten pian onlemew so liknaan mo tan makapan-anos ka.

16. Anto ni sakey ya rason akin et makapantiwala tayo ed si Jehova?

¹⁶ Anggano asuldongan so bilay nen Job, inatey met lanlamang. Pero tandaan tayo ya si Jehova so Makapanyarin-amin ya Dios tan Sankatagyan ed interon uniberso, kanian sarasarag ton paolien iray inatey. (Deu. 32:39) Wala lay panaon ya inggeter to pian bilayen iray inatey ya inad-aro to. Tan no nasabi la itan, anggapon balot so makaamper ed sikato!—Roma 8:​38, 39.

MANMATALEK KAD SI JEHOVA

17. Anto ray prueba ya agbalot napatunda nen Satanas iray lingkor nen Jehova?

¹⁷ Naaralan tayod libron Job ya dakel so rason tayon manmatalek ed si Jehova. Anengneng tayo ya anggan antoy gawaen nen Satanas, agton balot napatunda iray lingkor nen Jehova. Diad panaon tayo, inmabot la ed siameran milyon so matoor ya manlilingkor ed si Jehova. Prueba iya ya sikato so Sankatagyan! On, manlapu la nensaman, ‘agtinmalona so antokaman ya armas’ ya ginawa na saray kalaban sumpad saray lingkor na Dios. (Isa. 54:17) Diad pakanengneng na saray makapanyarin gobierno tan saray lider na relihyon, anggapoy kalaban-laban tayo, pero agda tayo napatunda diad pandadayew tayo. Tuloytuloy tayon ipupulong so katuaan ya si Jehova so tuan Dios, tan ipapaamta tayod totoo ya matila tan managpatey si Satanas. Tan anggano ompatey tayo, agto labay ya ibagan apatunda itayo la nen Satanas. Ta no inatey tayon matoor, seguradon bilayen itayo nen Jehova diad arapen.—Os. 13:14.

18. Akin et agtayo dapat pampagaan iray nagawad arapen?

¹⁸ No dalepdepen tayoy istoryay bilay nen Job, ombiskeg so tiwala tayod si Jehova tan agtayo pampagaan iray nagawad arapen. No baleg a kairapan la, atakien nen Satanas tan saray alipores to iray lingkor na Dios. Say amta da, matmainomay da tayon taloen tan upoten. Pero alingolingo ra! Singa agawa ed panaon nen Job, ipanengneng nen Jehova ya sikato so Sankatagyan tan kontrolado to so situasyon. Aga ompayag ya permanentin deralen tan upoten nen Satanas iray lingkor To. Asingsingger To lan panampoten so amin ya paniirap tayo ya resulta na impanrebelde nen Satanas. Ikulong si Satanas tan saray demonyo diad kaaralman ed loob na 1,000 taon. (Luc. 8:31; Apo. 20:​1-3) Kayari na 1,000 taon, deralen la nen Jehova si Satanas tan amin ya rebelden kakaiba to. (Apo. 20:10) Nagawa la imay impropesiya nen Jehova ya namekmek so ulo nen Satanas. On, talagan anggapo la!—Gen. 3:15; Roma 16:20.

19. Anton premyo so manaalagar ed saray lingkor nen Jehova ya manmamatalek ed sikato? (Nengnengen met so litrato.)

¹⁹ Eksayted tayo lan manbilay ed balon mundo! Ditan et perpekto lay amin ya totoo tan malikeliket lay bilay—mas ni nen say iisipen tayo. Tooren la nen Jehova iyan sipan to: “Gagawaen kon balo so amin a bengatla.” (Apo. 21:5) Imadyin mo pay bilay no nagawa la itan. Sa wakas, anggapo lay Satanas tan saray demonyo to! Anggapo lay mangimpluensya ed sikatayo ya manggaway mauges, kanian makainawa tayo la. Seguradon masamsamit lay ugip mo ta anggapo lay sankanonot mon problema. Tan no sakey ka ed saray akaliktar ed Armagedon, nanengneng mon mismo so iyabig na saray mansasakit. Abeten mo la iray apaoli ya inad-arom! On, naeksperiensya tayo la imay klase na bilay ya pirpirawat nen Aman Jehova parad sikatayo.

20. Antoy determinadom ya gawaen?

²⁰ Anggan anto ni tay subok ya sungdoan tayo diad sayan kaunoran iran agew, komon ta itultuloy tayoy manmatalek ed si Jehova tan agtayo onsasawan suportaan so soberanya to. Ipanengneng tayod kabibilay tayo ya inar-aro tayoy Ama tayo tan aliwan tua iray akusasyon nen Satanas. No mansiansia tayon matoor ed si Jehova, say Sankatagyan ed interon uniberso, seguradon sakey tayo ed saray makaawat na premyo ya pirpirawat to lan iter ed saray matoor ya lingkor to!