Tepet na Saray Manbabasa

Kapigan ideklara na saray bansa so “kareenan tan kaligenan”?

Diad “Tepet na Saray Manbabasa” ya pinmaway ed agano nin isyu na Say Panag-bantayan,a naamtaan tayo ya asingsingger lan iyan nen Jehova ed kapusoan na samay “samploran saklor” (amin ya gobierno) so “kanonotan to.” Atan may pangiter day pakayari tan autoridad da ed “ambalbalangan atap ya ayep” odino “imahen na atap ya ayep”—say United Nations. (Apo. 13:​14, 15; 17:​3, 16, 17) No nagawa la itan, deralen la na “samploran saklor” tan say binmiskeg ya atap ya ayep so amin ya palson relihyon ed interon mundo. Say tepet balet, kapigan ideklara na saray bansa so “kareenan tan kaligenan”?b Kasin say pangideklara da ed satan et antis ya naderal so palson relihyon o no aderal la so palson relihyon?—1 Tes. 5:3.

Say simplin ebat et agtayo amta no kapigan so eksakton pangideklara na “kareenan tan kaligenan.” Ta no amta tayoy amin ya detalye, agla komon aminpigan binilin nen Jesus iray papatumbok to ya “mantultuloy kayon manbantay.” Importante sirin ya mansiansia tayon alerto tan akabantay. (Mat. 24:42; 25:13; 26:41) Imanoen tayo pa nin maong imay propesiya ya impaisulat nen Jehova ed si apostol Pablo ya nabasad libron Tesalonica.

Insulat nen Pablo: “Diad panaon ya ibabaga ran, ‘Kareenan tan kaligenan!’ diad satan et tampol ya onsabid sikara so biglan kadederal.” (1 Tes. 5:​2, 3) Dati, nabasa ed saray publikasyon tayo ya say pangideklara ed “kareenan tan kaligenan” et nagawa antis mismo na baleg a kairapan. Inisip tayo ya atan so tanda ya onggapo lay baleg ya kairapan tan naderal la so amin ya palson relihyon—say Makapanyarin Babilonia.

Pero nen inaral ya maong iyan propesiya, ompapaway ya say pangideklara ed “kareenan tan kaligenan” et posiblin nagawa no aderal la so amin ya palson relihyon. Akin et ontay nibaga tayo? Imanoen irayan tepet.

Antoy sakey ya rason akin et wala ray nagagawan guerra? Manlapu la nensaman, susuportaan na saray palson relihyon so guerra tan terorismo. Oniay ibabaga na Biblia nipaakar ed “maimpluensyan imoral a bii” o Makapanyarin Babilonia: “Aromog ed sikato so dala na . . . amin iramay pinatey diad dalin.” (Apo. 17:​1, 5; 18:24) Lapud sayan maimpluensyan imoral a bii, minilyon ya totoo so inatey. Kanian aliwan kareenan tan kaligenan so ipapaseseg to, noagta gulo tan panlalaban. No ontan sirin, posible ya say pangideklara na saray bansa na “kareenan tan kaligenan” et no aderal la so Makapanyarin Babilonia. Nayarin ontan so nagawa, pero agtayo segurado.

Antoy nagawa kayarin ideklara so “kareenan tan kaligenan”? Oniay imbaga nen Pablo: “Diad satan et tampol ya onsabid sikara so biglan kadederal.” (1 Tes. 5:3) Amay “sikara” ya tutukoyen dia nen Pablo et saray gobierno ed interon mundo ya mangideklara na “kareenan tan kaligenan.” No sayan deklarasyon et nagawa antis ya naderal so palson relihyon, wala ni onlabas ya panaon antis ya naderal iray gobierno. Pero base ed samay imbaga nen Pablo, no indeklara la so “kareenan tan kaligenan,” ompapaway ya tumbokan itan ya “tampol” na pakaderal na saray gobierno. ‘Bigla’ labat itan ya nagawa! No ontan sirin, posible ya say pangideklara na saray bansa na “kareenan tan kaligenan” et no aderal la so palson relihyon.

Antoy reaksion na saray lingkor nen Jehova no nanengneng dan nagagawa la irayan propesiya? Inkuan nen Pablo: “Agagi, anggapo kayod kabilungetan pian nasabian na satan ya agew, aliwan singa saray matakew a nasabian na liwaway agew.” (1 Tes. 5:4) Isipen pa: No say pangideklara ed “kareenan tan kaligenan” et nagawa no aderal la so palson relihyon, malinlinew la ed nonot na saray lingkor na Dios ya say onsublay lan nagawa et say panderal ed saray gobierno. Pero saray gobierno ed interon mundo, kakkampante ira lapud anggapod isip da ya sikara so ontumbok ya naderal. Say kaderal da et singa isabi na matakew, bigbigla tan agda natalaranan!

Anto sirin so iilaloan tayon nagawa? Diad arapen, deralen na “samploran saklor” tan say binmiskeg ya atap ya ayep so amin ya palson relihyon. Atan so gapoan na baleg ya kairapan. Amta tayo met ya onsabi panaon, ideklara na saray bansa so “kareenan tan kaligenan.” Apantongtongan tayoy duaran posibilidad no kapigan itan nagawa. Unona: Nayarin say pangideklara da na “kareenan tan kaligenan” et antis ya naderal so palson relihyon. Komadua: Posiblin ideklara da itan no aderal la so palson relihyon. Agtayo amta so amin ya detalye, kanian kaukolan tayoy manalagar no anton talagay nagawa. Mas natalosan tayo iray propesiya ed Biblia legan iratan ya nagagawa o no asumpal la iratan.—Ikompara so Juan 12:16.

Legan tayon aalagaren so pakasumpal na saray propesiya, say importante et manmatoor tayod si Jehova. Anggano agtayo amta no kapigan so eksakton pangideklara na “kareenan tan kaligenan,” “mansiansia itayon aliing tan mantultuloy itayon manlikas” pian akaparaan tayo anggan antoy nagawa.—1 Tes. 5:6.