Alig Moy Obadias—Takotan Moy Dios nen say Too

Si Obadias so mangaasikaso ed sankaabungan nen Arin Ahab. Mauges ya ari si Ahab ta pinaulyan ton onkayat ed interon Israel so panagdayew ed palson dios ya si Baal. Duma balet si Obadias ta “manlapu lad inkaugaw” to et tatakotan toy Jehova. (1 Ara. 18:​1-13) Kanian nen labay ya pateyen nen Reyna Jezebel so amin ya propeta nen Jehova, kinmiwas ya tampol si Obadias. Nampakpel tan nanggaway paraan pian naamper so mauges ya plano nen Jezebel. Inyamot toy 100 ya propeta tan sinuplayan to ray naakan legan na panaoy eras. Isip mo pa: Delikado so mangiyamot na anggan sakey labat ya propeta, di lalo la no 100! Sakey ni, sikatoy apaliberan na dakdakel ya palson propeta. Imadyin mo pay impansagpot tan impanalwar ya maong nen Obadias pian agda pansuspetsaan tan agda idalem ed ari tan reyna.—1 Ara. 18:19.

Antoy naaralan tayod si Obadias? Seguradon tinmakot met si Obadias ed si Ahab, pero mas antakot toy Jehova. Atan so rason no akin ya makmakpel ton inrisgay bilay to pian naprotektaan iray lingkor na Dios. No manaayam kad bansa ya ilegal so panagdayew ed si Jehova, ipanengneng mo met ya mas antakot moy Dios nen say too. Atan ya klase na takot so mamakiwas ed sikan tulongan tan suportaan iray agagi tayo ya ondadalan ed mair-irap ya subok.