“Saray Ananak et Tawir Manlapud si Jehova”

ANTOY naisip mo no nabitlay salitan “tawir”? Kasin dalin, abung, o kayamanan ya impatawir ed sika na kapamilyam? Antokaman so naawat mon tawir, seguradon asikasoen tan alwaran mo lapud mabmabli tan importante itan ed sika.

Ibabaga na Biblia ya “saray ananak et tawir manlapud si Jehova.” (Sal. 127:3) Parad saray Kristianon atateng, mabmablin regalo nen Aman Jehova iray ananak da. Kanian gagawaen day anggaay nayarian da pian nitaryay materyal, emosyonal, tan espiritual ya pankaukolan da.

Makapaermen balet ta wala ray atateng natan ya agda ipapasen ya regalo na Dios iray ananak da. (Isa. 49:15; 2 Tim. 3:1-3) Say arum balet, inar-aro da ray ananak da, pero irap da ran asikasoen lapud nanduruman rason. Anto ran subok so aarapen na saray atateng? Antoy iilaloan nen Jehova ed sikara? Antoy makatulong pian nagawaan day responsabilidad da bilang ateng?

ANTO RAY SUBOK ED ATATENG?

Opinyon na kapamilya tan komunidad. Diad arum ya bansa, mas baleg so respeto dad sika no dakel so anak mo. Kanian ompan na-pressure iray sanasawa ya nawalaan na dakel ya anak anggano agda met nalegpet ya amin ta sankanonot day ibaga na kakanayon tan kakaabay da.
Mapagpaga rad arapen. Wala ray bansa ya dakel so ompapatey ya ugugaw lapud malnutrisyon, sakit, tan makapuy so serbisyo na saray ospital. Lapud ontay nagagawa, iisipen na saray atateng ya mas maong so nawalaay dakel ya anak pian walan-walay nakeran anak da. Say arum balet et ginagala day mananak na dakel pian wala kunoy mangasikasod sikara no ontatken la ra. Maslak et ontay panagnonot na atateng ya manaayam ed bansan anggapoy tulong ya iiter na gobierno ed saray maedad.
Pamplano na pamilya. Diad arum ya lugar, limitado labat so produkto ya nausar pian naiwasan so panlukon. Tan anggano wala, abeba balet so kalidad to. Kanian say arum, natatakot ya mangusar ta ompan wala kunoy side effect to. Say arum balet et ag-ira makasaliw ta mabmablin maong.a

ANTOY IILALOAN NEN JEHOVA ED SIKAYO RAN ATATENG?

Pamilya ya manba-bonding diad park. Kaistoryaan na tatay so anak dan bii ya tinedyer la tan ondedengel ya maong ed ibabaga na anak to; kagalaw na nanay so yugtan ya anak dan laki. — Walan-wala komoy panaon yon nakaiba tan nakaistoryaan so kada anak yo

Itarya yoy materyal ya pankaukolan na ananak yo. Saray atateng so angiteran nen Jehova na responsabilidad ya asikasoen iray pankaukolan na ananak da. Iilaloan to ya mankuli iray atateng pian walay naakan, kawes, tan panayaman na menor-de-edad ya ananak da. Importante met ed si Jehova ya bangatan da iray ananak da pian ombaleg iran makalakal. Kanian imbes ya panaralen da ra ed arawi, mas marakep no kaamong da iray ananak da pian nalikna ran walay mangaaro tan manproprotekta ed sikara, tan natulongan da ran nawalaay skill ya pansuporta dad sarili da no adulto la ra. Pero siempre, ag-iilaloan nen Jehova ya dapat et mayaman iray atateng pian nagawaan da itan ya responsabilidad da. Diad tua, say pinili nen Jehova ya magmaliw ya ateng nen Jesus diad dalin et sanasawan mairap so bilay da, pero maasikaso tan makuli ira.—Mat. 13:55, 56; Luc. 2:24.

Prinsipyo ed Biblia: “No walay siopaman ya agto tataryaan iramay walad pudir to, nagkalalo la iramay membro na pamilya to, impulisay to lay pananisia tan alabas ni nen say toon anggapoy pananisia to.”—1 Tim. 5:8.

Amta nen Jehova ya no ontatken la ray atateng, kaukolan ya wala lay mangasikasod sikara. Diad tua, say sakey ya paraan pian napagalangan na ananak iray atateng da et no seguroen dan naasikaso ira diad itatken da. (Exo. 20:12; 1 Tim. 5:4) Pero tandaan, naliliketan si Jehova no say manunan sankanonot na atateng et no panon dan naasikaso iray ananak da, aliwan no panon iran asikasoen na ananak da no matatken la ra.—2 Cor. 12:14.

Itarya yoy espiritual ya pankaukolan na ananak yo. Responsabilidad met na atateng ya ibangat iray ananak da ya aroen tan panlingkoran si Jehova. Parad si Jehova, aya so sankaimportantian ya naibangat na atateng ed ananak da.—Deu. 6:6, 7.

Prinsipyo ed Biblia: “Itultuloy yo ran pabalegen [iray ananak yo] diad disiplina tan panamilin nen Jehova.”—Efe. 6:4.

TULONGAN KAYO NEN JEHOVA

Sanasawa ya mantotongtong diad abung da. Walay akalukas ya Biblia diad lamisaan ya walad arapan da. — Pantongtongan yo lan masakbay no pigaran anak so labay yo

Manplano. No labay yon sanasawa so nawalaay anak, isip yo nin maong so situasyon yo. Singa bilang, no dakel so labay yon anak, kasin napakan tan nabangatan yo ran amin, tan niiter yoy arum nin pankaukolan da? No andi, maabig no pantongtongan yon sanasawa no pigaran anak so sarag yon asikasoen diad paraan ya labay nen Jehova. Pero no maminsan, anggano wala met so plano yo, ompan ag-itan natumbok. Natatalosan nen Jehova ya wala ran talagay ag-iilaloan ya nagawa. (Ecl. 9:11) Pero no gawaen yoy anggaay nayarian yon magmaliw ya maong ya ateng, seguradon tulongan to kayon napabaleg tan naasikaso iray ananak yo.

Prinsipyo ed Biblia: “Saray plano na makuli et seguradon ontalona, balet amin iramay magangganat et seguradon mansumpal ed kairapan.”—Pro. 21:5.

“Siopad sikayo so malabay a mangipaalagey na tori ya agni onyurong ya unona tan kuentaen toy nagastos pian naseguro to no kasin walay magenap a panumpal tod satan?”—Luc. 14:28.

Iyuna yoy Jehova ed bilay yo bilang pamilya. Komon ta say sankaimportantian ed pamilya yo et say pandayew ed si Jehova. No wala lay anak yo, pansagpotan yon tulongan so kada sakey ed sikara ya naaro day Jehova. Diad aral, ibangat yo iran mandeen tan ondengel ya maong pian makaaral met ira. Agyo papaulyanan ya onlabas so sakey simba ya agkayo akapan-family worship. Ibangat yo met iray ananak yon manpulong. Amin iratan et responsabilidad yo. Agyo itan ipapasa ed panguloan iran ananak yo, kakanayon yo, o arum ni. Tua, kaukolay anos tan panaon pian naaro na ananak yo si Jehova. Pero nabawbawi yoy sagpot yo no nanengneng yon malikeliket ya manlilingkor ed si Jehova iray ananak yo.

Prinsipyo ed Biblia: “Anggapo lay mas panliliketan ko nen say saya: a narengel kon manaakar ed katuaan iray ananak ko.”—3 Juan 4.b

Manmatalek kayo ed si Jehova. No plano yoy nawalaay anak, odino wala lay anak yo, tandaan ya mas importante no antoy nalilikna nen Jehova nen say ibaga na arum tan no antoy apasalan ed lugar yo.

Collage: 1. Atateng ya kaabay day anak da legan na aral. Intagey na anak so lima to ta labay toy mankomento. 2. Pamilya ya saniiban manpupulong. Kaulop na tatay so tinedyer ya anak dan bii, tan kaulop na nanay so duaran yugtan ya anak da. — Kaukolan so anos tan panaon pian naaro na ananak si Jehova

No nandesisyon kayo ya daiset labat so magmaliw ya anak yo, mantiwala kayo ya agkayo paulyanan nen Jehova no onakulaw odino onmasiken kayo la. Agkayo manpapaimpluensya ed iisipen na arum ya manpamilya ira pian wala kunoy mangiter ed sikara na mainawan bilay diad itatken da. Agkayo natatakot ya ompan onsabi panaon et anggapoy mangasikaso ed sikayo. Insipan nen Jehova ya asikasoen to kayo, tan tooren ton tooren itan.—Jos. 23:14.

Prinsipyo ed Biblia: “Manmatalek ka ed si Jehova diad interon pusom, tan agka mandedepende ed dilin pakatalos mo. Diad amin a dalan mo et sikatoy nonoten mo, tan gawaen ton maptek iray basbas mo.”—Pro. 3:5, 6.

“Nensaman et ugaw ak ni tan natan et matatken ak la, balet anggapo ni anengneng kon matunong ya apaulyan, odino saray ananak to a mipapayabol na naakan.”—Sal. 37:25.

“Itultuloy yo sirin ya anapen nin unona so Panarian tan say inkatunong To, tan sarayan amin a bengatla et niarum ed sikayo.”—Mat. 6:33.

Bibidbiren na saray Kristianon atateng ya saray ananak et mabmablin regalo nen Jehova. Labalabay dan napaliket si Jehova tan mas importante ed sikara no antoy nalilikna to. Seseguradoen da ya naitarya day materyal, emosyonal, tan espiritual ya pankaukolan na kada anak da, tan iplaplano dan maong so karakel na anak da anggano aliwan ontay normal ed lugar da. On, no ontay gawaen na saray atateng, ipapanengneng dan inar-aro da ray ananak da tan ipapasen da ran “tawir manlapud si Jehova.”

Maliket Ira ed Desisyon Da

Kasin pakaskasi iray atateng no mandesisyon ira ya melag labat so pamilya ra? Napapaisip so dakel ya atateng ed sayan tepet, lalo la iramay manaayam ed mairap ya bansa. Imanoen no antoy imbaga na pigaran responsablin ulo na pamilya ya tagad sarayan lugar.

A-pressure kayo met ya nawalaay dakel ya ananak?

“On. Wala ingen iray agagi ya ontay ipapaseseg da. Aminsan, walay akatongtong min sanasawa tan tinepet da no akin et saksakey labat so anak mi. Ta diad sikami ed Africa, singa anggapo kuno lanlamang so anak mo no saksakey labat. Tan no duatduara met, singa labat kuno saksakey. Diad tua, nen akaduaan mi may anak mi, say labay na totoo, aruman mi ni!”—Jeremias

Kasin aproblema kayo laingen ta melag so pamilya yo?

“Andi. Diad tua, lapud duatduaray anak mi, agkami nairapan nen asawak ya itaryay pankaukolan da. Tan say mas importante, mas naasikaso mi so espiritualidad na pamilya mi. Diad tua, binmaleg ak ed baleg ya pamilya. Amayamay kamin sanaagi, tan anengneng koy irap ya dinalan nen Nanay tan Tatay pian labat napakan tan makapanaral kami.”—Jeremias

Antoy kuan met na ananak yod desisyon yo ey?

“Amay duaran ananak mi, misatsalamat ira ta naas-asikaso ran maong. Agda kuno asali so irap tan problema ya dadalanen na ananak ya nanlapud baleg ya pamilya.”—Filipe

“Malikeliket iray ananak mi ta aliklikna day panangaro tan ag-ira apaulyanan. Mabetbet kamin mangiimbita na saray maespiritual ya agagi. Balibali alimbawa ra, tan pinaseseg da kamin pamilya ya nawalaay goal ed espiritual. Lapud maseseg iray akaulop na ananak mi, onman met so nagmaliwan da.”—Carlos

Anto ray anengneng yon gunggona ta daiset labat so anak yo?

“Mas mainomay ya taryaan so melag ya pamilya. Ontay nibagak ta anggano nakal ak ed trabaho tan melag lay nanaalmok, agkami masyadon nanaburido ta daiset kami labat.”—Jeremias

“Agkami nairapan nen asawak ya itaryay materyal tan espiritual ya pankaukolan na ananak mi. Mas atutokan tan naasikaso mi ra. Asali mi ingey namboluntaryo ed nanduruman lugar ya baleg so pankaukolan. Makakaliket kami lapud Tasin amin so ananak mi tan manpapausar irad si Jehova.”—Lenadi

Anto met so labay yon tandaan na saray kapara yon atateng?

“Amay walad Salmo 34:10: ‘Saramay manaanap ed si Jehova et ag-onkulang na antokaman a maabig.’ Apaneknekan ko ya tua ’tan. Talagan intarya nen Jehova so amin ya pankaukolan na pamilya mi.”—Rafael

a No pamplano na pamilya so pantongtongan, akauley so sanasawa ya mandesisyon—no kapigan ira nawalaan na ananak, no pigaray labay da, tan no kasin mangusar iray produkto pian naiwasan so panlukon. Personal itan ya desisyon na sanasawa kanian ag-itan nepeg ya kuestionen na arum. (Roma 14:4, 10-13) Makatulong met imay bilin ya walad 1 Corinto 7:3-5 no mandedesisyon so sanasawa nipaakar ed saya.

b Diad sayan bersikulo, say tutukoyen nen apostol Juan ya “ananak” et saray Kristiano ya impasen ton espiritual ya ananak to. Pero amay alikna to et nalilikna met na saray atateng no saray ananak da et manlilingkor ed si Jehova.