Direktan Imbitasyon

1. Kapigan onggapo so pribilehyo tayon mangimbita parad kombension?

¹ No mangipaparaan kay espisyal a panangan parad kaaro odino kapamilyam tan talagan nansagpotan tan ginastosan mo, seguradon malikeliket tan maligligsa kan mangimbita. Nansagpotan met tan imparaan a maong so espiritual a piestan nagawad kombension tayo. Taloran simba antis na kombension, iikdan itayo nen Jehova na pribilehyon imbitaan so arum pian makaatendi met ira. Antoy ontulong pian malikeliket tan maligligsa tayon mangimbita?

2. Antoy mamakiwas ed sikatayon sigpot a mibiang ya mangimbita?

² No nonoten tayo no panon tayon personal ya nagugunggonaan ed saray ibabangat nen Jehova ed saray kombension tayo, napakiwas tayon sigpot a mibiang ed kampanya. (Isa. 65:13, 14) Agtayo met lilingwanan ya wala ray maabig a resulta na tinaon ya kampanya tayo. (Nengnengen so kahon ya “Wala ray Maabig ya Resulta.”) Tua, aliwan amin ya iimbitaan tayo et onatendi. Tan dakel man o daiset so onatendi, say importante et nidadayew tayoy Jehova ed saray sagpot tayo legay kampanya tan naaalig tayoy kamaongan to.—Sal. 145:3, 7; Apo. 22:17.

3. Panon ya ibunog iray imbitasyon?

³ Say ulop na mamatatken so manplano no panon a malaknab ya nibunog na kongregasyon iray imbitasyon, no kasin mangitilak na imbitasyon ed saramay anggapod abung, odino iyopresi met iratan legan na panagpulong ed publiko diad teritorya. No iyopresi iray magasin no Sabado tan Simba, ilaktip iray imbitasyon no matukoy. Kayari kampanya, seguradon maliket tayo ta amta tayon maligligsa tayon akibiang tan dakdakel so kaiba tayon akidungod espiritual a ponsia ya intarya nen Jehova!

Wala ray Maabig ya Resulta

Pigaran taon lay apalabas, walay sakey a sister ya kaiban angibunog na imbitasyon, iisipen to no kasin nabawi sagpot ed pangiimbita tayo. Nononoten to no talaga kasin onatendi iray totood kombension tayo. Diad Sabadoy kabuasan na kombension, walay naimano ton lakin Sikh ya asingger ed yurongan to, kanian akikabat. Naamtaan ton inmatendi ta akaawat na imbitasyon. Dakel so tepet to ya naebatan na sister. Imbaga na laki ya labalabay toy programa tan bilib ed panangawes tan kondukta na saray inmatendi. Diad saman lanlamang ya agew, akatongtong met na sister so sanasawan akayurong ya asingger ed sikato. Akaawat met iray imbitasyon tan nan-bus ni ra pian makaonlad kombension. Naliliketan irad kombension kanian implano day onatendi lamet na Simba. Kanian amoria na sister ya importantin maong iray tinaon ya kampanya tayo.
Diad agano nin kombension, akikabat so sanasawan regular payunir ed matatken lan sanasawa tan naamtaan dan aman da labat asali inmatendi. “Siopay angimbitad sikayo ey?” so intepet na sarayan payunir. “Walay anengneng min imbitasyon ed puerta mi kasabi mid abung,” so kuan da. Binasa tan sinulatan da ni ingen imay form ed beneg na imbitasyon. Nen panangugto la, wala ray agagin angiter na kanen da. Agustoan da ray programa kanian implano day ompawil ed ontumbok ya agew. Insan niyeskedyul so ibisitad sikara pian bayuboay interes da.