Sano Dumay Lenguahe na Unabung

1. Akin a lalon kaukolay kooperasyon sano kikimeyan so teritorya?

¹ Ondarakel so manangipalapag na Panarian ed interon mundo a makakaromog na interesadon totoo a mansasalita na lenguahe a duma ed salita na kongregasyon da. Ta pian natulongan iratan ed espiritual a paraan, dakel a sanga so makakaimano a nakaukolan so pamorma na grupo tan kongregasyon a sananey so lenguahe. Lapud nayarin walaray pigaran lenguahe ed sakey a lugar, ompan manpupulong ed parehon teritorya so pigaran kongregasyon a nanduruma so lenguahe. Panon a makapankokoopera iray kongregasyon ta pian naseguro a mauksoy so panagpulong?​—1 Cor. 14:33.

2. Sano mankakabkaabungan, panon itayon mikoopera ed grupo odino kongregasyon a manguusar na duman lenguahe ed lugar tayo?

² Kooperasyon: Sano manpupulong diad karsada odino ed impormal a paraan, kaukolan a say manangipalapag so agmasuyat ya onasingger ed siopaman, pati iramay mansasalita na sananey a lenguahe, tan mangiyopresi na literatura ed lenguahe a pilien na too a basaen. Balet, sano mankakabkaabungan ed teritoryan kikimeyan met na grupo odino kongregasyon a sananey a lenguahe, kaslakan a say pangiyapasakeyay imano na manangipalapag et saray totoon kapara na kongregasyon to so salita ra. Sano nanduruman kongregasyon so manpupulong ed parehon teritorya, importante so maabig a rekord. Saray manangasikaso na serbisyo so nepeg a mantatalosan tan manpapaknaan ed saray pamaakaran. (Uli. 11:14) Balet, no walay mansasalita na sananey a lenguahe a nakatongtong legan a mankakabkaabungan tan anggapoy asingger iran kongregasyon a mansasalita na ontan a lenguahe, say manangipalapag so nepeg a manggunaet a mangiter na pantasi tan mansubaybay ed interes.

3. Antoy gawaen tayo no nibanan akabansag tayon mankikimey ed parehon teritorya so sakey a grupo odino kongregasyon a mansasalita na duman lenguahe?

³ Parehon Kimey: Panon a naasikaso iray pamaakaran sano saray manangipalapag ed nanduruman kongregasyon et nibanan nambansag a manpupulong ed parehon teritorya? Siempre, say aro et talonaan toy antokaman a panduruma na lenguahe, tan amin so kaukolan a makonsidera ed pankaukolan na saray totoo ed teritorya. (Juan 13:34, 35) Kanian, saramay mangidadaulo so mangipatnag na inkamakatunongan tan aro diad pandeside no kasin say sakey a grupo et kaukolan a temporaryon onalis ed sananey a teritorya.​—Sant. 3:17, 18.

4. Anton propesiya so nasusumpal natan?

⁴ Impropesiya na Biblia a saray totoo a nandurumay pansasalita so makarengel ed maong a balita. (Apo. 14:6, 7) Diad sigpot a pankokoopera, napaliisan so kaperdi na sagpot tan dakel a balo ni so napakabatan na maong a balita, pati saramay mansasalita na sananey a lenguahe.​—Efe. 4:16.