Mantulongan Diad Pampulong ed Teritorya a Nandurumay Lenguahe

Maslak et ondedengel iray totoo ed mensahe na Panarian no narengel da itan ed mismon lenguahe ra. Nayarin atan so rason no akin ya nen Pentecostes 33 C.E., inyuksoy nen Jehova ya saray ‘matakot ed Dios a Judio ya nanlapud nanduruman nasyon’ et narengel day maong a balita ed “mismon lenguahe” da, anggano makapansalita ira na lenguahe na karaklan, singa say Hebreo odino Griego. (Gaw 2:5, 8) Diad saray lugar ya pigaray lenguahe, wala ray kongregasyon ya manguusar na nanduruman lenguahe ed saray aral da tan nayarin parehon teritorya so pupulongan da. Panon ya makapantulongan iray manangipalapag ed saratan ya kongregasyon pian napulongan so amin tan agnadoble so sagpot, diad ontan et ag-onsyodot iray unabung?

• 

  Mantongtong (Pro 15:22): Kaukolan ya mantongtong iray manangasikaso na serbisyo ed nanduruman kongregasyon tan mantulongan ira pian sistematikon nipulong so maong a balita. No melag so teritorya na saray kongregasyon ya manpupulong ed sananey a lenguahe, nayarin kerewen da ya agyo la lalaen iray unabung ya mansasalita na lenguahe na kongregasyon da. Balet, no agda regular a nakimeyan so amin ya teritorya da lapud maawa-awang itan, nayarin kerewen dad sikayo ya agkayo manlalabsan na abung pero ipaamta yod sikara no walay angipanengneng na interes. (od 93 ¶37) Odino nayarin patulongan irad kongregasyon yo ya mananap na saray mansasalitay lenguahe na kongregasyon da tan nayarin iter ed sikara iray address. (km 7/12 5, kahon) Tandaan ya no maminsan, nayarin aliwan saksakey ya lenguahe so uusaren ed sakey ya abung. Saray uksoyan pian nakobrian iray teritorya et nepeg ya ontumbok ed ley nipaakar ed proteksion na impormasyon na saray totoo.

• 

  Mantulongan (Efe 4:16): Tumboken a maong so instruksion ya iter na manangasikaso na serbisyo. Kasin walay iyaaralan moy Biblia ya say uusaren ton lenguahe et aliwan say lenguahe na kongregasyon yo? Ompan mas maples so iyaligwas to no ipasam ed asingger ya kongregasyon o grupo ya mansasalitay lenguahe to.

• 

  Manparaan (Pro 15:28; 16:1): No walay unabung ed teritorya yo ya mansasalita na sananey a lenguahe, gawam so anggaay nayarian mo ya ipulong so maong a balita. Sarag moy manparaan, ya amtaen mo no anto ran lenguahe so uusaren ed teritorya yo tan masakbay mo lan i-download so Biblia tan video ed saratan ya lenguahe diad gadyet mo. Sarag mo met ya usaren so JW Language app pian naaralan mo iray panangibano ed pigaran lenguahe.