Tepetepet Manlapud Managbasa
Kasin nibaga tayo a saray ariripen na Dios natan a walaan na mangaraldalin ya ilalo so walaan na parehon sukat na espiritu na Dios a singa ed alanaay-espiritun Kristianos?
Sayan tepet so aliwan balo. Sayan parehon pamaakaran so tinukoy ed “Tepetepet Manlapud Managbasa” diad The Watchtower na Abril 15, 1952. Dakel so nagmaliw a Tastasi nanlapulad saman, kanian nakonsidera tayo so tepet lamet tan diad ontan et narepaso so inkuan na satan ya asasakbay a materyal.
Manuna, say ebat et, on, saray matoor ya agagin lalaki tan bibii na arum a karneron klase so makapinabang a pareho ed saray alanaan diad pangawat na masanton espiritu na Dios.—Juan 10:16.
Siempre, agkabaliksan na saya a say espiritu so onkikiwas diad parehon dalan ed amin na indibidual. Nonoten so matoor ya ariripen ed sakbay-Kristianon panaon, a petepeteg ya akaawat na espirituy Dios. Tekep na pakapanyari manlapud espiritu, arum ed sikara so amatey na makapataktakot ya ayayep, amaabig na mansasakit, tan amaoli ni ingen ed inaatey. Tan kinaukolan da so espiritu pian nisulat so apuyanan iran libro na Biblia. (Uko-ukom 13:24, 25; 14:5, 6; 1 Arari 17:17-24; 2 Arari 4:17-37; 5:1-14) Inkuan na The Watchtower: “Anggaman aliwa a kabiangan na alanaan a klase, apano ira na masanton espiritu.”
Manlapud sananey ya anggulo, konsideraen pay lalaki tan bibii ed inmunan siglo ya alanaan na masanton espiritu, a nagmaliw ya espiritual ya ananak na Dios a walaay mangatatawen ya ilalo. Amin so alanaan, balet agkabaliksan na satan a say espiritu so manlapud saman et kinmiwas ed parehon dalan ed amin ed sikara. Satan so mapatnag manlapud 1 Corinto kapitulo 12. Ditan et siningbat nen apostol Pablo iray langkap na espiritu. Nabasa tayo ed bersikulo 8, 9, tan 11: “Diad sakey et naikdan diad panamegley na espirituy panagsalita na kakabatan, diad arum a panagsalita na pikakabat unong ed miulibay ya espiritu, diad arum pananisia diad panamegley na parehon espiritu, diad arum saray regalo na panagtambal diad panamegley na parehon espiritu. . . . Balet amin na sarayan ikikiwas gagawaen na sakey tan parehon espiritu, manggagawa na panangibunog a mantutumbokan ed kada sakey a singa unong ed linawa to.”
Makatantanda, aliwan amin ya alanaan ed saman so awalaan na mamilagro iran langkap na espiritu. Diad 1 Corinto kapitulo 14, sinalambit nen Pablo so miting ed kongregasyon a diad satan et say sakey et awalaan na langkap na panagsalita, balet anggapoy sakey a presenti so awalaan na langkap na panagpatalos. Anggaman kuan, diad asasakbay ya inkagawa, balang sakey ed sikara so akaeksperiensia na kalanaan ed espiritu. Makatunongan kasin ibaga a say agin walaan na saray langkap na panagsalita so awalaan na mas dakel ed espiritu nen say saramay arum a presenti? Andi. Saraman ya arum ya alanaan so ag-apribilehyoan, a singa no namparan agmakayarin talosan so Biblia ontan met ed kipapasen ya agmakayarin onarap ed saray subok. Kinmiwas so espiritu ed sakey a nikaduman dalan ed samay agi a makapansalita diad saray panagsalita. Siansia, kinaukolan a sikato tan sikara so mansiansian maapit ed si Jehova tan “mantultuloy a napapano na espiritu,” a singa insulat nen Pablo.—Efeso 5:18.
Nipaakar ed saramay nakdaan natan, maseguro ya akaawat ira na espirituy Dios. Diad sakey a punto et kinmiwas la itan ed sikara ed nikaduman dalan—diad panaon a sikaray alanaan tan tinagibi bilang espiritual ya ananak. Nanlapulad saman sikaray “mantultuloy a napapano na espiritu,” a walaan ira na tulong na satan sano kaukolan dan talosan so Biblia a nagkalalon malinew, mangiyuna ed panagpulong a kimey, odino onarap ed saray subok—personal odino organisasyonal.
Saray membro na “arum a karnero,” anggaman andiay eksperiensia ed pagmaliw ya alanaan, diad arum a pamaakaran et akaawat na masanton espiritu. Inkuan na The Watchtower na Abril 15, 1952:
“Say ‘arum a karnero’ natan so manggagawa na parehon panagpulong a kimey a singa saray nakdaan, diad silong na parehon mairap iran kipapasen, tan mangipapanengneng na parehon inkamatoor tan integridad. Napapakan ira na parehon epiritual a dulang, mamangan na parehon tagano, mangaawat na pareho iran katuaan. Bilang kabiangan na mangaraldalin a klase, a walaan na mangaraldalin ya ilalo tan pirmin interes ed mangaraldalin iran bengatla, nayarin paninteresan dan nagkalalo iray kasulatan a nisisiglaot ed mangaraldalin iran kipapasen ed balon mundo; bangta saray alanaan a nakdaan, a walaan na mangatatawen ya ilalo tan mabiskeg a personal ya interes ed saray bengatla na espiritu, so manaral a nagkalalon sikukuli ed saraman a bengatla diad Salitay Dios. . . . Ingen say katuaan et mansiasiansia a pareho iray katuaan tan parehon pakatalos so walan naala na namparan klase, tan satan so dia lambengat ed panangisekar na indibidual ed panaral a manedetermina ed pakatebek na mangatatawen tan mangaraldalin a bengatla a nagagamoran da. Say espiritu na Katawan so naala ed parehon sukat ed namparan klase, tan say pikakabat tan pakatalos so iyoopresi a pareho ed nantupag, a tekep na pareho iran pankanawnawa parad pangawat ed satan.”