Sipapaabeba Ton Nilingkoran si Jehova
“ALIWAN tanton importanti no iner so panlilingkoran mo noagta no siopa so lilingkoran mo so petepeteg ya importanti.” Labalabay nen John Booth ya ibaga iratan a salita, tan sikatoy anumpal ed satan. Say kurang na bilay to ed dalin, ya anampot nen Lunes, Enero 8, 1996, so ag-angitilak na suppiat ed no siopa so pinili ton lingkoran.
Bilang sakey a balolaki nen 1921, aanapen ed saman nen John Booth so gagala ed bilay. Sikatoy nambangat na Sunday school diad Dutch Reformed Church, balet ta impulisay toy ideyan manpasal a magmaliw a ministro lapud alikna ton manbibilay a sinisiblet iray klero. Sanen anengneng to so sakey a karatula parad sakey a paliwawa ya apauloan na “Millions Now Living Will Never Die,” tampol a sikatoy angipawit parad literatura ya inyanunsio na satan. Asagyat ed abasa to, ag-abayag et sikato so manbibisekleta na 24 kilometro a paarap ed saray miting na Estudyante na Biblia, unong a tawag ed Tastasi nen Jehova ed saman. Sikato so abautismoan nen 1923 tan ginmapon nampupulong ed kada puerta ed pasen na Wallkill, New York, a diman so kawalaan na dairy farm na pamilya to.
Linmoob si Brother Booth ed sigpot-panaon a ministeryo nen Abril 1928. Sikatoy nampulong ed panaayaman ton teritorya tan diad nibaryon Abalaten, ya isasalat so literaturay Biblia parad tagano tan panpundoan. Sikatoy kaukolan a manpakpel ed saray kapeligroan a singa saray mapetang ed paltog iran akankayarian na isesebel a pagawaay alak, a sakey ed sikara so amaltog tan akasugat ed kaiban payunir nen John Booth. Nen 1935, aturo si Brother Booth a sakey a managbiahe a manangasikso tan nambibisita ed saray kongregasyon tan memelag iran grupo ed liber na bansa. Sikato so angorganisa na saray asamblea tan tinmulong ed agagin lalaki tan bibii a manpatuloy anggaman ed isusumpa. Nidudunget ed masanok iran ulop, itatalindeg ed korte, tan panirap ed kipriso so amin et nagmaliw a kaslakan iran agawgawa ed si Brother Booth. “Magmaliw a sakey a libro so pangidetalye ed saraman a makapaligsan panaon,” insulat ton aminsan.
Nen 1941, si Joseph F. Rutherford, a presidenti ed saman na Watch Tower Society, so angiasain ed kinen Brother Booth pian mankimey diad Kingdom Farm, asingger ed Ithaca, New York. Diman et sikatoy nanlingkor a sitotoor ed loob na 28 taon. Diad ag-inkesay na aro to ed ministeryo, sikatoy aliketan diad loob na saray taon a milimog ed nilibon estudyante na Watchtower Bible School of Gilead parad pangipasal na saray misionero, ya akapasen diman diad Kingdom Farm ed Wallkill, New York, tan sirin et sikatoy wadman ed parehon lugar a ginapoan ton nanpayuniran manga 45 taon ed asasakbay.
Nen 1974, tinuro si Brother Booth a sakey a membro na Mananguley ya Ulop na Tastasi nen Jehova ed Brooklyn, New York. Sikatoy sitotoor a nanlingkor ed satan a kapasidad anggad nen impatey to diad 93 años. Inad-aro si John Booth lapud makatantandan mapaabeba tan maong a Kristianon personalidad to. Anggad nen sikatoy pinakapoy na bunigas tan biskeg to, sitotoor a sikatoy nampupulong ed kada puerta tan diad saray lansangan na syudad.
Anggaman panermenan na saramay nanlilingkor a kaiba to so intaynan to, makakaromog ira na ligliwa ed sipan na Biblia nipaakar ed ontan ya alanaan a Kristianos, a sikara so papaolien ed mangatatawen a bilay tan “say bengatlan ginawa ra so akiulop ed sikara.” (Apocalipsis 14:13; 1 Corinto 15:51-54) Maseguron sakey a balon kaliber-liber, balet ta sakey a diad satan et nayarian nen John Booth a lingkoran si Jehova a maando!
[Litrato ed pahina 32]
John Booth 1903-1996
[Litrato ed pahina 32]
HERALD-AMERICAN, ANDOVER 1234
76 Jehovites Jailed in Joliet
[Credit Line]
Chicago Herald-American