“Bidbiren so Ontan a Nengneng na Totoo”

ALIWAN AMIN et maong so kipapasen to diad kongregasyon ed Corinto. Wadtan so makapakigtot a kaso na imoralidad, tan linmesa iray inkaapag-apag ed limog na agagi. Nipaarap so pigara ed seryoso iran personal a problema odino walaan iray tepet a kaukolan a naebatan. Pigaran agagi so mandedemandaan ed korte; arum so mangibuburi ni ingen ed kikioli.

Linmesa met iray seryoson tepet. Kasin saramay say kipapasen da et naapag ed relihyon a sankaabungan so mansiansia ed saray agmananisian kaasawaan da, odino kasin sikaray misian? Anto ta so betang na agagin bibii ed kongregasyon? Matukoy kasi so pangan na karne a nibagat ed saray idolo? Panon so nepeg a pangikondukta ed saray miting​—laktip lay Pangdem na Katawan?​—1 Corinto 1:12; 5:1; 6:1; 7:1-3, 12, 13; 8:1; 11:18, 23-26; 14:26-35.

Lapud maseguron kaaaburido ra nipaakar ed kipapasen na agagi ed ontan a magulon kaliberliber ed espiritual, nanbiahe ira di Acaico, Fortunato, tan Estefanas pian bisitaen si Pablo diad Efeso. Diad impangitarok ed satan a kagogonigonan a balita, posiblin awit-awit day sakey a sulat ed si Pablo manlapud kongregasyon a mankargay tepetepet ed sarayan isyu. (1 Corinto 7:1; 16:17) Diad basiyan na walan ebidensya, aliwa lambengat a sarayan taloran agagi so mapaga nipaakar ed situasyon. Diad tua, abalitaan la itan nen Pablo manlapud “saraman so wala ed abung nen Chloe” a wala so agpantatalosan ed limog na saray membro na kongregasyon. (1 Corinto 1:11) Agpanduaruwaan, say report na saray mensahero so akatulong ed si Pablo a lalon natalosan toy situasyon, pian nadeside no anto so niiter a simbawa, tan no panon so pangebat ed saray linmesan tepet. Ompatnag a say sulat a kabat tayo la natan bilang Unonan Corinto so ebat nen Pablo, ya inggiya na masanton espiritu na Dios. Nayarin sikara di Acaico, Fortunato, tan Estefanas so angitulor ed sulat.

Siopara di Acaico, Fortunato, tan Estefanas? Anto so naaralan tayo diad panaral ed ibabaga na Kasulatan nipaakar ed sikara?

Say Sankaabungan nen Estefanas

Say sankaabungan nen Estefanas so “manuna iran bunga” na ministeryo nen Pablo diad Romanon probinsya na Acaya, Mamaabalaten na Gresya, diad ngalngali taon 50 K.P., tan sikaray binautismoan a mismo nen Pablo. Mapatnag, inkonsidera ira nen Pablo bilang alimbawa, sakey a matatken a manamakepan impluensya parad saray taga Corinto. Ampetapetang toran dinayew lapud aktibidad da diad biang na kongregasyon: “Natan bagaan takayo, agagi: Amta yo a diad sankaabungan nen Estefanas et say manuna iran bunga diad Acaya tan inletneg day inkasikara a manlingkor ed saray sasanto. Mantultuloy met komon ya ipasakop so inkasikayo ed ontan a klase na totoo tan ed kada sakey a mitutulongan tan mansasagpot.” (1 Corinto 1:16; 16:15, 16) Agnibaga ya eksakto no siopa so kabiangan na “sankaabungan” nen Estefanas. Nayarin say balikas et kabaliksan to labat iray membro na pamilya balet nayarin laktipen to met iray ariripen odino trabahador. Lapud say Latin a ngaran ya Acaico so kaslakan et aripen, tan say Fortunato a kaslakan et bulos a too, isipen na pigaran komentarista a sikaran dua so nayarin membro na satan met lanlamang a sankaabungan.

Antokaman so kaso, inkonsidera nen Pablo a napanuliranan so sankaabungan nen Estefanas. Saray membro to so “inletneg day inkasikara a manlingkor ed saray sasanto.” Maseguron binidbir na pamilya nen Estefanas a wala so kimey a kaukolan a sumpalen parad pankaabigan na kongregasyon tan siboboluntaryon inawat iyan serbisyo bilang personal a responsabilidad. Say pilalek dan mangisaklang na ontan a serbisyo ed saray sasanto so maseguron mankanepegan na moral a suporta tan panamidbir.

“Nirepreskoan Day Espirituk tan Sikayo”

Anggaman mapaga si Pablo ed situasyon diman ed Corinto, say insabi na taloran mensahero so nanpabiskeg ed sikato. Inkuan nen Pablo: “Panliketan ko so inkiwala nen Estefanas tan si Fortunato tan si Acaico, lapud insandi ra so inkaandi yo dia. Ta nirepreskoan day espirituk tan sikayo.” (1 Corinto 16:17, 18) Diad pangonsidera ed sirkumstansya, say inkaandi’d man nen Pablo ed Corinto so sengegan anganko na kapagaan to, balet say kiwawala natan na taloran imbaki so nansapot ed inkaandi na interon kongregasyon. Maseguron kinmanay report pian nakompletoy impormasyon nen Pablo ed situasyon tan anggan panon et mangekal ed pigaran katatakotan to. Anganko et aliwan onmanlan kauges manaya iray bengatla a singa ed isipen to.

Unong ed si Pablo, say misyon na talora so aglambengat nanrepresko ed espiritu to noagta kinmana met ed kapabiskeg na espiritu na kongregasyon na Corinto. Anggapoy duaruwan satan so amainawa ed sikara a naamtaan a saray imbaki so malinlinew ya angipaliwawa ed kada aspeto na situasyon ed si Pablo tan ompawil tekep na simbawa to.

Kanian si Estefanas tan say duaran kaiba to so ampetapetang a nirekomenda lapud saray sagpot da diad biang na saray taga Corinto. Ontanlay impangapresya nen Pablo ed sarayan lalaki a diad ipawil da et mangitarya ra na panangidaulo ed naapag a kongregasyon na Corinto. Pinaseseg nen apostol Pablo iray agagi: “Itultuloy yon ipasakop so inkasikayo ed ontan a klase na totoo tan ed kada sakey a mitutulongan tan mansasagpot. . . . Bidbiren so ontan a nengneng na totoo.” (1 Corinto 16:16, 18) Malinlinew ya ipapatnag na saratan a mabiskeg a rekomendasyon so sigpot a katooran na saratan a lalaki anggaman ed saray tensyon ed loob na kongregasyon. Say ontan a nengneng na lalaki so kaukolan a pablien.​—Filipos 2:29.

Mamawala na Maabig Iran Resulta so Matoor a Kooperasyon

Anggapoy suppiat nipaakar ed satan, say maapit a pikokoopera ed organisasyon nen Jehova tan ed saray manangilaman to so mamawala na maabig iran resulta. Sanen insulat nen Pablo so sulat a kabat natan a Komaduan Corinto, agnambayag kayari na unaan a sulat, marakdakep lay kipapasen ed kongregasyon. Say nantultuloy a maanos ya impankimey na agagi a singa di Acaico, Fortunato, tan Estefanas, ontan met ed impanbisita nen Tito, so amawala na maong ya epekto.​—2 Corinto 7:8-15; ikompara so Gawa 16:4, 5.

Saray membro na modernon-agew a kongregasyon na totoo nen Jehova so nagunggunaan diad pandalepdep ed antikey ya inkisalambit na sarayan matoor a lalaki ed Kasulatan. Alimbawa, iyan lan walay nagagawan situasyon ed loob na lokal a kongregasyon ya agnaresolbin tampol lapud pigaran rason tan satan so panpagaan na agagi. Antoy nepeg a gawaen? Aligen ira di Estefanas, Fortunato, tan Acaico, ya agsinmener ed responsabilidad dan pakabatan si Pablo ed situasyon tan insan ipia ed si Jehova iray pamaakaran. Peteg ya agda inabuloyan so seseg parad inkatunong a mamakiwas ed sikaran independenti odino pian magmaliw ya “onsanok sumpad si Jehova.”​—Uliran 19:3.

Kien nen Kristo iray kongregasyon, tan diad matukoy a panaon to, a singa ed Corinto, sikatoy onkiwas a manresolbi ed dinanman a problema a manigensigen ed espiritual a pankaabigan tan kareenan. (Efeso 1:22; Apocalipsis 1:12, 13, 20; 2:1-4) Diad kaleganan, no tumboken tayo so maabig ya alimbawan inletneg di Estefanas, Fortunato, tan Acaico tan itultuloy so pansagpot ed panserbi ed agagi tayo, sikatayo met so sitotoor a manusuporta ed areglo na kongregasyon, a papabiskegen iray agagi, tan ‘sasagyaten ira ed aro tan maabig iran gawa.’​—Hebreos 10:24, 25.