Tepetepet Manlapud Managbasa

Unong ed Galacia 6:8, ‘say mantanem na nipaakar ed laman ton dili, dia ed laman manani na kabolok; balet say mantanem na nipaakar ed espiritu, dia ed espiritu manani na bilay ya andi anga.’ Anton “espiritu” so tutukoyen dia, tan panon tayon manani na bilay?

Saray Hebreo tan Griegon terminon impatalos ya “espiritu” so walaay nanduruman kabaliksan, a singa say (1) aktibon puersa na Dios, (2) say puersa na bilay a walad totoo odino ayayep, (3) say manamakiwas a puersa na kanonotan na too, tan (4) espiritun persona, odino angheles. Say ununa ed saraya​—say aktibon puersa na Dios​—so tutukoyen na Galacia 6:8.

Pian makatulong ed panagsukimat, imanoen a diad Galacia 3:2, ya inmunan inusar so salitan “espiritu” ed libro na Galacia. Tinepetan nen Pablo so Kristianos: “Inawat yo kasi so espiritu lapu ed saray gawa na gangan, o lapu ed indengel ed pananisia?” Insan, diad Galacia 3:5, insiglaot to itan ya “espiritu” ed panggawa na makapanyari iran gawa. Kanian say “espiritu” a tinukoy to et say masanton espiritu, say agnanengneng ya aktibon puersa na Dios.

Saginonor, diad Galacia 5:16, impandumaan nen Pablo so espiritu tan laman. Nabasa tayo: “Balet ikuan ko, Manakar kayo ya onong ed espiritu, tan ag yo oonoren so saray kaalakan na laman.” Diad “kaalakan na laman” et say tutukoyen to et makasalanan a pilalek na laman. Kanian, diad Galacia 5:19-23, inlilista to so “saray gawa na laman” a misumlangan ed “bunga na espiritu.”

Kanian, diad Galacia 6:8, say toon “mantanem na nipaakar ed laman ton dili” so sakey a toon nasasagyat na makasalanan a pilalek na laman, a manggagawa na “saray gawa na laman.” Nayarin nasagmak toray mauges ya epekto na ontan a kondukta tan no agmanguman, maseguron agto nagamoray bilay ed silong na Panariay Dios.​—1 Corinto 6:9, 10.

Bilang debotadon Kristianos, kaukolan tayon panpilalekan so ‘pantanem nipaakar ed espiritu na Dios.’ Sasaglawien na satan so panbilay unong a mangiyaabuloy ed bulos ya ikurang na masanton espiritu ed kabibilay tayo, ya ontutulong ed sikatayon mangipatnag na bunga to. Kaukolan tayon tandaan itan sano manpipili tayo na basaen odino programa ed telebisyon a bantayan. Mantatanem tayo a walaay kisiglaot ed espiritu no iimanoen tayoray miting ed kongregasyon tan panbabanikelan tayon iyaplika so simbawa na mamatatken a tinuro na espiritu.​—Gawa 20:28.

Makapainteres, sasampotan na Galacia 6:8 tekep na panamaseguro a no sikatayoy mantanem a mitunosan ed masanton espiritu, sikatayoy nilinya pian ‘manani na bilay ya andi anga manlalapud espiritu.’ On, based dondon bagat nen Kristo, say Dios so manginatnat na andi-anggaan a bilay diad panamakurang na masanton espiritu.​—Mateo 19:29; 25:46; Juan 3:14-16; Roma 2:6, 7; Efeso 1:7.