Bibii ed Interon Globo

SANEN nanrebeldi sumpad Dios so inmunan paris, impasakbay nen Jehova so makaderal iran pansumpalan a nagawa ed sikaran dua tan ed ilalak da. Inkuan nen Jehova ed si Eva: “Say pirawat mo naani say nipaakar ed asawam, tan sikato so mangyuley ed sika.” (Genesis 3:16) Lawas ipapaseseg na Biblia so pakawalaan na bibii na aralem a respeto, tan minilyon a bibii so mas maliket, lalon napnek ed kabibilay lapud iyaaplika ra tan saray pamilya ra iray prinsipyo ed Biblia.

Anggaman ontan, unong ed agano nin report nipaakar ed saray kanepegan na too, dakel a bibii ed sankamundoan so naaabuso, pinapasoot, tan ag-inkabkabilangan. Mangokomento nipaakar ed report, say International Herald Tribune so nankuan: “Diad maalwar a tuloy a detalye, say report nipaakar ed 193 bansa . . . so mangililitrato ed maermen a kipapasen diad inagew-agew a nagagawa ed panangidumaduma tan panangabuso ed bibii.”

Pigaran alimbawa: Diad sentral Aprika, nepeg a gawaen na bibii so maslak ya ambetbelat a kimey ed alog, tan say akapanaral lambengat ed sikara so kakatlo labat so karakel to ed akapanaral a lalaki. Diad sakey a bansa diman, ilegal so pikakalugoran parad bibii balet agsebel ed lalaki. Say ganggan na sakey nin bansa ed Aprika so agmanudusa ed asawan lakin mamatey ed asawa to sano nalmoan ton mikakalugoran, balet dudusaen na ganggan so sakey ya asawan biin mamatey ed asawa to ed pareho iran sirkumstansya.

Kuan na report a diad pigaran parti na Abalaten ya Amerika, ag-aabageyen na pupulis so asawan bibiin bobogbogen. Tan gendagendat a nepeg ya anosan na mantratrabahon bibii so sueldon mas abeba ed 30 anggad 40 porsiento nen say lalaki.

Diad pigaran parti ed Asia, saray bibii so biktima na impaskar a panagraspa tan panagpaekal. Diad sakey a bansa, walay 500,000 balangkantis, a maslak ed sikara so inlako parad saya na atateng a mankakaukolan na kuarta pian makasaliw na balo iran ayaman parad inkasikara. Kaukolan ya imanoen na pulisya so idarakel ed sakey a bansa na “dowry deaths”​—say sakey ya asawan bii so papateyen na asawan ton laki odino say pamilya to lapud say dote na asawan bii so ag-akasabi’d iilaloan.

Nipaakar ed si Jesu-Kristo, ipapaseguro ed sikatayo na Biblia: “Sikato iliktar to so naokolan no oney-ey, say makabos met, ya angapo so mananulong ed sikato. Sikato ilagak to so makabos tan naokolan, tan ilaban to so kamarerwa na naokolan. Sikato dondonen to so kamarerwa ra a yarawi ed panamalingo tan panamasoot, et mabli naani dala ra ed mata to.” (Salmo 72:12-14) Kanian walaan tayoy rason ya agnadismaya; makanengneng ed arapen iray bibii ed apaaligwas iran kipapasen a niwala ed satan a panaon.