Say Sankabalgan a Toon Nambilay ed Kapiganman

Kapitulo 133

Susumpalen nen Jesus so Amin a Kakaukolanen na Dios

Sano pinagit la na Mibabakal-ya-Arin si Jesu-Kristo si Satanas tan say agmatunong a mundo to, agaylan sengegay panggayaga! Say mareen a Sanlibon Taon ya Uley nen Jesus so onggapon siansia!

Diad silong na panangidirihe nen Jesus tan kaiba ton arari, linisan na saray akaliktar ed Armagedon iray deral ya intilak na satan a matunong a bakal. Nayarin saray akaliktar ed dalin so manilalak met ed pigaran panaon, tan saraya so mibiang ed makapaliket a kimey a panamayubo ed dalin a pagmaliwen a marakerakep a singa-parken harden.

Diad nigeter a panaon et paolien nen Jesus iray agnabilang a minilyon manlapud saray lubok da pian panggayagaan iyan masanting a Paraiso. Saya so gawaen to bilang pananumpal ed dili ton garantiya: “Say oras so onsasabi sano amin iramay walad pakanodnonotan a lubok so . . . ompaway.”

Sakey ed saramay paolien nen Jesus et samay datin managgaway-kaugsan ya inatey ed abay to diad panamairapan a palitek. Tandaan ya insipan nen Jesus ed sikato: “Tua kuan ko ed sika natan, Sikay nakaibak ed Paraiso.” Andi, satan a too so ag-awiten ed tawen pian manuley bilang ari a kaiba nen Jesus, nisay magmaliw lamet a too si Jesus tan manbilay ed Paraison dalin a kaiba to. Imbes, nakaiba nen Jesus iman a datin managgaway-kaugsan ed pantalos a Sikatoy mamaoli ed sikato ed Paraiso tan seguroen ton naasikaso iray pankaukolan to, namparan diad pisikal tan espiritual a paraan.

Isipen pa ’tan! Diad silong na maaron panangimano nen Jesus, say interon atooan a pamilya​—saray akaliktar ed Armagedon, saray anak da, tan saray nilibon minilyon ya apaolin inaatey a matulok ed sikato—​so onaligwas a mamaarap ed atooan ya inkayadyari. Si Jehova, diad panamegley na maarin Anak to, si Jesu-Kristo, so miayam ed sankatooan diad espiritual. “Tan,” unong ya ibabaga na boses ya arengel nen Juan manlapud tawen, “punasen to so amin a lua ed kamataan da, tan anggapo la so ipapatey, nisay dageyem nisay nangis nisay ot-ot.” Anggapoy too ed dalin a manirap odino mansakit.

Diad sampot na Sanlibon Taon ya Uley nen Jesus, say kipapasen so magmaliw a singa ed orihinal a ginagala na Dios sanen imbaga to’d sankaunaan a sanasawa, si Adan tan Eva, a manparakel tan panoen so dalin. On, napano diad satan so dalin na matunong a rasa na ayadyarin katooan. Saya so lapud saray gungguna na dondon bagat nen Jesus so niyaplika la ed satan ed kada sakey. Say ipapatey lapud kasalanan nen Adan so naandi la!

Diad ontan, nasumpal la’d satan nen Jesus so amin a kakaukolanen nen Jehova ed sikato. Kanian, diad sampot na sanlibon taon, ipalima to so Panarian tan say ayadyarin atooan a pamilya ed Ama to. Insan ibulos ed satan na Dios si Satanas tan saray demonyo to manlapud kaaralman na singa-inatey a kipapasen. Parad anton gagala?

Bueno, diad sampot na sanlibon taon, maslak ed saramay manbibilay ed Paraiso so apaolin agbalot asubok so pananisia ra. Sakbay na impatey da, agdan balot akabatan iray sipan na Dios tan sirin et agmakapangidemostra na pananisia ed saratan. Insan, kayarin apaoli tan abangatan ed saray katuaay Biblia, mainomay parad sikara diad Paraiso, ya anggapoy antokaman ya isusumpa, a manlingkor ed Dios. Balet no naikday pankanawnawa si Satanas a manalin mamatunda ed sikaran mantultuloy a manlingkor ed Dios, kasin sikaray mamaneknek a matoor ed Dios? Pian naresolbi iyan tepet, si Satanas so ibulos.

Ipaparungtal na apocalipsis ya inter ed si Juan a kayari Sanlibon Taon ya Uley nen Jesus, paneknekan nen Satanas a sikatoy matalona diad pangipabeneg na agnabilang a karakel na totoo manlapud panaglingkor ed Dios. Balet, sano say pinal a subok so asumpal la, si Satanas, saray demonyo to, tan amin iramay apalikdo to so naderal ed ando lan ando. Diad biek a dapag, saray sigpot ya asubok, iran matoor ya akaliktar so mantultuloy a manbilay pian panggayagaan iray bendisyon na mangatatawen ya Ama ra ed andi-geter a panaon.

Malinew, si Jesus so awalaay betang, tan mantultuloy a walaan na makanan betang ed pananumpal ed magloria iran gagala na Dios. Agaylan engranden arapen so napanggayagaan tayo bilang resulta na amin a nagagawaan to bilang baleg a mangatatawen ya Ari na Dios. Ingen, agtayo nalingwanan so amin a ginawa to sanen sikato ni sakey a too.

Si Jesus so bulos-linawan linma ed dalin tan binangatan itayo nipaakar ed Ama to. Mas ni nen saya et sikatoy angipanengneng ed mabli iran kualidad na Dios. Napapakiwas so kapusoan tayo sano kusideraen tayo so makapadinayew a pakpel tan inkalaki to, say anggapoy-kaparan kakabatan to, say abilidad to bilang managbangat, say andiay-takot a panangidaulo to, tan say matamoy a panangasi tan pililikna to. Sano nanononotan tayo no panon so impakadeskribe ya impanirap to diad impangitarok toy dondon, a diad satan lambengat makagamor tayo na bilay, maseguron say kapusoan tayo so napapakiwas tekep na apresasyon parad sikato!

Peteg, agaylan inkatoo ya akabatan tayo diad impanaral tayo’d bilay nen Jesus! Agnapanduaruwaan tan atagey a tuloy so kabalgan to. Napapakiwas itayo a mangiyaniweng ed saray balikas na Romanon gobernador a si Poncio Pilato: “Nia! Say Too!” On, peteg, “Say too,” say sankabalgan a toon nambilay ed kapiganman!

Diad pangawat tayo ed probisyon na dondon bagat to, say belat na kasalanan tan ipapatey ya atawir manlapud si Adan so naekal manlapud sikatayo, tan si Jesus so magmaliw a “Magnayon ya Ama” tayo. Amin a makagamor na andi-anggaan a bilay so nepeg a mangala na pikakabat aliwa lambengat nipaakar ed Dios noagta ontan met ed Anak to, si Jesu-Kristo. Komon ta say panagbasa tan panagaral mo na sayan libro so ontulong ed sika pian mangala na ontan a manangiter-bilay a pikakabat! 1 Juan 2:17; 1:7; Juan 5:28, 29; 3:16; 17:3; 19:5; Lucas 23:43; Genesis 1:28; 1 Corinto 15:24-28; Apocalipsis 20:1-3, 6-10; 21:3, 4; Isaias 9:6.​—NW.

▪ Anto so magmaliw a maliket a pribilihyo na saray akaliktar ed Armagedon tan saray anak da?

▪ Siopara so makapanggayaga ed Paraiso likud ed saray akaliktar ed Armagedon tan saray anak da, tan diad anton pantalos a sikaray nakaiba nen Jesus?

▪ Anto so magmaliw a kipapasen diad sampot na sanlibon taon, tan anto so gawaen nen Jesus ed satan a panaon?

▪ Akin ya ibulos si Satanas manlapud say kaaralman, tan anto so diad kaunoran et nagawa ed sikato tan amin iramay tinmumbok ed sikato?

▪ Panon a si Jesus so magmaliw a “Magnayon ya Ama” tayo?