TEPET NA SARAY KABATAAN
Walay Nanggawa o Ebolusyon Labat?—Part 4: Panon Kon Ipaliwawa ed Arum No Akin ya Manisia Ak ya Walay Amalsa?
Manisia ka ya walay Amalsa, pero ompan manaalangan ka ya ibaga itan no wala kad eskuelaan, lalo la no ebolusyon so ibabangat na saray libro yo tan antam ya elekan ka labat na saray teacher mo tan saray kaklasem. Antoy gawaen mo pian makpel mon nipaliwawa ed arum no akin ya manisia ka ya walay Amalsa?
Sarag mo ’tan!
Ompan isipen mo: ‘Aliwa ak ya matalino, kanian agko labay ya pantongtongay science tan kontraen so ebolusyon.’ Ontan kunoy aminsan ya alikna nen Danielle. Say kuan to: “Agko labay ya kontraen so ibabagay teacher ko tan saray kaklasek.” Ontan met so alikna nen Diana. Kuan to: “Agko la amtay ibagak no mangusar la ray termino ed science.”
Pero, tandaan mo ya say gagalam et aliwan pian manalo ed debati. Tan agmo kaukolan so magmaliw ya matalino ed science pian nipaliwawam ed arum no akin ya manisia ka ya walan talagay Amalsa.
Tip: Usar mo may simplin eksplinasyon na Biblia ya walad Hebreo 3:4: “Kada abung et walay nanggawa, balet say nanggawa na amin a bengatla et say Dios.”
Onia kunoy ibabaga nen Carol no ipapaliwawa tod arum so Hebreo 3:4: “Isip mo pa ya manaakar kad kagubatan. Anggapon balot so nanengneng mon ebidensya ya wala ray totoon manaayam ditan. Pero katewek mo, walay anengneng mon toothpick. Anto kasi isipen mo? Natural labat ya isipen mon, ‘Wala ray totoon nanlapu dia.’ Kanian no say melmelag ya toothpick et isipen mon walay nanggawa, di lalo lad uniberso tan amin ya wadia!”
No walay mangibaga: “No tua ya walay Amalsa, siopa balet so nanggawa ed Amalsa?”
Nayarin ibagam: “Tua ya agtayo natatalosan so amin tungkol ed Amalsa, pero agto labay ya ibagan anggapoy Amalsa. Singa bilang, atay cellphone mo. Agmo amta so amin ya impormasyon to may toon nanggawa ed satan pati say background to, pero manisia ka ya walay nanggawa ed satan di ba? [Paulyan mon onebat.] Diad tua, dakel so impormasyon ya naaralan tayo tungkol ed Amalsa. No labay mo, ibagak ed sika iray amtak tungkol ed sikato.”
Dapat akaparaan ka
Ibabaga na Biblia ya importantin ‘akaparaan ka ya mangidepensa na ilalom ed balang sakey ya mantetepet ed sika nipaakar ed satan, balet gawam itan tekep na inkaulimek tan aralem a respeto.’ (1 Pedro 3:15) Pian nagawaan mo ’tan, isip mo la no antoy ibagam tan no panon mo itan ya ibaga.
No antoy ibagam. Tua ya inarom so Dios tan atan so rason no akin ya labay mon ibagad arum ya sikato so Amalsa. Pero no bastam labat ibagad arum ya inar-arom so Dios, kulang itan pian nakombinsem ira ya sikatoy nanggawa ed amin ya bengatla. Marakep no mangibaga kay ebidensya ya nanengneng ed kalikasan ya manpatunay ya walay Amalsa.
No panon mo itan ya ibaga. Dapat nalikas da ya kombinsido kad papanisiaan mo. Pero agka dapat mamaong tan asikasom nin siansiay panagsalitam. Mas dengelen ka na totoo no mauyamoy pitotongtong mod sikara tan no nalikna ran rerespetoen moy papanisiaan da.
“Agmo ra iinsultoen tan agmo ipapaliknan singa antam ya amin. Agda ka la laingen dengelen no mamaong ka.”—Elaine.
Saray makatulong ed sika pian nipaliwawam iray papanisiaan mo
Anggano manguman so panaon, agka mapaga no akaparaan ka. Ontan met ed pangidepensa ed papanisiaan mo. Anggano kuestionen itan na arum, agka mapaga no namparaan ka
Oniay imbaga na kabataan ya si Alicia: “No agtayo akaparaan, agtayo la onesel ta ompan nabaingan tayo labat.” Duga si Alicia. Kanian dapat akaparaan ka pian nipaliwawam iray papanisiaan mo. Oniay imbaga nen Jenna: “No walay imparaan kon simplin eksplinasyon ya pinannonotan kon maong, mas walay kompiyansak ya ipaliwawa no akin ya manisia ak ya walay Amalsa.”
Iner mo nanengneng iray ontan ya eksplinasyon? Dakel ya kabataan so atulongan na sarayan publikasyon:
Pinalsa Kasi Bilay?
The Origin of Life—Five Questions Worth Asking
The Wonders of Creation Reveal God’s Glory (video)
Say seryen “Wala Kasi Nandesinyo?” diad magasin ya Onliing! (I-type iray salitan “wala kasi nandesinyo” [ipilam ya i-type iray quotation marks] diad search box na Watchtower ONLINE YA LIBRARYA.)
Usaren so Watchtower ONLINE YA LIBRARYA no labay mo nin naaruman so antam.
Makatulong met no rebyuen mo so Part 1 anggad Part 3 na sayan serye ya “Walay Nanggawa o Ebolusyon Labat?”
Tip: Manpili kay eksplinasyon ya akakombinsed sika ta mas mainomay mon natandaan itan, tan mas kombinsido ka met ya ipaliwawa itan ed arum. Manpraktis ka pian mainomay mo itan ya ipaliwawa.