Walay Nanggawa o Ebolusyon Labat?—Part 3: Akin et Duga Labat ya Manisia Tayo ya Walay Amalsa?

Kasin ontan met so naliliknam? No on, ompan manduaran isip ka met la no walan talagay Amalsa. Siempre, agmo labay ya isipen na arum ya anggapoy antam. Anto sirin so makatulong ed sika?

• Ibabaga na saray onkokontra

• Isip moy papanisiaan mo

• Saray makatulong ed sika pian lalom ya naaralan iray ebidensya

• No antoy ibabaga na arum ya kabataan

Ibabaga na saray onkokontra

1. No manisia kan walay Amalsa, isipen na arum ya kokontraen moy ibabaga na science.

“Imbaga na teacher ko ya aramay manisia ya walay Amalsa, iraman may totoo ya mangiras da lan aralen iray bengatlan walad mundo tayo.”—Maria.

No antoy nepeg mon naamtaan: Saramay maniisip na ontan et agda amta no antoy tua. Wala ray sikat ya scientist ya manisian walay Amalsa, singa si Galileo tan Isaac Newton. Anggano manisia iran walay Amalsa, ag-ira kontra ed science, tan importante ni itan ya siansia ed sikara. Anggad natan, wala ray scientist ya mangibabagan agmankontraan so science tan say panisia ya walay Amalsa.

Salien iya: I-type iray salitan “impaliwawa na” (ipilam ya i-type iray quotation marks) ed search box na Watchtower ONLINE YA LIBRARYA pian nanengneng mo iray doktor tan scientist ya manisian walay Amalsa. Tan nengneng mo no antoy akakombinse ed sikara.

Tandaan: No manisia kan walay Amalsa, agto labay ya ibagan kokontraen moy science. Diad tua, legan mon aaralen iray walad kaliberliber mo, diman mo lalon napatunayan ya talagan walay Amalsa.—Roma 1:20.

2. No manisia ka ed ibabaga na Biblia nipaakar ed impamalsa, isipen na arum ya panatiko ka ed relihyon mo.

“Dakdakel so mangibabaga ya kalokoan labat tay panisia ya walay Amalsa. Iisipen da ya is-istorya labat so karga na libron Genesis.”—Jasmine.

No antoy nepeg mon naamtaan: Aliway pakatalos na maslak ya totoo ed ibabaga na Biblia nipaakar ed impamalsa. Singa bilang, ibabaga na arum ya creationist ya aganggano ni labat ya linmesa so mundo, tan samay anemiran agew na impamalsa et literal kuno ya 24 oras so kada agew. Anggapoy ontan ya ibabaga na Biblia.

• Oniay nabasa ed Genesis 1:1: “Diad gapo et pinalsa na Dios so tawen tan say dalin.” Ag-iya kontra ed samay adiskobre na saray scientist ya bilyon-bilyon lay taon na mundo.

• Amay salitan “agew” ya inusar ed Genesis et nayarin ontutukoy ed andukey ya panaon. Diad tua, amay salitan “agew” diad Genesis 2:4 et inusar pian tukoyen imay anemiran agew na impamalsa.

Tandaan: Say salaysay na Biblia nipaakar ed impamalsa et aliwan kontra ed saray adiskobre na saray scientist.

Isip moy papanisiaan mo

No manisia kan walay Amalsa, agka labat dapat basta manisia. Kaukolan ya walay mabiskeg ya ebidensyam. Isip mo pa ’ya:

Kada no makanengneng kay desinyo, antam ya walay nandesinyo ed satan. Singa bilang, no makanengneng kay camera, eroplano, odino abung, isipen mon tampol ya walay nandesinyo ed satan. Say mata na too ey, saray ontitikyab ya manok, odino say planetan Dalin, agmo met kasi isipen ya walay nandesinyo ed saratan?

Isipen pa: Pian lalon naparakep na saray engineer iray imbension da, aaligen da ray desinyo ya nanenengneng dad kalikasan. Tan natural met labat ya labay dan birbiren na arum ya sikaray nanggawa ed saratan ya imbension. Duga kasi ya birbiren tayo irayan totoo tan saray imbension da, pero agtayo birbiren ya walay Amalsa anta mas makapabilib iray ginawa to?

Saray makatulong ed sika pian lalom ya naaralan iray ebidensya

Lalon ombiskeg so pananisiam ya walay Amalsa no aralen mo ray ebidensya ya nanengneng ed kalikasan.

Salien iya: I-type iray salitan “wala kasi nandesinyo” (ipilam ya i-type iray quotation marks) ed search box na Watchtower ONLINE YA LIBRARYA. Manpili ka na topic ya labay mon basaen ed serye na artikulo ya “Wala Kasi Nandesinyo?” diad magasin ya Onliing! Diad kada artikulon basaen mo, anap mo no anto ray makapabilib ya detalyin nanengneng mo ed kalikasan, tan no panon itan ya makatulong pian lalo kan nakombinse ya walay Amalsa.

Dakel ni naaralan mo: Pian lalom ya nanengneng iray ebidensya ya walay Amalsa, aral mo irayan brosyur.

• Pinalsa Kasi Bilay?

  • Dugarugay akaposisyonan na planetan Dalin tan wadia lay amin ya nakaukolan tayo pian manbilay.—Nengnengen so pahina 4-10.

  • Nanengneng ed kalikasan iray nanduruman desinyo.— Nengnengen so pahina 11-17.

  • Agmankontraan so salaysay na Biblia ed Genesis tan say science.—Nengnengen so pahina 24-28.

• The Origin of Life—Five Questions Worth Asking

  • Imposiblin basta labat linmesa so bilay manlapud bengatlan anggapoy bilay.—Nengnengen so pahina 4-7.

  • Komplikadon maong iray selula tayo kanian imposible ya basta labat iratan abuo.—Nengnengen so pahina 8-12.

  • Say impormasyon ya sarag ya kargaen na DNA tayo et mas ni nen say antokaman ya teknolohiya ya wala natan.—Nengnengen so pahina 13-21.

  • Amin ya mabilay ya bengatla diad dalin et aliwan saksakey so nanlapuan to. Wala ray adiskobrin fossil ya manpatunay ya bansag ya linmesa so nanduruman klase na ayayep, aliwan kalkalna so inlesa ra.—Nengnengen so pahina 22-29.

“Baleg ya akatulong ed siak so kalikasan pian nakombinse ak ya walay Dios, manlapud saray ayayep ya wadiad dalin ya anggad say mismon uniberso tayo tan say inkauksoy na satan.”—Thomas.