Niwalay Kareenan ed Interon Mundo

Labay tayon amin so manayam ed mundon walay kareenan. Manlapu la nensaman, pansasagpotan la na saray lider na mundo ya patundaen iray gulo pian niwalay kareenan. No maminsan, wala met so nagagawaan na saray sagpot da, pero temporaryo labat itan. Makapaermen ta kaslakan et manlalaban la lamet iray totoo. Onsabi ni kasi panaon ya niwalay kareenan ed interon mundo? On! Nengnengen tayo no antoy naaralan tayod si Jesus.

No antoy gawaen nen Jesus

Ipapaamta ed sikatayo na Biblia no antoy asingsingger lan gawaen nen Jesus pian niwalay kareenan ed interon mundo.

• “[Si Jesus et] tawagen a . . . Prinsipe na Kareenan. Say ilaknab na pananguley to tan say kareenan et agmangangga.” (Isaias 9:6, 7) Bilang Manuley ed Panarian na Dios, gawaen nen Jesus ya mareen so interon mundo tan agbalot mangangga itan ya kareenan.

• “Iliktar to so mairap-bilay ya onkekerew na tulong, tan . . . siopaman ya anggapoy ontutulong.” (Salmo 72:12-14) Usaren nen Jesus so autoridad to pian patas so pantrato ed amin, kanian anggapo lay nagawan guerra, inkaruksa, tan kairapan.

• “Anggapo lay nasyon a mangitagey na espada sumpad sananey a nasyon, agmet la ra manaral a miguerra.” (Isaias 2:4) No si Jesus lay manuley, aralen na totoo so mikareenan aliwan milaban.

Pian naamtaan yo no panon ya gawaen nen Jesus ya mareen so interon mundo tan no antoy epekto na satan ed sikayo, bantayan so antikey ya video ya Anto so Panarian na Dios?

No antoy imbangat nen Jesus

Natan ni labat et minilyon lan totoo so manbibilay ya walaay kareenan lapud saramay imbangat nen Jesus. Diad samay kabkabat ya Sermon ed Palandey, imbangat nen Jesus iray prinsipyon makatulong ed inagew-agew pian makapikareenan iray totoo ed sakey tan sakey. Niay pigaran alimbawa:

• “Maliket iray mikakareenan.” (Mateo 5:9) Pinaseseg nen Jesus iray patumbok to ya agda labat basta iiwasan so gulo, dapat mikareenan met ira.

• “Mikareenan ka nid sikato, insan kapawil mo, iter mo so apay mo.” (Mateo 5:23, 24) Pinaseseg nen Jesus iray ondedengel ed sikato ya kaukolan dan resolbien ya tampol so agda pantatalosan. Imbaga to ya importantin mikareenan ira pian marakep so relasyon da ed Dios.

• “Agkayo la manguukom ta pian agkayo naukom.” (Mateo 7:1) Pinasakbayan itayo nen Jesus ya agtayo dapat huhusgaan so arum odino ilaloan tayon gawaen day sakey a bengatla ya anggan sikatayo et agtayo nagawaan, ta pansengegan labat iratan na pankokolkol. Imbaga nen Jesus ed saray patumbok to ya imbes ya anapan day lingo so arum, ‘itultuloy dan perdonaen’ so kakulangan da.—Lucas 6:37.

Gagawaen na dakel ya totoo ed nanduruman pasen na mundo iray imbangat nen Jesus anggano wala rad pasen ya napnapnoy inkaruksa tan inkaapag-apag. Naaralan dan resolbien iray agpantatalosan ya ag-ira mikokolkol, naaralan day mamerdona, tan ipapanengneng day panangaro anggan diad saramay aliwliway panagtrato da ed sikara.

Pian naamtaan yo no panon ya akatulong iray imbangat nen Jesus pian naalmo na totoo so kareenan, basaen so artikulon “Kareenan Anggano Walay Guerra tan Panlalaban.”