Antoy Nagawa ed Relihyon?—No Antoy Ibabaga na Biblia

Kasin dismayado ka tan nasyosyodotan ka ed relihyon? Tua ya walay maong ya epekto na relihyon ed arum ya grupo na totoo tan ed arum ya indibidual, pero dakdakel met so mauges ya ginawa na satan. Oniay imbaga na Encyclopedia of Religion and War: “Say sengegan na arum ed saray sankagrabian ya guerra ya agawad history et lapud nanduruman papanisiaan na saray relihyon.” Maslak ya lider na relihyon et uusaren da labat so relihyon pian suportaan so sakey ya ideya ed politika, aliwan pian dayewen so Dios. Wala ni ingen iray lider na relihyon ya iyaamot day gagawaen dan seksual ya panag-abuso odino panagtakew.

No sika et nadidismaya kad relihyon, say Dios ey, anto kasi nalilikna to? Ibabaga na Biblia ya agnaliliketan so Dios ed maslak ya relihyon lapud saray gagawaen da. Nabasa met ditan iray propesiya no antoy gawaen to ed relihyon. Diad simbolikon paraan, ipapaliwawa na Biblia ya walay asingsingger lan gawaen na Dios ed amin ya relihyon diad interon mundo. Tan agnin balot itan agawa ed kapiganman.

Antoy ibabaga na Biblia ya nagawa ed relihyon?

Propesiya: Diad libro na Biblia ya Apocalipsis, abitla so sakey ya imoral a bii ya say ngaran to et Makapanyarin Babilonia. Sayan imoral a bii et akayurong ed ambalbalangan atap ya ayep. Balet pinatey lanlamang na satan ya atap ya ayep so imoral a bii.—Apocalipsis 17:3, 5, 16.

Say labay ton ibaga: Isisimbolo na imoral a bii odino Makapanyarin Babilonia so amin ya palson relihyon—saray relihyon ya ag-aawaten na Dios.a Isisimbolo balet na ambalbalangan atap ya ayep so United Nations (UN).b Akayurong imay imoral a bii ed ambalbalangan atap ya ayep, ipapanengneng na satan ya labay na palson relihyon ya impluensyaan odino kontrolen ni ingen so UN. Tan ipapanengneng na impamatey na atap ya ayep ed imoral ya bii ya puliktaran na UN tan saray bansan onsusuporta ed satan so amin ya palson relihyon ed interon mundo tan deralen da iratan. Talagan naderaderal ed satan so palson relihyon!

Akalugan ed ambalbalangan atap ya ayep so imoral a bii ya abitla ed libro na Apocalipsis. Walad bandad kawigi na atap ya ayep so headquarters na United Nations, tan walad kawanan iray pasen ya pandadayewan na nanduruman relihyon.

Panon ya naderal so palson relihyon?

Propesiya: “Say samploran saklor ya anengneng mo tan say atap ya ayep et busolen da may imoral a bii tan sikatoy deralen tan . . . sigpot dan poolan. Ta inyan na Dios ed kapusoan da so panggawa ed samay walad kanonotan to, salanti, gawaen imay saksakey a kanonotan da, ya iter da ed atap ya ayep so panarian da . . . Diad sakey ya agew et onsabi iray salot to, say ipapatey tan panermen tan eras, tan sikatoy sigpot a napoolan, lapud si Jehovac a Dios, ya angukom ed sikato, et mabiskeg.”—Apocalipsis 17:16, 17; 18:8.

Say labay ton ibaga: Iyan na Dios so “kanonotan to” ed saray bansa. Pakiwasen to ran iter ed UN so “panarian da” odino pakayari da ed politika. No wala lad UN itan ya pakayari, deralen to lad satan so amin ya palson relihyon ed interon mundo. Makapabigla tan mapmaples itan ya nagawa, ya singa labat nagawa “diad sakey ya agew” kanian dakel so nabigla.—Apocalipsis 18:21.

Akin et kaukolan ya deralen so palson relihyon?

Propesiya: “Saray kasalanan to et atipon ya anggad tawen, tan ninonot na Dios iray ag-inkahustisya a ginawa to.”—Apocalipsis 18:5.

Say labay ton ibaga: Diad loob na nilasus ya taon, dakdakel so mauge-uges ya ginawa na palson relihyon. Imanoen so arum ed saray kasalanan to. Saraya so rason no akin ya inmabot ed punton kaukolan lan deralen na Dios:

Manpapasamano so sakey ya lider na politika tan sakey ya lider na relihyon.

Mibabali ed politika. Imbangat nen Jesu-Kristo iray patumbok to ya ag-ira nepeg ya mibabali ed politika. Imbes, say nepeg ya pantiwalaan da et say Panarian na Dios, sakey itan ya gobierno ed tawen ya asingger lan onsalat ed gobierno na too.d (Daniel 2:44; Mateo 6:9, 10; Juan 6:15; 18:36) Pero kabaliktaran so ginawa na saray palson relihyon, imbes ya manmatoor ira ed Dios, grabe pibabali ra ed politika. Kanian ibabaga na propesiya ed Apocalipsis ya say Makapanyarin Babilonia et nanggawa na “seksual ya imoralidad” tan inanga-angay to may tawag ed sikaton “maimpluensyan imoral a bii.”—Apocalipsis 17:1, 2; Santiago 4:4.

Sankabembenan na sakey ya lider na relihyon so krus tan bebendisyonan to iray sundalo.

Maruksa. Ibabaga na Biblia ya say palson relihyon so natetel ed impatey na “amin [ya totoon] pinatey diad dalin.” (Apocalipsis 18:24) Dakdakel natan so relihyon ya onsusuporta odino mangigagapo ni ingen na guerra tan terorismo imbes ya bangatan da komon iray membro da ya mikareenan.

Walay kuartan sankabembenan na sakey ya lider na relihyon.

Maagum. Sankanengneng so “maluho ya anggapoy baing” ya panagbilay na palson relihyon. (Apocalipsis 17:4; 18:7) Inusar day koneksion tan impluensya ra pian onyaman iran maong. Pero agnaliliketan so Dios ed gagawaen da.—Tito 1:7.

Mansasalita so sakey ya lider na relihyon.

Matila. Kontra ed katuaan ya walad Biblia iray ibabangat tan ipapagawa na palson relihyon.e Satan so lapuan na dakdakel ya bangat tan kagagawa ya mangibabalang ed totoo tan mangibabaliwala ed Dios. Kanian diad propesiya, tinawag itan ya “ina na . . . saray makapadimlan bengatla diad dalin.”—Apocalipsis 17:5; 18:23.

**Kasin naderal so amin ya relihyon?**

Andi. Abitla ed libro na Apocalipsis so sakey ya grupo na totoo ya nanlapud nanduruman parte na dalin, tinawag ira ya “baleg ya ulop.” (Apocalipsis 7:9) Sayan baleg ya ulop et ‘akasulong na amputin kawes,’ isisimbolo na satan so matoor ya pandadayew da ed Dios base ed saray estandarte to. Makaliktar ira ed “baleg a kairapan,” atan may ibabaga na Biblia ya panaon ya naderal so palson relihyon tan amin ya onkokontra ed Dios. (Apocalipsis 7:13, 14; 19:11, 19-21) Say baleg ya ulop ya akasulong na amputin kawes et kabiangan na tuan relihyon, atan so relihyon ya mansiansia ed andi-anggaan.f

Malikeliket ya manaakar so sakey a baleg ya ulop na lalaki, bibii, tan ugugaw. Diad benegan da, nanengneng ya anggapo lay akeran too tan aderal met la ray pasen ya pandadayewan na saray relihyon. — Makaliktar so baleg ya ulop na saray tuan mandadayew ed Dios no naderal la so palson relihyon

Antoy epekto ed sika na kaderal na palson relihyon?

Nainawaan ka tan ondeen so nonot mo ta naamtaan mon agmanaya maliket so Dios ed saray mauge-uges ya gagawaen na palson relihyon. Nawalaan kay pag-asa ed arapen ta antam ya asingger lan naandi so amin ya relihyon ya mangibabaliwala ed Dios tan pansesengegay paniirap na totoo.

Makaseguro ka met ya walay dugan paraan na pandayew ed Dios. Ibabaga na Biblia ya “saray mandadayew ed Ama et mandayew ed sikato diad espiritu tan katuaan, ta diad tua et ontan iray aanapen na Ama a mandayew ed sikato.” (Juan 4:23) Oniay ibabaga ed sikara na Dios: “Paway kayo ed sikato [say Makapanyarin Babilonia], sikayo ran totook, no agyo labay so makapibiang ed saray kasalanan to, tan no agyo labay so nalanor a mangawat ed saray salot to.” (Apocalipsis 18:4) On, labay na Dios ya mandayew iray totoo ed sikato base ed katuaan ya walad Biblia. (1 Timoteo 2:3, 4) Insipan to ed saramay mandayew ed sikato ya manbilay ira diad andi-anggaan.—1 Juan 2:17.

a Pian naamtaan yo no anto so apatiran pakabidbiran na Makapanyarin Babilonia, basaen so artikulon “Anto so Makapanyarin Babilonia?”

b Pian naamtaan yo so anemiran pakabidbiran ed sayan atap ya ayep, basaen so artikulon “Anto so Ambalbalangan Atap ya Ayep ed Apocalipsis Kapitulo 17?”

c Jehova so ngaran na Dios. (Salmo 83:18) Nengnengen so artikulo ya “Siopa si Jehova?”

d Parad kaaruman ya impormasyon, bantayan so video ya Anto so Panarian na Dios?

e Nabasa yo so pigaran alimbawa diad kahon ya “Kabiangan Kasi na Makapanyarin Babilonia Anggan Saramay Relihyon ya Mangibabagan ‘Kristiano’ Ira?”

f Pian naamtaan yo no panon kayon natulongan na Biblia ya nabidbir so tuan relihyon, basaen so artikulon “Panon Kon Naamtaan No Dinan so Tuan Relihyon?”