Mensahe ya Nanlapud Salita na Dios—Pag-asa Parad Saray Refugee!

Kada taon, minilyon ya totoo so napipilitan ya onalis na ayaman pian agnipeligro so bilay da. Kasin ontan met so agawad sika? Agka mapaga ta agmo bukbukor ya arapen itan ya problema. Walay pag-asa ya iiter na Dios ed sika! Walay balibalin bilay ya manatalaran ed sika! Tan naaralan mo itan ed Salitay Dios, say Biblia!

“Aliwa labat ya praktikal ya tulong so kaukolan na saray refugee tan saray totoon tinmaynan ed ayaman da,a kakkaukolan da met so pag-asa ed arapen,” so kuan nen Christos Stylianides ya commissioner na European Union.b No walay pag-asa ya sankanonot na totoo, mas maliwaway nonot da tan positiboy liknaan da. Pero aliwa labat ya pag-asa so kaukolan na saray refugee, kaukolan da met so ligliwa pian nasarag da ray mair-irap ya dadalanen da.

“Nen kaukolan ko lay onalis ed bansa mi tan taynan ko lay pamilyak, ambelbelat so liknaan ko tan pakaliknak et bukbukor ko. Natatakot ak ya maong, agaylay ermen ko, tan agko la amtay gawaen ko.”—Emmanuel, Haiti.

Kasin maka-relate ka ed si Emmanuel? No tinaynan mo met so ayaman mo, seguradon kakkaukolan moy tulong, amay talagan naasinggeran mo pian nawalaan kay pag-asa tan naligliwa ka. Panon ya makatulong ed sika so Salitay Dios odino say Biblia?

Ligliwa ya Manlalapud Salita na Dios

Oniay ibabaga na Biblia: “Inaro [nen Jehova]c so dayo.”—Deuteronomio 10:17, 18.

Oniay ibabaga na Biblia: “Si Jehova et asingger ed amin ya ontatawag ed sikato.”—Salmo 145:18.

Oniay ibabaga na Biblia: “Agbalot manggaway mauges so tuan Dios . . . Agpipikeweten na Makapanyarin-amin so hustisya.”—Job 34:10, 12.

Labay ton ibaga, aliwan say Dios so rason no akin et maniirap ka. Agto ka ikdan na panirapan mo pian dusaen o suboken ka.

Pag-asa ya Manlalapud Salita na Dios

Ibabaga na Biblia so gawaen na Dios parad sikatayo diad arapen. Imanoen no panon ya natutulongan na satan ya pag-asa iramay totoon tinaynan day ayaman da.

Oniay ibabaga na Biblia: “Punasen [na Dios] so amin a lua ed kamataan da, tan anggapo lay patey, anggapo met lay panermen tan panakis tan panotot.”—Apocalipsis 21:4.

Labay ton ibaga, onsabi panaon ya naandi lay paniirap. Imbaga na Dios ya solusyonan to so amin ya problema ya mangeekal ed pag-asa na saray totoo natan.

“Asingsingger lan ekalen na Dios so amin ya mauges ya nagagawa ed mundo kaiba lay ag-inkahustisya. Lapud satan ya pag-asa, say lanang kon sankanonot et amay panaon ya anggapo lay amin ya paniirap.”—Karla, El Salvador.

Oniay ibabaga na Biblia: “Agla nanonotan iray apalabas a bengatla, tan agla iratan mansiansia ed puso.”—Isaias 65:17.

Labay ton ibaga, agtayo la nasakitan ed saray aliwliwan agawad bilay tayo. Seguroen na Dios ya aliwan legay bilay mon anosan tan sankanonot iray ansasakit ya agawad bilay mo.

“Ibabaga na Biblia ya agtayo la anggan nanonotan so sakit ya alikna tayo nen tinaynan tayoy ayaman tan amin ya kayarian tayo. Lapud wala ’tan ya pag-asa, nasasarag ko ray mairap ya situasyon natan ta amtak ya asingger lan manguman so situasyon tayo.”—Natalia, Ukraine.

Oniay ibabaga na Biblia: “Say Dios na tawen et mangiletneg na panarian . . . Tan sayan panarian et . . . buyaken tan panganggaen to irayan amin a panarian.”—Daniel 2:44.

Labay ton ibaga, walay perpekton gobierno ed tawen ya uleyan toy dalin. Asingsingger lan onsalat so gobiernoy Dios ed amin ya gobiernoy too. Iter na sayan gobierno so tuan kareenan tan seguridad, hustisya, tan anggapo met lay manirap.—Miqueas 4:3, 4.

“Ombibiskeg so liknaan ko ta amtak ya temporaryo labat iray problema. Diad arapen, anggapo lay manpairap ed sika, anggapo lay diskriminasyon, tan agda ka la pansuspetsaan. Asingsingger lan ekalen na Panarian nen Jehova so amin ya problemay too.”—Mustafa, Middle East.

Karunongan ya Manlalapud Salita na Dios

Makatulong so karunongan ya walad Biblia pian kalkalnam ya natanggap so agawad sika. Ontulong met itan pian makapan-adjust ka ed balon situasyon mo lalo la no dakdakel ya kayarian so ataynan mo. Imanoen no panon ya akatulong irayan prinsipyo na Biblia ed saray refugee:

Oniay ibabaga na Biblia: “Anggano dakdakel so kayarian na sakey a too, ag-iratan makapangiter ed sikato na bilay.”—Lucas 12:15.

No panon ya makatulong ed sika ’tan ya bilin: Ompan abigbigla ka tan agurdoy isip mo. Ompan maer-ermen ka ni ingen ta dakel so naandid sika. Pero no say isipen mo la et amay mabilay ka natan, agmo la masyadon panermenan tan kawkawanen iray naandid sika.

“Mas importante bilay nen say materyal ya kayamanan. Diad onia ran situasyon, agka niliktar na kuartam tan kaykayarian mo.”—Natalia, Ukraine.

Oniay ibabaga na Biblia: “Agmo ibabaga, ‘Akin et mas maabig iray agew nensaman nen say natan?’”—Eclesiastes 7:10.

No panon ya makatulong ed sika ’tan ya bilin: Tua ya mairap so situasyon mo natan. Pero no iwasan mon ikomparay bilay mo natan ed bilay mo nensaman, mas mainomay mon awatey situasyon mo natan.

“Lapud tanggap ko lay situasyon ko, mas maliket ak natan.”—Eli, Rwanda.

Oniay ibabaga na Biblia: “No walay naakan tan kawes tayo, mankontento tayo la ed saratan.”—1 Timoteo 6:8.

No panon ya makatulong ed sika ’tan ya bilin: No walad sika iray kaukolan pian nabilay, mankontento ka la. No agmo anapen so anggapod sika, agka masyadon na-stress tan agka met aburidon maong.

“Tutulongan ak na Biblia pian agko sankanonot lan sankanonot iray naandi ed sikami. Malikeliket kami nen asawak ta mabilay kami tan wala kamid ligtas ya lugar.”—Ivan, Ukraine.

Oniay ibabaga na Biblia: “Sirin, amin a labay yon gawaen na totoo ed sikayo, ontan met so nepeg yon gawaen ed sikara.”—Mateo 7:12.

No panon ya makatulong ed sika ’tan ya bilin: No mapasensya tan maomaong ka, labalabay da kan kaulop. Napaliisan mo met so diskriminasyon tan mas mainomay kan natanggap na saray totoo ed lugar ya inalisan mo.

“Labalabay na totoo ya respetoen tayo ra, panengnengan tayo ray kamaongan, tan aroen tayo ra. No ipanengneng tayo iratan ya ugali, seguradon maong so ulopan tayo tan saray totoo ed lugar ya inalisan tayo.”—Angelo, Sri Lanka.

Oniay ibabaga na Biblia: “Ipaamta yo ed Dios iray kerew yo; tan say kareenan na Dios . . . so manbantay ed saray puso tan nonot yo.”—Filipos 4:6, 7.

No panon ya makatulong ed sika ’tan ya bilin: Ipikasim ed Dios so amin ya walad pusom, ibagam ed sikato iray kailangan mo, saray pakakatakotan mo, tan no anto ray pampapagaan mo. No ipikasim iratan ed Dios, seguradon onlemew so liknaan mo, tan agka masyadon abupburido legan kan mana-adjust ed situasyon mo.

“Ipipikasik ed Dios so amin ya problemak, tan eebatan to ray kerew ko. Makakatulong met iray nanaaralan kod Biblia pian naliwawaay nonot ko.”—Yol, South Sudan.

“Baleg ya tulong ed siak iray advice na Biblia pian onkalma ak tan nasarag ko iyan mair-irap ya kipapasen ko.”—Valentina, Ukraine.

“Apabiskeg ak ya maong nen naaralan ko ya walay iter ed siak nen Jehova ya balibalin bilay diad arapen.”—Emmanuel, Haiti

Labay mo ni makaaral ed ibabaga na Biblia nipaakar ed ligliwa tan pag-asa, tan no akin ya napantiwalaan mo iratan? Sarag mon i-request ed saray Tasi nen Jehova ya bisitaen da ka. Anggapoy bayar to ’tan. Maliket iran ontulong ed sika!