Artificial Intelligence—Makatulong o Makaperwisyo?—Antoy Ibabaga na Biblia?

Diad agano ni labat, angibagay opinyon iray manuley ed mundo, saray scientist, tan technologist tungkol ed nagawaan na artificial intelligence (AI).a Parad sikara, makatulong met itan, pero naaaburido ra ta ompan usaren itan na arum diad aliwan paraan.

• “Say AI so sakey ed saray mausa-usar ya teknolohiya natan, ta sarag ton i-improve so bilay na totoo . . . Pero lapud AI, posible met ya naapektoan so safety tan seguridad tayo, say privacy tan arum ed saray karapatan tayo, tan nayarin nairapan tayo ya mantiwala ed demokratikon uley na gobierno.”—Kamala, vice president na United States, Mayo 4, 2023.

• “Tua, nayarin makatulong so artificial intelligence (AI) ed pangasikaso ed laman, pero wala met iray makapuy ya epekto na satan ed laman tan emosyon tayo,” so insulat na sakey ya internasyonal a grupo na saray doktor tan health-care expert ya indaulo nen Dr. Frederik Federspiel, diad sakey ya artikulo ya im-publish nen Mayo 9, 2023, diad BMJ Global Health.b

• “Sarag ya usaren na totoo so AI pian mangikalat na palson impormasyon. Agmanbayag, ompan dakel ya totoo so naandian na trabaho lapud satan. Naaaburido met so arum ya konektado ed teknolohiya so trabaho da ta ompan diad arapen et niiyan ed peligro iray totoo lapud AI.”—The New York Times, Mayo 1, 2023.

Diad ilabas na panaon, naamtaan lanlamang no kasin makatulong o makaperwisyo ed totoo so AI. Antoy ibabaga na Biblia?

Akin et walan-walay problema anggano mansasagpot iray totoo

Ibabaga na Biblia no akin ya agsarag na totoo so makapanggawa na saray balon teknolohiya ya nausar labat parad pankamaongan.

1. 1. Anggano maong met so motibo na totoo ed gawaen da, ompan wala ray aliwliwan epekto na satan ya agda ilaloan.

   • “Walay dalan a singa duga ed pakanengneng na too, balet say sampot to et ompugtad ipapatey.”—Proverbio 14:12.

2. 2. Anggapoy pakayari na sakey ya diktaan so arum no panon dan usaren so imbension o ginawa to.

   • “Itilak ko lanlamang [so nansagpotan ko] ed samay toon onsublay ed siak. Tan siopay makaamta no sikatoy magmaliw a marunong odino makulangkulang? Ingen ta uleyan toy amin a bengatlan agamoran ko diad dalin ed panamegley na baleg a sagpot tan karunongan ko.”—Eclesiastes 2:18, 19.

Ipapanengneng labat na saratan ya kailangan tayo so panangigiya na Amalsa ed sikatayo.

Siopa so dapat ya pantiwalaan tayo

Im-promise na Amalsa ed sikatayo ya agto abuloyan ya lapud saray totoo tan saray teknolohiya ya ginawa da et naderal so planetan dalin tan saray totoo.

• “Say dalin et mansiansia ya anggad angga.”—Eclesiastes 1:4.

• “Saray matunong et tawiren day dalin, tan manbilay ira ditan diad andi-anggaan.”—Salmo 37:29.

Uusaren na Amalsa so Biblia pian igiya itayo tan magmaliw ya mareen tan balibali bilay tayo diad arapen. Pian makaaral ni tungkol ed ibabaga na Biblia, basaen iray artikulo ya “Kasin Walay Napantiwalaan ya Giya Pian Maong so Bilay Mod Arapen?” tan “Makakaasa Ka sa Isang Magandang Kinabukasan.”