Kasin Akaparaan Ka ed Saray Subok Kayari na Bautismom?

1-2. Antoy gawaen tayo pian agtayo makaarawi ed si Jehova anggano wala ray onsabin subok? Mangiter na ilustrasyon.

DIAD sayan mundo nen Satanas, iilaloan tayo la ya walan-wala ran talagay subok ya dalanen na saray Kristiano. Diad tua, impasakbay la itan nen Jesus. (Mat. 18:7) No agtayo manalwar, nayarin pakagapolan tayo iratan. Singa bilang, ompan nasubok so pananisia tayo lapud saray agagi. Pero no akaparaan tayo, agtayo makaarawi ed si Jehova anggano wala ray subok.

² Imanoen iyan ilustrasyon: Di ba, lanang tayon napapanonotan ya manparaan parad saray kalamidad. Panon tayon gagawaen itan? Unona, aamtaen tayo no anton kalamidad so mabetbet ya nagagawa ed lugar tayo, lalo la no balo tayo ni labat ed satan ya pasen. Insan no amta tayo la no anto iratan ya kalamidad, iplano tayo la ray nepeg tayon gawaen pian ligtas tayo anggano onsabi so kalamidad. (Pro. 21:5) Mipadpara, no amta tayo la ray subok ya nayarin dalanen tayo, niparaan tayo lay sarili tayo. Kanian anggano onsabi so subok, amta tayo lay gawaen tayo tan agtayo makaarawi ed si Jehova. (Sal. 17:5) Pantongtongan tayo sirin so taloran subok ya nayarin dalanen tayo, tan no panon tayon niparaan so sarili tayo.a

NO ASAKITAN KA ED IMBAGA O GINAWA NA SAKEY YA AGI

3. Antoy nayarin sakey ya subok ed sikatayo diad loob na kongregasyon?

³ Kasin nanonotan mo ni may aliknam nen first time moy akiaral tan anengneng moy aroan na saray agagi? Ompan atan so akakombinse ed sika ya nalmom lay katuaan. (Juan 13:35; Col. 3:12) Ontan ya mismo so alikna nen Blanca.b Pero walay agawa ya agto inilaloan nen abautismoan la. Kuan to: “Walay sister ya aliwliway ginawa tod siak. Naimanok met ya lanang ton babalawen iray agagi. Agak makapanisia! Ta siempre nen Bible study ak ni, naaralan ko ya pansasagpotan na saray Tasi nen Jehova so magmaliw ya mareen tan maaro.” Tua met ya pansasagpotan na saray agagi ya ipanengneng iray balibalin ugali. Pero tandaan tayo ya aliwa ran perpekto. (Efe. 4:​23, 24; 1 Juan 1:8) Kanian no maminsan, ompan walay ibaga o gawaen da ya agtayo nagustoan. (Sant. 3:8) Makapaermen ta wala ray tinmundan nanlingkor ed si Jehova lapu labat ta asakitan ira ed imbaga o ginawa na sakey ya agi.

4. Antoy makatulong pian agtayo nagapol no bilang ta nasakitan itayo na sakey ya agi? (Efeso 4:32)

⁴ Antoy gawaen mo pian natan ni labat et niparaan mo lay sarilim tan agka nagapol no bilang ta nasakitan ka na sakey ya agi? Ipasal mo lan ipanengneng so kaabigan tan panangabagey, ya singa ibabaga na Efeso 4:32. (Basaen.) No ipanengneng mo iratan ya kualidad, seguradon maong so pipiulop mo ed saray agagi. Ipasal mo met lay sarilim ya itepel so lingo na arum tan mabulos mo ran perdonaen. Pian nagawaan mo itan, isip moy mabulos ya pameperdona nen Jehova ed sika kada no onkerew kay perdona ed sikato. (Mat. 6:12) Anggano maminpiga kan nalingo, agto isisiblet so panamerdona to. No sankanonot mo itan, mas mainomay moy mamerdona.

5. Anton prinsipyo ed Biblia so ontulong ed sikatayo no walay agtayo agustoan ya imbaga o ginawa na sakey ya agi? (Proverbio 19:11) (Nengnengen met so litrato.)

⁵ Basaen so Proverbio 19:11. Ibabaga na Biblia ya no asakitan tayo, say aralem a pakatalosc so mamakepa ed pasnok tayo. Atan ya prinsipyo so akatulong ed si Rima, sakey ya sister ya pigaran taon ni labat ya abautismoan. Kuan to: “No walay agko agustoan ya imbaga o ginawa na sakey ya agi, say iisipen ko lan tampol et amay walad Proverbio 19:11. Tatalosan ko la—ompan walay dadalanen to o lapud epekto itan na saray agawad sikato nensaman. Itatagar ko met ya manpulong iman ya agi pian mas nakabkabat ko.” Balibali itan ya gagawaen nen Rima. Marakep sirin no manggawa ka met na paraan pian nakabkabat mo ray agagi. No bilang et nasakitan da ka, mas mainomay mo la ran perdonaen ta kabkabat mo la ra tan natatalosan moy situasyon da.

6. Antoy gawaen tayo pian lalon onapit so liknaan tayod saray kakongregasyon tayo?

⁶ Antoy gawaen mo pian lalon onapit so liknaan mo ed saray kakongregasyon mo? Say nengneng mo et saray mararakep ya ugali da. (Ikompara so Proverbio 10:12; Roma 12:10; Fil. 2:​2, 3) Imanoen no panon itan ya akatulong ed si Mark, sakey ya brother ya agano ni labat ya abautismoan. Nen lanang to lan nakakaiba iray kakongregasyon to, diman to naimano iray kakapuyan da. Antoy akatulong ed si Mark pian agnagapol? Kuan to: “On tua, wala ray lingo tan kakapuyan na saray agagi. Pero angkekelag labat iratan no ikomparad saray mauges ya gagawaen na totoo ed mundo. Kanian agko la pinunuyan iray lingo na saray kakongregasyon ko. Say nenengnengen ko la et saray maong ya ugali da.” No ontan met so gawaen mo, seguradon lalon onapit so liknaan mo ed saray kakongregasyon mo.

NO NANAILIW MO MAY DATIN BILAY MO

7. Kapigan tayo nayarin nanonotan iray bengatlan tinaynan tayo la?

⁷ Seguradon malikeliket ka nen tinaynan moy mundo nen Satanas tan nagmaliw kan lingkor nen Jehova. Seguro naisip mo, ‘Agko la labay ya pawilen may datin bilay ko.’ Pero no ondadalan ka lad graben subok tan nantatabonan lay problemam, ompan nanonotan tan nailiw mo ni ingen iray insakripisyom parad si Jehova. (Ikompara so Numeros 11:​4-6.) Singa bilang, wala ray agagi ya nan-resign ed marakep ya trabaho da ta atan so manguupot na panaon da. Say arum et iniwasan la na saray kakaaro da nen manaaral la ray Biblia. Tan wala met iray arum ya ginawa day anggaay nayarian da pian nitunda day bisyo ra. Makapaermen balet ta wala ray agagi ya atukson pawilen imay datin kabibilay da kanian akaarawi ira ed si Jehova. Anto sirin so gawaen mo pian anggan antoy nagawa et agmo lan balot pawilen iramay bengatlan tinaynan mo la?

8. Antoy naaralan tayo ed alimbawa nen Abraham tan Sara?

⁸ Nabasa ed Biblia iray matoor ya lingkor na Dios ya dakel so tinaynan tan insakripisyo ra parad si Jehova. Singa bilang, tinaynan nen Abraham tan Sara so mainawa tan maligen ya bilay da diad syudad na Ur pian naunor day ganggan nen Jehova, tan tolda labat so nanayaman da. (Heb. 11:​8, 9) Seguro sebangsebang met ed nonot da imay datin bilay da diad Ur. Pero kasin atan so ‘naynay dan sankanonot’? Andi. Panon tayon amta? On ta no atan so sankanonot da, atukso ra komon ya ompawil ed Ur. Pero aliwan ontan so ginawa ra. Imbes ya nonoten da ni apalabas, nampokus la ra ed arapen.—Heb. 11:​15, 16.

9. Antoy pakanengneng nen apostol Pablo ed amin ya insakripisyo to? (Filipos 3:​7, 8, 13)

⁹ Say sakey ni ya balbaleg so insakripisyo to parad si Jehova et si apostol Pablo. Atagey so inaral nen Pablo. Sikatoy imbangat a mismo nen Gamaliel, sakey ya kabkabat tan respetadon managbangat diad saman ya panaon. (Gawa 22:3) Baleg so tsansa nen Pablo ya nawalaay atagey ya posisyon ed Judaismo. (Gal. 1:​13, 14) Pero nen inawat toy maong ya balita tan nagmaliw ya Kristiano, tinaynan to iratan ya amin. Kumustay nagmaliw ya bilay nen Pablo nen Kristiano la? Dakel so dinalan ton subok. Singa bilang, asali toy nilewet, impriso, tan binusol na saray kapara ton Judio. (2 Cor. 11:​23-26) Kasin pagbabawian nen Pablo so impagmaliw ton Kristiano tan inisip to ya mas maong ni may datin bilay to? Andi! Imbaga to ingen ya sulit so amin ya insakripisyo to. Ag-iratan makakiking no ikomparad balbaleg ya pribilehyo to ya napanlingkoray Kristo Jesus tan say premyo ya awaten to diad arapen.—Basaen so Filipos 3:​7, 8, 13.

10. Anto dapat so lanang tayon isipen? (Marcos 10:​29, 30) (Nengnengen met so litrato.)

¹⁰ No nalilikas mod sarilim ya sankanonot mo la ray bengatlan tinaynan mo, komon ta nonot mo met no akin ya tinaynan mo iratan. (Ecl. 7:10) On tua, wala ray insakripisyom, pero ag-iratan makakiking no ikompara ed saray bendisyon ya naawat mo nen naamtaan moy katuaan. Singa bilang, akaarom so Sankatagyan ed interon uniberso. (Pro. 3:32) Awalaan ka met na espiritual ya pamilya ya mangaaro ed sika. (Basaen so Marcos 10:​29, 30.) Tan walay balibalin bilay ya manatalaran ed sika diad arapen! (Isa. 65:​21-23) No lanang mon isipen iray naawat mon bendisyon manlapu la nen nagmaliw kan lingkor nen Jehova, seguradon agmo la labay ya pawilen so amin ya tinaynan mo.

11. Antoy naaralan mo ed si Rosemary?

¹¹ Si Rosemary et abautismoan nen manga 50 so taon to. Imanoen no antoy ginawa to pian agto la nailiw iray datin gagawaen to nen aliwa nin Tasi. Kuan to: “Diad tua, nen balobalo ak ni labat ya Tasi, maermen ak no panaon lay Christmas. Ta siempre apasal ak ya kaibak so pamilyak ed satan ya okasyon. Labalabay kon regaloan iray kapamilyak. Malikeliket ak no nanengneng ko ray ana’ko tan apok diad paliber na Christmas tree tan lulukasan da ray regalok ed sikara.” Antoy akatulong ed si Rosemary? Kuan to: “Walay ginawak pian nakaibak nin siansia iray kapamilyak diad arum ya agew. Kada taon, iimbitaan ko ran amin, iikdan ko ray regalo, tan ibabagak ed kada sakey ed sikara no akin ya inar-arok ira.” Wala ni sakey ya subok ed si Rosemary. Kuan to: “Nen naamtaan koy katuaan, iniwasan ak la na saray kakaarok. No maminsan, nanailiw ko ra ta agko la ra nakakaiba tan pakaliknak et singa anggapoy kaarok.”d Antoy ginawa nen Rosemary pian nalabanan to ’tan ya liknaan? Mangitatagar kuno na nanduruman sister kada no manpulong. Kuan to: “Akabkabat kon maong iraman ya sister kanian naar-arok ira tan nagmaliw kamin malet ya sankaaro.” Antoy naaralan mod si Rosemary? Seguro wala ray gagawaen mo nensaman antis mon naamtaan so katuaan ya nanailiw mo natan. Pero singa si Rosemary, manisip kay naisalat mo ed saray bengatlan nanailiw mo—amay antam ya mamaliket ed sika tan ed si Jehova. (Fil. 4:​8, 9) Tan nia so tandaan mo: Lapud pinilim so manlingkor ed si Jehova, mas ni so iter tod sika nen say amin ya insakripisyom parad sikato.

NO TINAYNAN NA ARUM SI JEHOVA

12. Antoy ansakisakit ya nagawa ed loob na kongregasyon?

¹² Nen nagmaliw kan Tasi, seguradon malikeliket ka ta akalukpos kad sayan mauges ya mundo tan nagmaliw kan parte na organisasyon ya malinis ed espiritual tan moral. (Isa. 65:14) Pero no maminsan, ompan walay nabalitaan mon agi ya akagawa na seryoson kasalanan. Tan say makapaermen, wala ray nanaekal ed kongregasyon lapud agda pagbabawian so ginawa ra. (1 Cor. 5:13) Atan kuno so nagmaliw ya subok ed si Sister Samar. Kuan to: “Nen agano ak ni labat ya abautismoan, walay elder ya akagawa na seryoson kasalanan tan nakal ed kongregasyon. Abigbigla ak! Agak makapanisia ya nitepel na sakey ya elder so mankasalanan ed si Jehova tan ed kongregasyon.” On tua, baleg so tiwala tayo ya inar-aro na saray agagi si Jehova tan labalabay day manmatoor ed sikato. (1 Cor. 13:​4, 7) Pero awaten tayo so realidad ya wala ran talagay nanaekal ed kongregasyon. Ansakisakit iya, lalo la no amay kaarom, kapamilyam, o rerespetoen mon agi et pinili ton taynan si Jehova.

13. Panon tayon niparaan so sarili tayo pian agtayo nagapol no walay kapamilya o kaaro tayo ya taynan toy Jehova?

¹³ Panon mon niparaan so sarilim pian agka nagapol no bilang ta walay kapamilyam o kaarom ya taynan toy Jehova? Pabiskeg moy relasyon mo ed si Jehova. (Sant. 4:8) Tandaan mo ya say katooran mo et agdapat akadepende ed katooran na arum. Kanian anggano nakakaibam so pamilyam tan say kongregasyon ed panagdayew ed si Jehova, importante ya walay sarilim ya eskedyul ya manpikasi tan manbasa na Biblia.—Sal. 1:2; 62:8.

14. Antoy naaralan tayo ed alimbawa nen apostol Pedro? (Juan 6:​66-68)

¹⁴ Makaaral tayo met ed si apostol Pedro. Wala may aminsan ya tinaynan na dakel ya disipulo si Jesus ta walay imbaga to ya agda natatalosan. Diad tua, ompan agmet itan atalosan nen Pedro. Pero imanoen tayo pay imbaga to ya nabasad Juan 6:​66-68. (Basaen.) Imbes ya manpaapekto si Pedro ed ginawa na arum ya disipulo, say ninonot to la et saray katuaan ya naaralan tod si Jesus. Kanian agkinmapuy so pananisia to tan ag-agapol. Singa si Pedro, agmo komon aabuloyan ya naapektoay katooran mod si Jehova lapud ginawa o desisyon na arum. Tandaan mo ya say organisasyon to so angibangat ed sika na katuaan. Agkan balot oniikban ed satan ya katuaan! Oniay imbaga nen Samar ya abitla nen niman: “No walay aliwan ginawa na sakey ya agi, lanang kon papanonotan so sarilik ya agko dapat idadamay iray agagi tan say organisasyon. Iisipen ko met ya antokaman so mauges ya gawaen na sakey, agbalot itan konsintien nen Jehova.”

15. Antoy naaralan mo ed eksperiensya nen Emily?

¹⁵ Imanoen so alimbawa nen Emily. Sakey simba kayari ton abautismoan, nakal ed kongregasyon si nanay to, tan tinaynan to ra. Oniay kuan nen Emily: “Agkon balot naisip ya nagawaan iya nen nanay ko. Aya la so sankairapan ya subok ed siak. Tan diad tua, nami-miss ko lan maong si nanay ko.” Antoy akatulong ed si Emily? Kuan to: “Agko bukbukor ya aarapen iyan subok. Wadtay tatay ko ya lanang ya mamapabiskeg ed siak, tan wadtan met iray agagi ed kongregasyon ya pamilya la so turing dad siak. Amin tayo et ondadalan ed nanduruman subok, kanian importante ya aroen tan pasesegen tayoy sakey tan sakey.” (1 Ped. 5:9) Antis ni sirin ya onsabi so subok, iyapit mo lay liknaan mo ed saray agagi. No ontay gawaen mo, makaseguro ka ya walay ontulong tan onsuporta ed sika, anggan anto ni tay subok ya onsabid bilay mo.

16. Antoy tandaan tayo? (Nengnengen met so litrato.)

¹⁶ Tandaan tayo met ya say rason no akin ya didisiplinaen nen Jehova iray lingkor to et lapud inar-aro to ra. (Heb. 12:6) Labalabay to ya makapawil ed sikato iramay nakal ed kongregasyon. (2 Ped. 3:9) Kanian no walay kaarom o kapamilyam ya nakal, makapantiwala ka ya gagawaen na saray elder so anggaay nayarian da pian natulongan dan ompawil ed si Jehova.—2 Tim. 2:​24, 25.

17. Antoy agtayon balot lilingwanan?

¹⁷ Apantongtongan tayoy pigaran subok ya posiblin dalanen mo kayari bautismom. Pero agka komon natatakot. Walay nagawaan mo pian niparaan mo lay sarilim tan nasarag mon arapen irayan mairap ya subok. Tan agmon balot lilingwanan ya wadtan ya lanang si Jehova ya ontulong ed sika. Tinulongan to ka la nensaman, tan labalabay to kan tulongan anggad angga! (1 Ped. 5:10) Iter ton iter so biskeg ya kaukolan mo pian naanosan tan nasarag moy antokaman ya subok. No awaten moy tulong to, agkan balot makaarawi ed sikato, anggan anto ni tay subok ya onsabi!—Sal. 119:165; Roma 8:​38, 39.