Talosan Tayon Maong so Kabaliksan na Bautismo

1. Panon tayon nibaga ya importantin bangat na Biblia so bautismo?

MALIKELIKET tayo no wala ray nababautismoan! Seguradon ontan met so alikna na saray inmuunan Kristiano nen dakel so abautismoan diad samay sankaunaan ya pantitipon da nen Pentecostes 33 C.E. Antis ya abautismoan iray mananisia, impaliwawa nen apostol Pedro so kaimportantian na bautismo. (Gawa 2:​38, 40, 41) Tan kalabas na saray taon, insulat nen apostol Pablo ya say ‘bangat nipaakar ed bautismo’ et kaiba ed “saray manunan bangat nipaakar ed Kristo.” (Heb. 6:​1, 2) On, say bautismo et sakey ed saray sankaunaan ya katuaan ya naamtaan tayo, tan kaukolan tayon talosan itan ya maong. Akin ey?

2. Akin et kaukolan tayon talosan ya maong so bangat nipaakar ed bautismo?

² No mabiskeg so pundasyon na abung, ag-itan bastabasta nageba. Say bangat nipaakar ed bautismo so sakey ed saray pundasyon na pananisia tayo. Kanian balanglan plaplanoen tayo ni labat so manpabautismo o abayag tayo lan abautismoan, kaukolan tayon talosan itan ya bangat pian agbastabasta onkapuy so pananisia tayo. Kanian diad sayan artikulo, ebatan tayo irayan tepet: Antoy kabaliksan na bautismo? Panon itan ya gagawaen? Tan antoy labay ya ibaga na pampabautismo ed ngaran na Ama, tan ed ngaran na Anak, tan ed ngaran na masanton espiritu?

ANTOY KABALIKSAN NA BAUTISMO?

3. No say sakey et nampabautismo, antoy ipapaamta to ed amin?

³ No say sakey et nampabautismo, ipapaamta to ed amin ya (1) inawat to lay katuaan nipaakar ed si Jehova ya Dios tan ed si Kristo Jesus, (2) nagbabawian to la ray kasalanan to, (3) inuman to lay kabibilay to pian napanlingkoran toy Jehova, (4) bibidbiren to ya si Jesus so inusar na Dios pian iliktar so totoo, tan (5) masimoon to lan impikasi tan insipan ed si Jehova ya gawaen toy panlabayan To bilang kabiangan na organisasyon To. No insipan mo la itan ed Dios—o indedikam lay sarilim ed sikato, tan nampabautismo ka la, ginmapo ka lan manakar ed dalan ya ompugta ed bilay ya andi-anggaan.

4. Antoy isisimbolo na pangipalseb ed interon laman mo diad danum tan say iyimwas mo? (Nengnengen met so litrato.)

⁴ No manpabautismo ka, walay mangipalseb na interon laman mo diad danum, insan to ka iyimwas.a Aliling to et singa ka imponpon insan ka pinaoli. (Ikompara so Colosas 2:12.) Ipapanengneng na satan ya balbaleg ya pananguman so ginawam ed bilay mo. Say pangipalseb ed interon laman mo diad danum et isisimbolo to ya tinaynan mo lay datin kabibilay mo. Amay iyimwas mo et isisimbolo to ya igapom lay balon bilay mo tan iyunam la so panlabayan na Dios.

5. Akin ya say pampaparaan mo parad bautismo et nayarin ikompara ed impanggawa nen Noe na biong? (1 Pedro 3:​18-21)

⁵ Basaen so 1 Pedro 3:​18-21. Amay pansasagpot mo pian magmaliw kan kualipikado parad bautismo et nayarin ikompara ed impansagpot nen Noe nen nanggaway biong. No kakkagapom ni labat ya kakabaten si Jehova, ompan say pakaliknam et mair-irap so onkualipika parad bautismo, no panon ya nairapan met si Noe diad impanggawa toy balbaleg ya biong. Pero, kasin talagan kaukolan moy mansagpot pian nabautismoan ka? On! Akin ey? Isip mo pay Noe. Detalyado iray instruksion ya inter na Dios ed sikato. Pero kaukolan to iratan ya tumboken pian niliktar so bilay to tan na pamilya to. Lapud mabiskeg so pananisia to, inunor toy amin ya instruksion na Dios. Tan diad tulong nen Jehova, asumpal to may biong. No sarag nen Noe ya unoren so “amin ya ingganggan na Dios,” sarag mo met!—Gen. 6:22.

6. Akin et imbaga nen Pedro ya say bautismo so “mangililiktar” ed sikatayo?

⁶ Diad bersikulo 21, insulat nen apostol Pedro ya say bautismo so “mangililiktar” ed sikatayo. Siempre, agto labay ya ibaga ya lapu labat ta nampabautismo ka et niliktar ka la tan automatiko lan nalinisan iray kasalanan mo. Say alenleneg ya makaekal ed saray kasalanan tayo et say dondon bagat nen Jesus. (1 Juan 1:7) Anggaman ontan, importante so pampabautismo ta sakey itan ed saray ingganggan nen Jehova, tan atan so paraan pian nipanengneng tayo ya ‘onkekerew tayoy malinis a konsiensia.’ Seguradon iter itan nen Jehova ta unong itan ed panlabayan to. No malinis so konsiensia tayo, walay ilalo tayon manbilay na andi-anggaan. Atan so rason no akin ya imbaga nen Pedro ya say bautismo so “mangililiktar” ed sikatayo.

PANON YA GAGAWAEN SO BAUTISMO?

7. Panon ya gagawaen so bautismo, tan anto ray nepeg tayon ikonsidera no walay manpabautismo?

⁷ Singa abitla nen niman, no say sakey et manpabautismo, kaukolan ya ipalseb so interon laman to ed danum. Agla masyadon indetalye ed Biblia no anto ni ray nepeg ya gawaen. Pero wadtan iray makatulong ya prinsipyo pian amta tayo no antoy dugan gawaen no walay manpabautismo. Singa bilang, wala ray prinsipyo ed Biblia ya makatulong ed saray manpabautismo pian naseguron masimpit so isulong da. No sakey tayo ed saray makaimaton ed paliwawa tan ed aktual ya bautismo, wala ray prinsipyo ya makatulong pian naseguron nipanengneng tayoy respeto. (1 Cor. 14:40; 1 Tim. 2:9) Maslak et elder so mangipapalseb ed saray manpabautismo, pero agtayo komon iikday alablabas ya atension irayan elder. (1 Cor. 1:​14, 15) Tandaan tayo met ya awaten nen Jehova so bautismo na sakey balanglan dakel o daiset so akaimaton ed satan.—Gawa 8:36.

8. Anto ray itetepet ed saray manpabautismo, tan akin? (Gawa 2:​38-42) (Nengnengen met so litrato.)

⁸ Ibabaga na Biblia ya say sakey et nepeg ton “iyabawag ed publiko” so pananisia to “pian sikatoy niliktar.” (Roma 10:​9, 10) No say sakey et manpupulong la, nagagawaan to la itan. Pero diad agew na pampabautismo to, espisyal itan ya pankanawnawa pian niyabawag tod publiko so pananisia to. Atan so rason no akin ya walay duaran itetepet ed saray manpabautismo. Say unona, “Kasin nagbabawian mo la ray kasalanan mo, indedikam lay sarilim ed si Jehova, tan inawat moy panangisalba to ed sika panamegley nen Jesu-Kristo?” Ipapaamta na sayan tepet no anto la ray ginawa na sakey pian onkualipika parad bautismo. Halos pareho iya ed samay imbaga nen Pedro antis ya nabautismoan iramay mananisia nen Pentecostes. Say komaduan tepet, “Kasin natatalosan mo ya say bautismom et mangipapanengneng ya sakey ka lan Tasi nen Jehova tan kabiangan ka la na organisasyon nen Jehova?” Ipapanonot na sayan tepet no anto ray nepeg ya gawaen na sakey pian natoor toy dedikasyon to. Kaukolan ton unoren iray instruksion na organisasyon nen Jehova tan manlingkor kaiba iray agagi, ya singa ginawa na saray inmuunan Kristiano. (Basaen so Gawa 2:​38-42.) Kanian no say sakey et ‘on’ so ebat to ed saratan ya tepet, kualipikado lan nabautismoan.

9. Antokaman so apalabas tayo, anto ray kaukolan tayon gawaen pian nawalaan tayoy maong ya relasyon ed Dios?

⁹ Antis mon naamtaay katuaan, ompan maong ka met ya too tan agkan balot akagaway seryoson kasalanan. Odino ompan Tasi iray atateng mo kanian manlapu lad inkaugaw mo, naar-arom lay Jehova. No ontan so situasyon mo, kasin kaukolan mo ni magbabawi tan manpabautismo pian nawalaan kay maong ya relasyon ed Dios? On, ta amin tayo et inyanak ya makasalanan, kanian walan-wala ray nagagawaan tayon makapaermen ed si Jehova. (Sal. 51:5) Antokaman sirin so apalabas tayo, kaukolan tayoy magbabawi tan iyuna tayo lad bilay tayo so panlabayan nen Jehova, aliwan say panlabayan tayo. No gawaen mo iya, napaliket moy Jehova tan kualipikado ka lan manpabautismo.—Gawa 3:19.

10. No abautismoan ka la ed datin relihyon mo, kasin kaukolan mo ni nabautismoan bilang Tasi nen Jehova? Ipaliwawa.

¹⁰ Panon to no abautismoan ka la ed arum ya relihyon? Kasin kaukolan mo ni nabautismoan bilang Tasi nen Jehova? On. Anggano abautismoan ka la ed datin relihyon mo, agmo ni natatalosan ed saman so katuaan nipaakar ed si Jehova tan si Jesus. Tan anggano indedikam lay sarilim ed Dios, agmo ni natatalosan ed saman no anton talagay panlabayan to. Ag-awaten nen Jehova so ontan ya bautismo. Makaaral tayo ed samay agawa nen wala ray akabat nen apostol Pablo ya lalaki ed Efeso ya dati lan abautismoan. Nen naamtaan nen Pablo ya agda ni natatalosan so katuaan nipaakar ed si Jesus, impaliwawa tod sikara no akin ya kaukolan day nabautismoan lamet.b (Gawa 19:​1-5) Ontan met ed panaon tayo. Awaten labat nen Jehova so bautismo na sakey ya too no natatalosan to no anton talagay panlabayan na Dios.

DIAD “NGARAN NA AMA TAN ED NGARAN NA ANAK TAN ED NGARAN NA MASANTON ESPIRITU”

11. Antoy bibidbiren na sakey no manpabautismo “ed ngaran na Ama tan ed ngaran na Anak tan ed ngaran na masanton espiritu”? (Mateo 28:​18-20)

¹¹ Ingganggan nen Jesus ya nepeg ya nabautismoan iray balon disipulo to “ed ngaran na Ama tan ed ngaran na Anak tan ed ngaran na masanton espiritu.” (Basaen so Mateo 28:​18-20.) Antoy labay ton ibaga? Diad Biblia, no nabitla so salitan “ngaran,” maslak et ontutukoy itan ed reputasyon na sakey. Ontutukoy met itan ed posisyon tan autoridad na samay akan-ngaran. Labay ton ibaga sirin, no say sakey et nabautismoan ed ngaran nen Jehova tan ed ngaran nen Jesus, bibidbiren toy karapatan tan autoridad da, kanian mabulos ya manpapasakop ed sikara. Tan no nabautismoan ed ngaran na masanton espiritu, ipapanengneng to ya bibidbiren toy betang na masanton espiritu ed bilay to, kanian manpapaigiya ed satan. Pantongtongan tayo ni no panon tayon nipanengneng ya bibidbiren tayoy posisyon tan autoridad na Ama tan na Anak tan say betang na masanton espiritu.

12. Antoy labay ya ibaga na pampabautismo ed ngaran na Ama? (Apocalipsis 4:11) (Nengnengen met so litrato.)

¹² “Ed ngaran na Ama.” Bibidbiren tayo ya si Jehova so Ama tayo ed tawen, say angiter na bilay tayo. Sikato so makapanyarin-amin ya Dios, say Amalsa ed amin a bengatla. (Basaen so Apocalipsis 4:11.) Papanisiaan tayo met ya sikato so Dumerengel na pikakasi, tan marespeto tayon uusaren so ngaran to kada no manpipikasi tayo tan no ipapakabat tan iistoryaen tayo ed arum. (Sal. 65:2) Pero wala ni sakey ya katuaan ya kaukolan tayon bidbiren nipaakar ed Ama tayo. Nen Pentecostes, kabkabat la na saray katongtong nen Pedro si Jehova. Pero antis iran nabautismoan, kaukolan dan bidbiren ya si Jehova so angiter na kililiktar da panamegley nen Jesu-Kristo.—Roma 5:8.

13. Antoy labay ya ibaga na pampabautismo ed ngaran na Anak? (Nengnengen met so litrato.)

¹³ “Ed ngaran na Anak.” Bibidbiren tayo ya si Jesus so bogbogtong ya Anak na Dios. Manisia tayo ya si Jesus so “dalan,” say alenleneg ya paraan pian makaasingger tayo ed si Jehova. (Juan 14:6) Sikato met so Mananondon tayo—mabulos ya inatey pian nawalaan tayoy bilay. Lapud satan, agew-agew tayon aaligen so alimbawa nen Jesus, aliwan diad agew labat na bautismo tayo. (1 Juan 2:6) Kanian singa si Jesus, makulikuli tayon manpupulong anggano wala ray subok. (Luc. 4:43) Akaparaan tayo ingen ya itepel so pambusol na arum lapud matoor tayod Dios. (2 Tim. 3:12) Rerespetoen tayo met so betang nen Jesus bilang “ulo na kongregasyon,” kanian mabulos tayon manpapasakop ed saray lalakin pantitiwalaan to ya mangidaulo tan mangasikaso ed sikatayo.—Efe. 4:​8, 11, 12; 5:23.

14. (a) Antoy labay ya ibaga na pampabautismo ed ngaran na masanton espiritu? (Nengnengen met so litrato.) (b) Anto ni ray arum ya bautismo ya parad saray alanaan? (Nengnengen so kahon ya “Arum nin Bautismo ya Parad Saray Alanaan.”)

¹⁴ “Ed ngaran na masanton espiritu.” Papanisiaan tayo so katuaan ya say masanton espiritu et aktibon puersa na Dios, aliwa itan ya persona o kabiangan na Trinidad. Papanisiaan tayo met ya inusar nen Jehova so masanton espiritu pian igiya iray propeta tan saray nansulat na Biblia. Kanian inagew-agew tayon babasaen so Biblia tan iyaaplika tayo iray nanaaralan tayo ditan. (2 Ped. 1:​20, 21) Determinado tayo met ya agmanggaway seryoson kasalanan ta agtayo labay ya naamper so idaloy na masanton espiritu ed bilay tayo tan anggan diad loob na kongregasyon.—Efe. 4:30.

15. Antoy itultuloy tayon gawaen?

¹⁵ No bautismado ka la, komon ta itultuloy mon talosan ya maong so ‘bangat nipaakar ed bautismo’c tan toor mo imay insipan mod si Jehova nen indedikam ed sikato so bilay mo tan nampabautismo ka. Panon to balet no agka ni bautismado? Kasin wala ray makakaamper ed sika? Pantongtongan diad onsublay ya artikulo no anto ray makatulong pian tuloytuloy mon pankimeyan so iyaligwas mod espiritual ya anggad nabautismoan ka.