No Panon Tayon Natulongan Iray Kapamilya Tayon Agmananisia

1-2. Antoy nayarin reaksion na saray kapamilya tan kakanayon tayo nen naamtaan tayoy katuaan?

ONIAY imbaga nen Jesus ed sakey ya laki ya labay toy magmaliw ya disipulo to: “Sempet kad kakanayon mo, tan ibalitam ed sikara so amin a ginawa nen Jehova ed sika.” (Mar. 5:19) Akin et ontay imbaga to? On ta amta nen Jesus ya no walay marakep ya agawa ed sikatayo, labalabay tayo itan ya ibalita ed saray inad-aro tayod bilay.

² Nanonotan mo ni no antoy unonan reaksion mo nen naamtaan moy maong a balita? Seguro eksayted kan ibaga itan ed saray kapamilya tan kakanayon mo. Pero ompan agda ka dinengel, tan ompan asyodotan ni ra ingen ed sika ta agda agustoan so paraan na impitongtong mod sikara. Antoy gawaen mo pian mansiansian maong so pipiulop mod saray kapamilyam tan kakanayon mo anggano si Jehova la so manunad bilay mo?

3. Antoy pantongtongan tayo ed sayan artikulo?

³ Pantongtongan tayo ed sayan artikulo so apatiran makatulong pian maong so pipiulop tayod saray kapamilya tayon agmananisia:a (1) Ipanengneng tayoy malasakit ed sikara anggano ag-ira ondengel; (2) talosan tayo ra anggano walay ansakit ya imbaga o ginawa ra; (3) anosan tayo ra tan agtayo nanaekalan na ilalo; tan (4) ipalikna tayod sikara ya inar-aro tayo ra.

IPANENGNENG MOY MALASAKIT ED SIKARA

4. Antoy reaksion nen Jesus anggano dakel so ag-interesado ed ipupulong to?

⁴ Nen wadiad dalin si Jesus, agsinmawa ya pulongan iray totoo anggano ag-ira interesado ed mensahe to. Inkompara toy sarili to ed managkimey ed kaubasan ya nanduruman paraan lay ginawa to pian manbunga so sakey ya kiew ya igos. (Luc. 13:​6-9) Nen imbaga nen Jesus itan ya ilustrasyon, masulok ya taloy taon to lan pupulongan iray kapara ton Judio. Akin et ontan lay anos nen Jesus? On ta imamalasakit to ra tan labalabay to ran tulongan.

5. Akin et onman lay malasakit nen Jesus ed saray kapara ton Judio?

⁵ Agaylay malasakit nen Jesus ed saray kapara ton Judio ta sankanonot toy situasyon da. Ag-ira tutulongan na saray lider na relihyon da ya nawalaay pananisia ed Dios, kanian akasian to ra ta “singa ra karnero ya andiay managpastol.” (Mar. 6:34) Diad tua, nen asingger lan ompatey si Jesus, inakisan toy Jerusalem ta amta to ya onsabi panaon et dakel ditay ompatey lapud anggapoy pananisia ra. (Luc. 19:​41-44) Singa si Jesus, no sankanonot tayo met so situasyon na saray kapamilya tayo, agtayo onsawan ipanengneng so malasakit ed sikara.

6. Akin et agtayo dapat onsasawa ya tulongan iray agmananisian kapamilya tayo? (Galacia 6:9)

⁶ Basaen so Galacia 6:9. No bilang ta natan et agni interesado iray kapamilyam ed saray papanisiaan tayo, anosan mo labat ira tan ‘agka ontutundan manggawa na maabig.’ Siempre, no say sakey ya too et wala lay abangonan ton relihyon, agto itan bastabasta nataynanan. Seguro nensaman, sakey ka ed saray totoon ‘anggapoy ilalo da tan agda kabat so Dios.’ (Efe. 2:12) Pero walay maan-anos ya angiyaral tan angipanengneng na malasakit ed sika. No inanosan ka na arum, anosan mo met sirin iray kapamilyam.

TALOSAN MO RA

7. Anto ray posiblin rason akin et agtampol anisia iray agagi nen Jesus ya sikato so Mesias?

⁷ Nen nanggaway milagro si Jesus diad Galilea, seguradon abalitaan itan na saray agagi to. (Luc. 4:​14, 22-24) Pero ag-ira anisian tampol ya sikato so Mesias. (Juan 7:5) Akin kasi? Anggapoy espisipikon ibabaga na Biblia. Pero base ed saray salaysay ya nabasa ditan, walay duara ya posiblin rason no akin ya manaalangan iray Judio ya magmaliw ya disipulo nen Jesus. Wala ray Judio ya natatakot ta ompan busolen ira na saray totoo ed lugar da. (Juan 9:​18-22) Say arum balet, asubaybayan day impanugaw nen Jesus tan ag-ira makapanisia ya sikatoy imbaki na Dios. (Mar. 6:​1-4) Nayarin ontan met so naisip tan alikna na saray agagi nen Jesus. Tan nayarin ontan met so iisipen tan nalilikna na saray kapamilyam.

8. Akin ya no maminsan et walay ansakit ya ibaga o gawaen na saray kapamilya tayo?

⁸ Isip mo no akin ya wala ray ansakit ya ibabaga o gagawaen da. Ompan kaiba iray agagi nen Jesus ya angibagan “aderal lay ulo to.” (Mar. 3:21) Akin kasi et onman so imbaga ra? Base ed salaysay, ag-anggan naarap nen Jesus so mangan lapud pambabangat tan pamapaabig to ed saray totoo. (Mar. 3:20) Nen naamtaan itan na saray agagi to, ompan inisip da ya panatiko si Jesus tan onsosobra la. Ompan ontan met so iisipen na saray kapamilyam. Say amta da, panatiko kad relihyon mo. Ipanengneng mo sirin diad ugalim tan diad saray ibabagam ya balanse ka tan aliwa kan panatiko.

9. Antoy gawaen tayo pian manguman so pakanengneng na saray kapamilya tayo ed saray Tasi? (1 Pedro 3:​1, 2) (Nengnengen met so litrato.)

⁹ Ipanengneng moy konsiderasyon tan maong ya ugali. No maomaong so pitotongtong tan panagtrato tayod saray kapamilya tayo, ompan manguman so pakanengneng dad sikatayo. (Basaen so 1 Pedro 3:​1, 2.) Isipen pay sakey ya sister ya aliwan Tasi so mister to. Kada no miaral o manpulong imay sister, ompan mansinti imay mister to ta singa napapaulyanan la. Anto kasi marakep ya gawaen to may sister pian aliwan ontan so nalikna na asawa to? Ompan sarag ton umanen so eskedyul tod kapapaway pian naseguro ton walay panaon to parad mister to. Singa bilang, ompan maabig no say pampulong to et no anggapod abung si asawa to o walay arum ya gagawaen to. No makonsidera imay sister, napaliket toy asawa to tan ompan manguman so pakanengneng tod saray Tasi.

10. Panon tayon naalig si Jesus no walay negatibon ibaga na arum?

¹⁰ Agmo pinunuyan so ibabaga na arum. Nen imbaga na totoo ya masiba si Jesus tan mainum na alak, agto la indepensa so sarili to. Matalek si Jesus ya no obserbaan na totoo so kabibilay to, naamtaan da lanlamang ya aliwan tua iratan ya akusasyon da. (Mat. 11:19) Tua, amta toy man-enjoy, pero aliwan sobsobra. (Ikompara so Juan 2:​2, 6-10.) Singa si Jesus, agmet kaukolan ya lanang mon idepensa so sarilim no walay negatibon ibaga na arum. Basta say seguradom, no obserbaan ka na saray kapamilyam, nanengneng da ya balanse tan maliket ka ed bilay mo. No ontan so gawaen mo, napaneknekan da lanlamang ya aliwan tua iray ibabaga na arum nipaakar ed sikatayo ran Tasi.

ANOSAN MO RA TAN AGKA NANAEKALAN NA ILALO

11. Panoy impantrato nen Jesus ed saray agagi to ya agmananisia?

¹¹ No basaen tayoy Ebanghelyo, nanengneng tayo ya agsinukoan nen Jesus iray agagi to. Nen ginawa nen Jesus so unonan milagro to diad Cana, wadman iray agagi to. (Juan 2:​11, 12) Pero singa abitla nen niman, ag-ira manisia ya sikato so Mesias. Anggano onman so agawa, agnilingwanan nen Jesus ya agagi to ni ran siansia. Base ed salaysay na Biblia, anggano linmabas lay manga taloy taon manlapud samay unonan milagro nen Jesus diad Cana, maomaong nin siansiay impitongtong tod saray agagi to.—Juan 7:​5-8.

12. Antoy marakep ya dalepdepen tayo pian agtayo sukoan iray kapamilya tayo?

¹² Pian agtayo sukoan iray agmananisian kapamilya tayo, marakep no dalepdepen tayoy panangasi nen Aman Jehova. Tandaan tayo ya anggano ginmapo lay baleg ya kairapan, wala ni tsansa na totoo ya pilien so dugan panagdayew. No aderal la so amin ya palson relihyon, ompan nanonotan na saray kapamilya tayo ya atan la may abaybayag tayon ibabagad sikara, tan ompan mandesisyon met la ran manlingkor ed si Jehova.b (Apo. 17:16) Pero siempre, natan ni labat, panengnengan tayo lay kamaongan iray kapamilya tayo, lalo la no ondadalan irad mairap ya situasyon. No nalikna ra ya talagan inar-aro tayo ra, ompan onlemek so puso ra tan napakiwas iran ondengel ed mensahen ipupulong tayo.

IPALIKNAM YA INAR-AROM IRA

13. Anggano manuna si Jehova ed bilay tayo, antoy agtayo labay ya nalikna na saray kapamilya tayo?

¹³ Tua, iyuuna tayod bilay tayo so panaglingkor tayo ed si Jehova. Pero agtayo labay ya nalikna na saray kapamilya tayo ya anggapo lay panaon tayod sikara tan ibabaliwala tayo la ra. (Mat. 7:12) Panon tayon nipanengneng ya importante ira ed bilay tayo? Pantongtongan tayoy pigaran paraan.

14-15. Panon tayon nipalikna ed saray agmananisian kapamilya tayo ya inar-aro tayo ra? Mangiter na alimbawa.

¹⁴ Lanang mo ran kumustaen tan ipanengneng moy panangaro. Nipalikna tayod saray kapamilya tayo ya inar-aro tayo ra no lanang tayon mikumustaan ed sikara tan balitaan tayo rad saray nagagawad bilay tayo. Singa bilang, i-chat mo ra tan pawitan mo ray litrato no bilang ta nambakasyon ka, walay nakar mon lugar, o kaibam iray kakaarom. Marakep met no ikdan mo ray sulat o card tan regaloan mo ra, anggano simpli labat. No gawaen mo iratan, nalikna ra ya sankanonot mo ra tan inar-arom ira.

¹⁵ Imanoen no antoy ginawa nen Sister Anna ya tagad Armenia. Labalabay kuno na pamilya to so man-bonding, lalo la no birthday tan holiday. Kanian nen nan-Tasi si Anna, inisip na saray kapamilya to ya ompan matalag da lan nakaiba. Mapagpaga met ira ed no antoy pansumpalay bilay to. Antoy ginawa nen Anna pian onligen so liknaan na saray kapamilya to? Kuan to: “Kada no pasyaren ko ra, iistoryaen kod sikara no antoy nagagawad bilay ko. Iimbitaan ko met iran ompasyar ed siak, tan ikakabat ko rad saray kakaarok. Kanian wala ray kapamilyak ya kaaro met la so turing da ed saray agagi. Lapud anengneng da ya maliket ak, sikara lan mismoy angibaga ya balibali kunoy bilay ko, kanian agla ra mapagpaga.”

16. Antoy ginawa nen Jesus pian nipalikna to ya importante ed sikato so agi ton si Santiago? (Nengnengen met so paimanod leksab.)

¹⁶ Ipaliknam ya importante ira ed sika. Nen apaoli lay Jesus, nampanengneng ed agi ton si Santiago tan kinatongtong to. (1 Cor. 15:7) Seguradon malikeliket si Santiago ta alikna ton sikatoy importante nin siansia ed si kuya to. Diad satan ya impannengneng da, ompan diman met la akombinse si Santiago ya talagan si Jesus so Mesias. Kayari to man, ompan si Santiago lan mismo so tinmulong ed arum nin kapamilya ra pian nakombinse met ira ya si Jesus so Mesias.c—Gawa 1:14.

17. Panon tayon niyaplika imay prinsipyo ed Roma 12:15? (Nengnengen met so litrato.)

¹⁷ Basaen so Roma 12:15. No ipalikna tayod saray kapamilya tayo ya sankanonot tayo ra—diad irap man o inawa—ompan manguman so pakanengneng dad sikatayo.d Singa bilang, no walay kapamilya tayo ya nananak, miliket tayod sikara tan ikdan tayo ray regalo pian nalikna dan importante ira ed sikatayo. No inateyan iray kakanayon tayo, ligliwaen tayo ra, ikdan tayo ray card, tan mangiter tayoy praktikal ya tulong. Tan no walay dadalanen dan problema, marakep no i-chat, tawagan, o pasyaren tayo ra.

18. Panon tayon naalig so alimbawa na disipulon si Andres?

¹⁸ Ikabat mo rad saray agagi. Nen naamtaan nen Andres ya si Jesus so Mesias, inkabat ton tampol ed si Jesus so agi ton si Pedro. (Juan 1:​40-42) Maabig no ikabat tayo met iray agmananisian kapamilya tayo ed saray agagi. Singa bilang, sarag tayo ran imbitaan no maminsan ya miaral o itagar tayo ran mangan kaiba iray kakaaro tayod kongregasyon. No nakabat da iray agagi, diman da nanengneng ya normal met labat tan desentin totoo iray Tasi.

19. Panon so nepeg ya pantrato tayod saray kapamilya tayo anggano agda masyadon natatalosan iray papanisiaan tayo? (1 Pedro 3:15)

¹⁹ Basaen so 1 Pedro 3:15. Ompan agmasyadon natatalosan na saray kapamilyam iray papanisiaan tayo. Pero no panengnengan mo ray kamaongan tan respeto, atan so ontatak ed isip da. Anggano agda ka la nakakaiba ed nanduruman selebrasyon tan tradisyon da, manggawa kay paraan pian nakaibam ni ran siansia diad arum ya panaon. Seguradon panliketan da no pasyaren mo ra, itagar mo ran mangan, tan regaloan mo ra anggano anggapoy okasyon.

AGMO RA SUSUKOAN

20. Akin et makapaseseg so agawad si Santiago?

²⁰ Legan na ministeryo nen Jesus diad dalin, agnagmaliw ya disipulo si Santiago. Pero asabi panaon ya nagmaliw lanlamang ya mananisia. (Gal. 1:​18, 19; 2:9) Anggano aga kaibay Santiago ed saray akadkaunan disipulo, mapatnag ya sankanonot tan impapuso to iray bangat nen Jesus. Singa bilang, nen sinulatan to iray kongregasyon, wala ray binitla to ya halos pareho ed saramay imbangat nen Jesus diad Sermon ed Palandey.e

21. Akin et agtayo dapat susukoan iray kapamilya tan kakanayon tayon agmananisia?

²¹ Anggano pansasagpotan tayo lan ipanengneng so kamaongan tan panangaro ed saray kapamilya tayon agmananisia, ompan agni ran siansia interesado ed katuaan tan agmanguuman so panagtrato dad sikatayo. Pero agtayo ra dapat susukoan. Tandaan tayo ya no itultuloy tayo ran panengnengan na kaabigan, aaligen tayoy mapangasin Dios tayo, si Aman Jehova, tan say Anak to, si Jesus. (Luc. 6:​33, 36) Agtayo onsasawan ipalikna so panangaro ed sikara ta ompan manguman lanlamang ira. Diad tua, ompan tatandaan da ingen iray katuaan ya inanabang tayod sikara. On, no agtayo sukoan iray kapamilya tan kakanayon tayon agmananisia, seguradon agnasabaan so liket tayo no nakaiba tayo met la ran manlingkor ed si Jehova.