Paaligwasen Iray Abilidad Tayod Ministeryo—Ipasal Iray Balon Manangipalapag

No Akin ya Importante: Kaukolan a naaralan ya unoren na saray balon disipulo nen Jesus so “amin a bengatlan ingganggan” to, kaibad satan so pangibangat na katuaan ed arum. (Mat. 28:19, 20) Dakel ya iyaaralan so kabiangan lad Teokratikon Eskuelaan Parad Ministeryo, tan nayarin manpupulong met la ran impormal ed saray kapamilya o kakaaro ra. Balet ompan labay da met lay mibiang ed ministeryo ta naaaralan dan labay nen Jehova ya narengel na amin a totoo so maong a balita. (Roma 10:13, 14) No naaprubaan la bilang agbautismadon manangipalapag so iyaaralan, kaukolan tayo ran ipasal a maong pian magmaliw iran mas makpel ed ministeryo ta importante iyad iyaligwas da.—Luc. 6:40.

No Panon Iyan Nagawaan:

Tulongan so balon manangipalapag ya mangalay publikasyon ya usaren tod panagpulong tan pangiyaral. Ipanengneng no panon mon ipaparaan so kargay bag mo parad panagpulong, tan ipaliwawam so gagala na kada publikasyon ya awit mo.
Manpili kayon dua na presentasyon ed Ministeryo ed Panarian, insan yo ipraktis. Paseseg mon ipresenta to itan ed natural ya paraan. Ipasal iray eksenan kaslakan ed teritorya yo ya walad pahina 82 na libron Eskuelaan Parad Ministeryo. Idanet ya importante so masimpit a panangawes tan panag-ayos.—2 Cor. 6:3, 4.
Tuloytuloy ya ipasal. Ipanengneng mod balon manangipalapag no anto so territory card, tan ibangat mon usaren toy house-to-house record. Ipanengneng no panoy pangirekord ed saray interesado. Ibangat mo no panon ton usarey jw.org tan bokletan Good News for People of All Nations ed ministeryo. Tulongan mon pawilen iray nakakatongtong ton interesado.—1 Cor. 3:6.
Magmaliw ya maanos, tan komendaan mo. (Uli. 25:11) Ipanengneng mon maabig kan alimbawa. Say seseg tan ipapaliknam a personal ya interes ed sikato et baleg so epekto to, anggan pigay taon ni onlabas.

Gawaen Iya Legan na Sayan Bulan:

Ipilam ya manpulong, man-RV, o mangiyaral so iyaaralan mon balo nin manangipalapag. Balet no anggapo, ipilam so sakey ya manangipalapag ya aliwa nin eksperiensyado.