Parte 10—Pangikondukta na Progresibo Iran Panangiyaral na Biblia
Ipasal Iray Iyaaralan Diad Panagkabkaabungan a Ministeryo
1 Sano apandesisyonan la na saray mamatatken a kualipikado la bilang agbautismadon manangipalapag so sakey ya iyaaralan na Biblia, nayarian to lay mibiang ed mapublikon panagpulong na kongregasyon. (Nengnengen so Organisadon Manggawa ed Linawa nen Jehova, p. 79-81.) Panon tayon natulongan so iyaaralan a makarapat ed panagkabkaabungan a ministeryo?
2 Manparaan a Saniba: Anggapo lay magmaong ni nen say maabig a panagparaan. Ipanengneng ed iyaaralan so pakaromogan ed saray nisuherin presentasyon ed Ministeryo Tayo ed Panarian tan ed libron Reasoning, tan tulongan a mamili na simplin presentasyon a praktikal ed lokal a teritorya. Manlapud gapo, pasesegen lan mangusar na Biblia ed ministeryo to.—2 Tim. 4:2.
3 Saray sesyon na panagpasal so makagunggonan tuloy ed balon manangipalapag. Legan ya ipapasal na iyaaralan so presentasyon, ibangat ed sikato no panon so mataktikan pangarap ed saray kaslakan a reaksion na totoo ed teritorya. (Col. 4:6) Paseguroan ya agmet kaukolan ya amta na Kristianon ministro so ebat ed amin a nayarin itepet na unabung. Mabetbet a sankaabigan so pangibagan mansukimat ni insan ompawil pian nagkalalon nipaliwawa so pamaakaran ya intepet.—Uli. 15:28.
4 Manpulong a Saniba: Diad primeron pibiang na iyaaralan ed panagkabkaabungan a ministeryo, paulyan a naobserbaan to no panon so pangiparungtal yo ed presentasyon ya imparaan yon dua. Insan yo pibiangen. Diad arum a kipapasen, nayarin sankaabigan so pangipabtang ed balon manangipalapag na kabiangan labat na presentasyon, a singa say pambasa tan pankomento ed sakey a teksto. Ikonsidera so personalidad tan saray abilidad na iyaaralan. (Fil. 4:5) Aglilingwanan so lawas pangiter na komendasyon legan na progresibon pangipapasal yo ed sikato diad nanduruman aspekto na panagpulong a kimey.
5 Importantin tuloy a tulongan so balon manangipalapag a nawalaan na regular ya eskedyul ed pibibiang ed ministeryo, a no nayadyari et sinimba. (Fil. 3:16) Manggawa na pihon uksoyan pian makapanulop kayon manpulong, tan pasesegen a mikimey ed arum a maseseg met. Say ehemplo tan pililimog da so ontulong ed sikaton nawalaan na dunong tan liket ed panagkabkaabungan a ministeryo.