Inabang ed Arum so Ilalo Tayo ed Panarian
1 Legan na sarayan mapeligron kaunoran ya agew, dakdakel a totoo so anggapoy ilalo. (Efe. 2:12) Saray arum et agmakabat a manmamatalek ed saray kayamanan, manuley, siensia, tan arum nira. Agaylay liket tayo ta walaan itayo na peteg ya ilalo ed arapen, “sakey a nailaloan tan malet a pataga na kamarerwa”!—Heb. 6:19.
2 Diad uley na Panarian na Dios, say dalin et magmaliw a paraiso. Saray inad-aron inaatey so paolien. (Gawa 24:15) Say kairapay bilay, ag-inkahustisya, sakit, itatatken, tan say patey so naandi la. (Sal. 9:18; Mat. 12:20, 21; Apo. 21:3, 4) Pigara labat iraya ed saray sipan nen Jehova a magano lan nasumpal. Dinan ed saratan ya ilalo so nagkalautlan pipirawaten mo lan nagawa?
3 Iyabawag so Maong a Balita: Nepeg ya agtayo susoloen so ilalo na Panarian. Say aro ed Dios tan ed kaparan too so mamakiwas ed sikatayo pian aligen si Jesus tan ‘ipulong so maong a balita ed saray duruka, ipakabat so kawayangan ed saray adakep, say kipawil na pakanengneng na saray bulag, tan say kibulos na saray nanaaposan.’ (Luc. 4:18) Impulong nen apostol Pablo so maong a balita diad tindaan tan ed inerman a pakaromogan to na too. Talagan inyupot toy panaon to parad ministeryo. (Gawa 18:5) No magmaliw itayon singa sikato a maseseg ed ministeryo, say Kristianon ilalo tayo et agburagasen na “saray kapagaan na mundo, tan say panamalingo na saray kayamanan.”—Mar. 4:19.
4 Siansian mabilabilay so ilalo tayo ed Panarian anggano saray totoo et agmananginenen, ag-interesado ed mensahe na Panarian, odino parungtalan ni ingen ya onsumpa ed sikatayo. ‘Mansiasiansia itayon malet tan agnagiing ed panangiparungtal na ilalo tayo.’ (Heb. 10:23) Agtayo ‘ibabaing so ebanghelyo.’ (Roma 1:16) Tan ompan diad kaunoran et ondengel ni ingen iray arum no nanengneng day kombiksion tan inkaseet tayo.
5 Anggaman makatunongan ya ipaimano tayoy pakakasumpal na propesiyay Biblia ya idedenden na kipapasen na mundo, aliwa itayon managpulong na kadederal. Noagta, say ministeryo tayo et akasentro ed ilalon Panarian, salanti, say maong a balita na Panarian na Dios. Ipulong tayo sirin tekep na seseg tan seet iyan maong a balita pian ‘napano [itayo] na andi-kaatapan ya ilalo angga ed kasampotan.’—Heb. 6:11.