Manakar a Sikakalakal
1 Sanen inimbitaan nen Jesus so apatiran sumisigay pian magmaliw a patumbok to, ag-ira nampaleen ed desiyon da ta ‘sikatoy tinumbok dan tampol.’ (Mat. 4:18-22) Sanen akomberte si Saulo na Tarso tan pinmawil so pakanengneng to, sikatoy agmet nampaleen, noagta ‘tamtampol ya impulong to ed saray sinagoga si Jesus.’ (Gawa 9:20) Say panaon ag-onsesener, no linmabas la, aglan balot napapawil itan. Kanian, importantin tuloy a ‘manakar itayo unong ed kakaakar na makalakal a too’ a duga so pangusaran tayoy panaon tayo.—Efe. 5:15, 16.
2 Ag-iilaloan a Nagawa: Saray pankanawnawa tayo natan a manserbi ed si Jehova so nayarin nabuas et anggapo la. (Sant. 4:14) Anggapo ed sikatayoy nipuera ed “ag-iilaloan a nagawa.” (Ecl. 9:11, NW) Sakey ni et ontatatken itayon amin, tan diad sayan kaplesan a sistema na bengabengatla et nasagmak tayon nasagmak ‘iray mauges ya agew ya onsabi’ lapud itatatken a manlimita ed panagserbi tayo’d si Jehova. (Ecl. 12:1) Sirin, aliwan makabat ya ikuntang so dedikasyon ed Dios odino alagaren ni sankaabigan iran kipapasen sakbay tayon palaknaben so ministeryo tayo unong ed nagawaan tayo la natan. (Luc. 9:59-62) Diad kamasikenan la nen Abraham et nalmo toy deen tan kaligenan, inatey a “masiken la a napnek na taotaon” lapud say angusaran toy bilay to et makabat, a sigpot ton intalaga itan ed si Jehova.—Gen. 25:8.
3 Say Panaon Apatikeyan: Labay tayo met ya usaren a makabat so panaon tayo lapud “say panaon apatikeyan la.” (1 Cor. 7:29-31) Maganggano la natan a manampot iyan daan a sistema na bengabengatla. Saray pankanawnawa a mibiang ed impasyan panagtipon na saray kinmarnero legay ‘panagani diad dalin’ so manampot la. (Apo. 14:15) Nepeg sirin a manasikaso itayo ya agtayo aabuloyan iray kapagaan ed bilay tan pakadisturboan a manamsam ed panaon a mausausar komon ed ministeryo. (Luc. 21:34, 35) Talagan napenepenek itayo no nonoten tayoray sigpot ya impibiang tayo ed panagani!
4 Nepeg a lawas itayon alisto pian agtayo napalampas iray makapalikliket ya opurtunidad a nayarin nilukas ed sikatayo. Determinado tayon gawaen so anggaay nayarian tayo “legan a nibabagan satan et ‘diad Sayan agew.’” (Heb. 3:13, NW) Diad ontan, nipapanengneng tayon sikatayoy peteg a makabat, lapud siopaman a “mangunor ed linawa na Dios onsiansia lawas.”—1 Juan 2:17.