Tepet

◼ Manepeg kasi so manpa-wagwagan (garage sales) odino pangiyuksoy na saray ebento a panugyop-na-pundo pian tulongan so kongregasyon?

Kaslakan la’d saray relihyoson organisasyon so panisponsor na saray ebenton panugyop-na-pundo, a singa saray panangan (dinners), pabargin, odino piesta. Anggaman nayarin ipasen na arum a maabig so gagala na saya, sarayan ebento et singa met la panag-solisit. Aliwan ontan so paraan na saray Tasi nen Jehova pian nawalaan na pinansyal a suporta.

Oniay imbaga na komaduan isyu na The Watchtower, ya Agosto 1879, nipaakar ed agtayo pangalig ed saray iglesia tan ed panag-solisit na pundo: “‘Panisiaan min say manusuporta ed Zion’s Watch Tower’ et si JEHOVA, tan lapud saya, ag-iyan balot mipayabol nisay mikasi ed totoo parad suporta. Sano Saman a nankuan: ‘Amin a balitok tan pilak na kapalandeyan et kien ko,’ so agla mangitarya na nakaukolan iran pundo, natalosan mi a panaon la pian itunda so panangipalapag [ed satan].”

Mantutultuloy tayon susumpalen so Makasulatan a prinsipyo a: “Balang sakey gawaen to komon so ginetma to ed puso to; aliwa a dia ed kaermenan odino dia ed pasootan; ta say Dios aroen to so sililiket a mangiter.” (2 Cor. 9:7) Walaray kahon parad kontribusyon dia ed Kingdom Hall pian boluntaryon makapandonasyon iray indibidual no labay da. (2 Ara. 12:9) Saratan a kontribusyon et ag-sosolisiten; nisay iiter iratan a nononoten a walay naalan kasalat.