Manplano la Natan a Man-Auxiliary Payunir!

1. Akin a nepeg itayon mangiletneg na saray kalat parad ontumbok a taon?

¹ Nepeg itayon mangiletneg na saray kalat no labay tayoy onaligwas ed espiritual. Anto laray personal a kalat mo parad ontumbok a taon? Say sakey ya alay abig a kalat et say pan-auxiliary payunir. Lapud kaslakan lan nakaukolan ed sayan makapaliket ya aktibidad so masakbay a panagplano, natan la so maabig a panaon pian nonoten itan. Akin ya ikonsidera bilang kalat so pan-auxiliary payunir?

2. Akin ya ikonsidera so pan-auxiliary payunir bilang kalat?

² No man-auxiliary payunir tayo, napanlingkoran tayo a ‘nagkalalo’ so mangatatawen ya Ama tayo diad pangusar tayo na malaglaem a panaon ed ministeryo. (1 Tes. 4:1) Diad panmolimoli tayo ed amin a ginawa nen Jehova parad sikatayo, napakiwas itayo ya impapuson ‘mangisaklang ed Dios na bagat na panangidayew.’ (Heb. 13:15; 1 Juan 4:9, 10) Siempre, nakaukolan ed panag-auxiliary payunir so pangisakripisyo na panaon tan sagpot. Kabat a maong nen Jehova iray indibidual a kipapasen tayo tan saray personal a pansasakripisyo tayo pian sikatoy napanlingkoran. (Heb. 6:10) Panlapuan na baleg a gayaga so pakaamtan napapaliket tayo si Jehova ed pankukuli tayo.​—1 Awa. 29:9; Isa. 65:14.

3, 4. Panon itayon nagunggonaan na panag-auxiliary payunir?

³ Saray Gunggona: No mabetbet mon gagawaen so sakey a bengatla, kaslakan lan satan so oninomay tan lalon makapaliket. Say pangusar na malaglaem a panaon ed ministeryo et gawaen to kan mas relaks a mitongtong. Ondunong ka ed panangigapo na tongtongan tan ed panangusar na Biblia. No kapigan mas maparanay mon itotongtong so pananisiam, diman a lalon ombiskeg itan. Dakel a datin andian na iyaaralan na Biblia so awalaan la na satan sanen nan-auxiliary payunir ira.

⁴ Nayarin say panag-auxiliary payunir met so nakaukolan pian onligsa so nagmaliw lan mikanikal a serbisyo tayo. Sakey a datin regular payunir, a liknaen ton masyado lay pangiyuuna to ed sekular a trabaho to, so nandesidin man-auxiliary payunir ed loob na sakey bulan. Inkuan to: “Agko napanisiaan no panon ak ya apaligsa ed espiritual na satan a sakey bulan! Inyarunsak so pakapan-auxiliary payunir kon tuloy-tuloy ya anggad akapawil ak ed panag-regular payunir.”

5. Panon tayon natalonaan so pigaran kaslakan a babeng ed panag-auxiliary payunir?

⁵ Talonaan Iray Babeng: Masuyat so arum a man-aplay a man-auxiliary payunir lapud iisipen dan kulang iray abilidad ed panagpulong. No saya so mamupuger ed sika, tandaan a sarag kan tulongan nen Jehova. Si Moises, anggaman ‘mabanayat a mansalita tan manawel,’ et inusar nen Jehova a manumpal ed linawa To. (Exo. 4:10-12) No walaray problemam ed bunigas odino okupado so eskedyul mo, agmo bengatbengat iisipen ya agka la makapan-auxiliary payunir. Ompan mas mainomay manaya so pangala ed kakaukolanen ya oras nen say abaloan mo. Say limamplon oras ed sakey bulan et man-aberids labat na kulang a duay oras kada agew. Ompan makapan-auxiliary payunir ka diad pangiyuksoy moy makatunongan ya eskedyul. No okupado lay eskedyul mo, ompan sarag ton iyalis mo iray agtanto importantin kimey ed arum a bulan. Walaray sigpot panaon ed trabaho ra ya akapangipanaon ed panag-auxiliary payunir diad impanbakasyon da lambengat na sakey odino duaran agew.​—Col. 4:5.

6. Akin a makanakanan ipikasi so kalat a pan-auxiliary payunir?

⁶ No Panon a Gawaen Itan: No panduaruwaan mo no kasin sarag moy man-auxiliary payunir, ipikasim itan a pilalek mo. (Roma 12:11, 12) Kerewen ed si Jehova a bendisyonan to iray sagpot mon palaknaben so ministeryom. Natulongan to kan manggawa na makabat iran desisyon no panon mon iyarunsa so eskedyul mo. (Sant. 1:5) No anggapo ni ontan a pilalek mo, patulongan ed si Jehova pian nawalaan ka na liket ed panagpulong a kimey. (Luc. 10:1, 17) No say pakaliknam et agmo sarag, kerew ka ed si Jehova na pakpel.​—Gawa 4:29.

7. Panon a nayarin ontulong so pangiyaplika ed Uliran 15:22 pian makapan-auxiliary payunir so sakey a kapamilyaan?

⁷ Pantongtongan yon sankapamilyaan so kalat a pan-auxiliary payunir. (Uli. 15:22) Ompan makapan-auxiliary payunir so sakey a membro na pamilya diad panuporta na arum nin kapamilyaan. Alimbawa, nayarin mansusublayan iray membro na pamilya a mangiba ed samay auxiliary payunir diad labi odino sampot-simba. Nayarin iyopresi ran gawaen so kaslakan a kimey na samay auxiliary payunir. Itongtong met ed arum a kakongregasyonan mo so pilalek mon man-auxiliary payunir, nagkalautla diad saramay kaparehom na saray kipapasen. Lapud lalon mamaligsa tan makatulong iya.

8. Antoran bulan so nayarim a pilien pian man-auxiliary payunir?

⁸ Nengnengen so kalendaryo parad taon 2007 tan determinaen no kapigan ka nayarin man-auxiliary payunir. No sigpot-panaon so trabahom odino maneeskuela ka, nayarin labay mon ikonsidera iray bulan a mas dakel so Sabado odino Simba, odino holiday. Say Marso tan Hunyo et walaan na limaran Sabado, tan say Abril tan Hulyo et walaay limaran Simba. Say Setyembre tan Disyembre et namparan walaan na limaran Sabado tan Simba. Nayarin labay mo met ya ikonsidera iray bulan a kaslakan lan maong so tiempo. Ompan labay mo met ya ikonsidera so manpayunir ed bulan ya ibisita na manangasikaso na sirkito ed kongregasyon yo. Natan, no apilim laray bulan a labay mon pan-auxiliary payunir, mangisulat ka lan tampol na sakey ya eskedyul a mangiyabuloy ed sikan naabot so kakaukolanen ya oras.

9. Anto so nagawaan tayo no agposible ed sikatayo so pan-auxiliary payunir?

⁹ Nayarin kayarim a maalwar a ‘binilang so bili’ et agposible ed sika so pan-auxiliary payunir ed ontumbok iran bulan. (Luc. 14:28) Balet, sarag mo nin siansia a pansiansiaen so payunir ya espiritu. Itultuloy mon gawaen so amin a nayarian mo ed ministeryo, a matalek a napapaliket mo si Jehova sano iiter mo ed sikato so sankaabigan mo. (Luc. 21:1-4) Nayarin manguman iray kipapasen mo, tan diad arapen et makapan-auxiliary payunir ka la. Balet, diad kaplesan, sarag mon suportaan tan pabiskegen iramay walad sayan aspekto na serbisyo. Sarag mo ni ingen ya aruman na sakey agew so kapapaway mo ed loob na sakey simba pian napiulopan mo ra ed ministeryo.

10. Akin a nepeg itayon makalikna na inkaganatan?

¹⁰ Makakalikna na inkaganatan iray totoo nen Jehova. Walay kimey a kaukolan tayon sumpalen, salanti, say pangipulong ed maong a balita. Bilay so nalalanor, tan antiktikey lay akeran panaon. (1 Cor. 7:29-31) Say aro ed Dios tan ed kaparan too so mamakiwas ed sikatayon mamasya ed ministeryo ed sayan taon. Diad pansagpot tan maong a panagplano, posiblin makapan-auxiliary payunir ka.